સ્વામિનારાયણ સંપ્રદાયના BAPS ઉપર ફરીથી વિવાદના વાદળો ઘેરાયા છે. BAPS સામે અમેરિકાની કોર્ટમાં ફરિયાદ નોંધાઈ છે કે તેઓ ન્યુ જર્સીમાં મોટી સંખ્યામાં ભારતીય કામદારો પાસે વેઠ વૃત્તિ કરાવી રહ્યા છે.
અમેરિકાના ન્યૂજર્સીમાં BAPS મંદિર સાઇટ પર FBIના દરોડા
ભારતથી લવાયેલા શ્રમિકોના શોષણની કોર્ટમાં થઈ હતી ફરિયાદ
ન્યૂજર્સી રાજ્યમાં રોબિન્સવિલે ખાતે નિર્માણાધીન મંદીર મુદ્દે વિવાદ
ફોર્સ્ડ લેબર તરીકે ઓછા પગારે શ્રમિકોને રોકી લીધા
અમેરિકા તેમ જ ઈન્ટરનેશનલ મીડિયામાં છપાયેલા અહેવાલો પ્રમાણે BAPS પર કોર્ટ કેસ એ મામલે કરવામાં આવ્યો છે કે તેમણે વેઠ વૃત્તિ એટલે કે ફોર્સ્ડ લેબર તરીકે ઘણા બધા કારીગરોને મંદિરના નિર્માણની પ્રવૃત્તિ માટે ખૂબ ઓછા પગારે રોકી લીધા છે. તેમની ઉપર આરોપ છે કે તેમણે ભારતથી ઘણા બધા શ્રમિકોને મંદિરના નિર્માણ માટે કામે રાખીને તેમનું શોષણ કર્યું છે. પ્રતિ કલાક 1 ડોલર મજૂરી આપી શોષણ થતો હોવાનો આક્ષેપ કર્યો છે.
મોટાભાગના શ્રમિકો નીચલી જ્ઞાતિના હોવાનું જાણવા મળ્યું છે
આ શારીરિક વેઠ મજૂરીના બદલામાં કલાકના 1 ડોલર જેટલી મામૂલી રકમ આપવામાં આવી રહી છે તેવો આક્ષેપ છે. આ શ્રમિકોમાં મોટા ભાગે નીચી જ્ઞાતિના કારીગરો હોવાનું જાણવા મળ્યું છે. આ કારીગરોને રહેવાની સુવિધા માટે ટ્રેલરમાં રાખવામાં આવ્યા છે અને તેમને દરરોજ 13 કલાક જેટલું વેઠ કામ જેમ કે મોટા પથ્થરો ઉચકવા, ક્રેન ચલાવવી, ખાડા ખોદવા અને બરફ હટાવવો જેવા કામો કરાવવામાં આવે છે. તેમને ખાવામાં પણ પૌષ્ટિક આહાર મળતો નથી એમ જાણવા મળ્યું છે.
R-1 વિઝા ઉપર કામદારો આવ્યા હોવાનો દાવો
આ કારીગરોને R-1 વિઝા એટલે કે ધાર્મિક કામકાજ માટે આપવામાં આવતા વિઝા ઉપર અમેરિકા બોલાવવામાં આવ્યા છે. ફરિયાદમાં એવો આક્ષેપ કરવામાં આવ્યો છે કે તેમને વિઝાની પ્રોસેસ દરમિયાન અન્ય અંગ્રેજીમાં લખેલા ઘણા દસ્તાવેજો ઉપર હસ્તાક્ષર કરાવવામાં આવ્યા હતા અને એવી સૂચના આપવામાં આવી હતી કે અમેરિકાની વિઝા એમ્બેસીના સ્ટાફ સામે પોતાની ઓળખાણ કુશળ શિલ્પકારો અને ચિત્રકારો તરીકે આપવામાં આવે.
સારા પગારના પ્રલોભનની લાલચ આપી હોવાનો દાવો
ભારતમાં આ કામદારોને એવી રીતે લોભાવવામાં આવ્યા હતા કે તેમને ન્યુ જર્સીના રોબિન્સવિલમાં મંદિરના નિર્માણની નોકરી આપવામાં આવશે જેમાં તેમને સારો પગાર અને સારા એવા પ્રમાણમાં રજાઓ પણ આપવામાં આવશે. આ ઘટનામાં અમેરિકાના વેઠ વૃત્તિના કાયદાઓનું ઉલ્લંઘન થતું હોઈ તેની સઘન તપાસ માટે FBI, હોમલેન્ડ સિક્યોરિટી અને ડિપાર્ટમેન્ટ ઓફ લેબર જેવા ખાતાઓ આ બાબતને પોતાના હાથમાં લીધી છે.
આ ફરિયાદમાં એમ પણ કહેવાયું છે કે આ કામદારોના પાસપોર્ટ જપ્ત કરી લેવામાં આવ્યા છે અને તેમને એક જ જગ્યાએ રહેવા માટે મજબૂર કરાયા છે. તેમનો પગાર નાની નાની ભૂલો બદલ પણ કાપી લેવામાં આવે છે.
BAPSનો બચાવ: વધુ માહિતી બહાર આવતા સાબિત કરીશું કે આરોપો પાયાવિહોણા
જો કે આ સામે BAPSએ આ આરોપોને નકારી દીધા છે. તેમણે દાવો કર્યો છે કે આ કારીગરોને ભારતથી વિશિષ્ટ કોતરણી કરેલા પથ્થરોને ગોઠવવાની જવાબદારી સોંપાઈ છે અને આ માટે આ કામદારો કુશળતા ધરાવે છે આ માટે જ તેમને વિઝા અપાયા છે. તેમણે વધુમાં કહ્યું કે આ અંગે વધુ માહિતી બહાર આવતા અમે પુરવાર કરી શકીશું કે આ આરોપો પાયાવિહોણા છે.
90 જેટલા શ્રમિકોનો બચાવ
આ સાથે એવો પણ દાવો કરાયો છે કે FBIની રેડ દરમ્યાન 90 જેટલાં ગોંધી રખાયેલા શ્રમિકોનો છૂટકારો પણ કરાવાયો છે.