ઈકોનોમીની સ્થિતિ સુધરી / સતત ત્રીજા મહિને ફેબ્રુઆરીમાં જીએસટીની આવક રુ. 1.13 લાખ કરોડને પાર પહોંચી

• નાણામંત્રાલયે ફેબ્રુઆરીની જીએસટી આવકના આંકડા બહાર પાડ્યાં 
• ફેબ્રુઆરી 2021 માં કુલ જીએસટીની આવક રુ. 1,13,143 કરોડ 
• 2021 ના ફેબ્રુઆરીની જીએસટીની આવકમાં 7 ટકાનો વધારો થયો

નાણા મંત્રાલય દ્વારા જારી નિવેદન અનુસાર, ફેબ્રુઆરી 2021 ના મહિનામાં મળેલી કુલ જીએસટીની આવક રુ. 1,13,143 કરોડ હતી. 2020 ના ફેબ્રુઆરીની આવક કરતા 2021 ના ફેબ્રુઆરીની જીએસટીની આવકમાં 7 ટકાનો વધારો થયો છે. 

દેશમાં આર્થિક ગતિવિધિઓમાં સુધારાના વધુ એક સંકેત મળ્યો છે. સતત ત્રીજા મહિને જીએસટી આવક રુ.1.1 લાખ કરોડને પાર પહોંચી છે.

ફેબ્રુઆરીમાં 1.13 લાખ કરોડની આવક
રુ.21,092 કરોડ સીજીએસટી
રુ. 27,273 કરોડ એસજીએસટી
રુ. 55,253 કરોડ આઈજીએસટી
રુ. 24,382ની કરોડ માલસામાનની આયાત
રુ. 9525 કરોડનો સેસ

કુલ જીએસટી આવકમાંથી, રુ. 21,092 સીજીએસટી, રુ. 27,273 કરોડ એસજીએસટી, રુ. 55,253 કરોડ આઈજીએસટી (માલસામાનની આયાત પર મળેલી  રુ. 24,382ની કરોડની આવક સહિત) તથા રુ. 9525 કરોડનો સેસ (માલસામાનની આયાત પર મળેલી કુલ 660 કરોડની આવક) 

નાણા મંત્રાલયના નિવેદન અનુસાર, ગત વર્ષના ફેબ્રુઆરી મહિના દરમિયાન આ સ્ત્રોતમાંથી થયેલી આવક કરતા ચાલુ વર્ષના ફેબ્રુઆરીમાં માલસામાનની આયાત 15 ટકા વધારે અને ઘરેલુ લેવડદેવડની આવકમાં 5 ટકાનો વધારો જોવા મળ્યો હતો. જાન્યુઆરીમાં જીએસટીની આવક ઓલ ટાઈમ હાઈ રુ. 1.19 લાખ કરોડ થઈ હતી. જીએસટીની આવકમાં થઈ રહેલા સતત સુધારા પાછળ આર્થિક રિકવરી અને સરકાર દ્વારા લેવાયેલા આર્થિક પગલાં જવાબદાર હોવાનું માનવામાં આવે છે. 

અર્થતંત્ર માટે ધીમે ધીમે સારા સંકેત 

નોંધનીય છે કે ભારતમાં માર્ચ મહિનાથી ધીમે ધીમે કોરોના વાયરસના કેસ સામે આવવાની શરૂઆત થઇ અને તે બાદ કોરોનાના મોતનો તાંડવ પણ દેશે જોયો. લોકોના જીવ બચાવવા માટે કર્ફ્યું અને લોકડાઉન કરી દેવાની ફરજ પડી જે બાદ ભારતનાં અર્થતંત્રને પણ જોરદાર ફટકો પડ્યો. ભારતમાં ફેબ્રુઆરી મહિનામાં આટલું કલેક્શન થયું હતું અને તે બાદ પહેલીવાર ઓક્ટોબરમાં કલેક્શન એક લાખ કરોડ રૂપિયાને પાર ગયું. હવે ઓક્ટોબર બાદ સતત બીજા મહિનામાં આ આંકડો એક લાખ કરોડ રૂપિયાથી અધિક રહ્યો છે.  જોકે આ કલેક્શન ઓક્ટોબર મહિના કરતા ઓછું છે. 

થોડા સમય પછી GDP સુધરશે તેવો સરકારનો દાવો 

ભારતમાં કોરોના વાયરસના સંકટથી અર્થતંત્રને પાટા પર લાવવા માટે સરકારે વિવિધ તબક્કામાં આત્મનિર્ભર ભારત હેઠળ પેકેજ પણ જાહેર કર્યું છે અને દેશમાં અનલોક કર્યા બાદથી જ સતત પ્રયાસ કરવામાં આવી રહી છે કે અર્થતંત્ર ફરીથી દોડતું થઇ જાય. ભારતની જીડીપી ગ્રોથમાં પણ ખૂબ મોટું ગાબડું પડ્યું છે ત્યારે વિપક્ષ દ્વારા આરોપ લગાવવામાં આવી રહ્યો છે કે દેશમાં હવે મંદી આવી ગઈ છે જ્યારે સરકારનું કહેવું છે કે આવતા વર્ષ સુધી અર્થતંત્ર ફરીથી સારી થઇ જશે.  જોકે છેલ્લા બે મહિનાથી જે ટેક્સ કલેક્શનનો આંકડો આવી રહ્યો છે તેનાથી સરકારને થોડી રાહત જરૂર મળી છે.