બોટાદ લઠ્ઠાકાંડ વચ્ચે હવે મોટી કાર્યવાહી સામે આવી છે. જેમાં દારૂના સેટિંગનો AUDIO વાયરલ થતાં મહિલા ASI સસ્પેન્ડ કરવામાં આવ્યા છે. આ સાથે કેમિકલ યુક્ત દારૂ પીવાથી અત્યાર સુધી 31 લોકોના મોત થાય હોવાની સાથે પોલીસે 14 આરોપીઓની ધરપકડ કરી. તો વળી આ સમગ્ર કેસમાં હવે સ્ટેટ મોનિટરિંગ સેલ પણ જોડાઈ છે. જેને ળાઇ સ્ટેટ મોનિટરિંગ સેલના ઈન્ચાર્જ નિર્લિપ્ત રાયે બરવાળામાં ધામા નાખ્યાં છે.
બોટાદના બરવાળાના રોજીદ ગામે કથિત લઠ્ઠાકાંડ
બોટાદના બરવાળાના રોજીદ ગામે કથિત લઠ્ઠાકાંડ સામે આવ્યા બાદ રાજ્યભરમાં હડકંપ મચી ગયો છે. કેસની તપાસમાં સામે આવ્યું છે કે, અમદાવાદની ફેક્ટરીમાં ઝેરી કેમિકલ લાવવામાં આવ્યું હતું. જે કેમિકલ યુક્ત દારૂ પિવાથી બોટાદ, અમદાવાદ જિલ્લાના ગામોના 31 લોકોના મોત થયા છે. સમગ્ર કેસમાં અત્યાર સુધી 14 આરોપીઓની ધરપકડ કરાઇ છે. જેમાં ગજરાબેન અને લાલા, મુખ્ય આરોપી પિન્ટુ ગોરવાની ધરપકડ કરાઇ છે. વિગતો મુજબ જયેશ પાસેથી કેમિકલ લઈને પીન્ટુએ અન્ય બુટલેગરોને આપ્યું હતુ. જોકે જયેશે પીન્ટુને ફેક્ટરીમાંથી કેમિકલ ચોરીને આપ્યું હતું. જેને લઈ હવે 14 બુટલેગરો વિરુદ્ધ ગુનો દાખલ થયો છે.
બોટાદ લઠ્ઠાકાંડના આરોપીની ધરપકડ
બોટાદ લઠ્ઠાકાંડમાં સામે આવેલી વિગતો મુજબ જયેશ પાસેથી કેમિકલ લઈને પીન્ટુએ અન્ય બુટલેગરોને આપ્યું હતુ. જોકે પીન્ટુએ બરવાળા અને ધંધુકાના બુટલેગરોને કેમિકલ આપ્યું હતુ. જેને લઈ બોટાદ લઠ્ઠાકાંડના આરોપી પીન્ટુની પોલીસે ધરપકડ કરી.
બોટાદના કથિત લઠ્ઠાકાંડમાં SPની કાર્યવાહી, મહિલા ASI યાસ્મીન સસ્પેન્ડ
આ તરફ હવે બરવાળા પોલીસ સ્ટેશનના એ.એસ. આઈ યાસમીન જરગેલાને સસ્પેન્ડ કરવામાં આવ્યા છે. નોંધનીય છે કે, એ.એસ.આઈ નો દારૂ મામલે ઓડિયો વાયરલ થયો હતો. જેને લઈ બોટાદ એસપી કરન રાજ વાઘેલાએ મોટી કાર્યવાહી કરી છે. જોકે વાયરલ ઓડિયો બાદ પહેલા ASIની બદલી કરાઈ હતી અને હવે તેમને સસ્પેન્ડ કરાયા છે.
સ્ટેટ મોનિટરિંગ સેલ પણ તપાસમાં જોડાઈ
બરવાળામાં કથિત લઠ્ઠાકાંડ મુદ્દે તપાસમાં વધુ એક ટીમ જોડાઈ છે. વિગતો મુજબ હવે સ્ટેટ મોનિટરિંગ સેલ પણ તપાસમાં જોડાઈ છે. જેને લઈ સ્ટેટ મોનિટરિંગ સેલના ઈન્ચાર્જ નિર્લિપ્ત રાય બરવાળા પહોંચ્યા હતા. બીજી તરફ બરવાળા પોલીસે 14 બુટલેગર વિરુદ્ધ ગુનો નોંધ્યો છે. જેમાં દારૂમા કેમિકલ ભેળવી મોત નિપજાવ્યાનો ગુનો દાખલ થયો છે. તમામ આરોપીઓ સામે કલમ 302, 308, 120 મુજબ ફરિયાદ નોંધાઈ છે.