અમદાવાદના રખિયાલ વિસ્તારમાં આવેલી શેઠ.સી.એલ સ્કૂલના 2 બોગસ શિક્ષકો સામે ફરિયાદ થઈ છે. પિતાએ જ પુત્રીની બોગસ ડિગ્રી અંગે ખુલાસો કર્યો છે. કોંગ્રેસના આગેવાન અને પૂર્વ સ્ટેન્ડિંગ કમિટીના ચેરમેન કિશનસિંહ તોમરની પુત્રીએ રખિયાલની સી.એલ. હિન્દી સ્કૂલમાં લખનઉ યુનિવર્સિટીના ખોટા સર્ટિફિકેટ રજૂ કરી 57 મહિના નોકરી કરી હોવાનો ભાંડો ફૂટ્યો છે.
પિતાએ દીકરીની બોગસ ડિગ્રી હોવાની નોંધાવી ફરિયાદ.
દીકરીના સાસરીયાઓએ નકલી ડિગ્રી બનાવી હોવાનો આરોપ.
શેઠ સી.એલ હિન્દી હાઈસ્કૂલમાં બોગસ શિક્ષકોએ મેળવી હતી નોકરી.
લખનઉ યુનિવર્સિટીનું ડમી સર્ટિફિકેટ મેળવી મેળવી હતી નોકરી.
ગોમતીપુર પોલીસે ગુનો નોંધી તપાસ હાથ ધરી.
મળતી માહિતી મુજબ લખનઉ યુનિવર્સિટીનું ડમી સર્ટિફિકેટ મેળવીને માધુરી તોમર અને વિજય કલહંસે શેઠ.સી.એલ સ્કૂલમાં હંગામી નોકરી મેળવી હતી. શિક્ષક સહાયક તરીકે નોકરી મેળવીને સરકાર સાથે છેતરપિંડી કરી છે. 2014થી આ શિક્ષકોએ નોકરીની શરૂઆત કરી હતી. એક મહિનાના 10 હજાર લેખે અત્યાર સુધી 5 લાખ 70 હજાર રૂપિયાની છેતરપિંડી કરી છે. ગોમતીપુર પોલીસે બન્ને બોગસ શિક્ષકો સામે ગુનો નોંધી વધુ તપાસ હાથ ધરી છે.
કિશનસિંહ તોમરનું નિવેદન:
આ મામલે કિશનસિંહ તોમરે જણાવ્યું કે, મારી દીકરીના 2003માં દિલ્લીમાં લગ્ન થયા હતા. 2013માં તેઓ ડિગ્રી લઈને નોકરી મેળવવા માટે આવ્યા અને નોકરીએ રાખ્યા પછી સ્કૂલમાં માધુરીની દાદાગીરી શરૂ થઈ હતી, પ્રિન્સીપાલે માધુરીને નિયમ પ્રમાણે નોટિસ પણ આપી હતી. 2018માં માધુરીને સ્કૂલમાંથી ફરજ મુક્ત કરાઈ અને લખનૌ યુનિવર્સિટીમાં તેમની ડિગ્રી વિશે તપાસ કરી હતી. યુનિવર્સિટીમાં તપાસ કરતા માધુરીની ડિગ્રી બોગસ નિકળી હતી. જેમાં શ્વેતા સિંહ નામની યુવતીની ડિગ્રીમાં માધુરીનું નામ બતાવાયું, જેથી ખોટી ડિગ્રી સાબિત થતા પોલીસ સ્ટેશનમાં ફરિયાદ કરી હતી.
માધુરી તોમરનું નિવેદન:
તો આ મામલે માધુરી તોમરે કહ્યું કે, આ બોગસ ડિગ્રીની વાત ખોટી છે. 5 વર્ષ પહેલા DEOની મંજૂરીથી મારી ભરતી કરાઇ હતી, આ ડિગ્રી મને લગ્ન પહેલાની મળેલી છે. આ મામલે મારા પતિને કોઈ લેવા દેવા નથી અને મારી સામે પણ ખોટી ફરિયાદ કરવામાં આવી છે. મારા પર અમદાવાદ છોડવા માટે દબાણ કરી રહ્યાં છે. મને કાયમી કરવામાં જ નથી આવી. મારા પિતા પાસે તેમનું પોતાનું કંઇ નથી, તેમને લોકો પાસેથી બધુ પડાવેલું છે અને મારા પિતાનું એક શિક્ષિકા સાથે અફેર પણ છે. સ્કૂલના ટ્રસ્ટમાં ક્યારેય ચૂંટણી નથી થતી મે ચૂંટણીની માગ કરી એટલે આવા આક્ષેપ કરે છે.