સુરેન્દ્રનગર / નવાગામ નજીક ટેમ્પોમાં ગેસ સિલિન્ડર બ્લાસ્ટ થતા પિતા-પુત્રના ઘટનાસ્થળે મૃત્યુ, તંત્ર દોડતું થયું

• સાયલાના નવાગામ નજીક વાહનમાં વિસ્ફોટની ઘટના
• છોટાહાથી ટેમ્પોમાં વિસ્ફોટ થતા પિતા-પુત્રના ઘટનાસ્થળે મોત
• છોટા હાથી ટેમ્પોમાં ગેસ સિલિન્ડરમાં થયો હતો વિસ્ફોટ

સુરેન્દ્રનગર જિલ્લાના સાયલાના નવાગામ નજીક વાહનમાં વિસ્ફોટની દુર્ઘટના સામે આવી છે. છોટાહાથી ટેમ્પોમાં વિસ્ફોટ થતા પિતા-પુત્રના ઘટનાસ્થળે જ કમકમાટીભર્યા મોત નિપજ્યાં હતા. ટેમ્પોમાં સવાર પિતા-પુત્રના મૃત્યુને સ્થાનિક પોલીસ કાફલો ઘટના સ્થળે દોડી ગયો હતો અને આ ઘટના પાછળનું કારણ જાણવા તપાસ હાથ ધરી છે.

પિતા- પુત્રના મોતથી હાહાકાર
આ ઘટનાની જાણવા મળતી વિગત અનુસાર સાયલા તાલુકાના નવાગામ નજીક એકાએક છોટા હાથી ટેમ્પામાં ગેસનો બાટલો ફાટ્યો હતો આ ઘટના બાદ ભારે બ્લાસ્ટ થતાં વીછીયાના ચીરોડા ગામના લાલજી મોતીભાઇ ખોરાણી અને તેનો પુત્ર અમિત લાલજી ખોરાણી આગમાં હોમાઈ ગયા હતા. જે અંગેના વાવડ વહેતા થતાં પરિવારજનોમાં કાળો કલ્પાત ફેલાયો છે. 

સાયલા પોલીસ અને મામલતદાર સહીતનો કાફલો ઘટનાસ્થળે 
આ અંગેની જાણ થતા ઘટનાસ્થળે સાયલા પોલીસ અને મામલતદાર સહીતનો કાફલો તાકીદે ઘટનાસ્થળે પહોચ્યો હતો. બીજી બાજુ સ્થાનીક લોકોના ટોળેટોળા પણ એકઠા થઇ ગયા હતા.  પોલસે મૃતક પિતા-પુત્ર મૃતદેહને પીએમ અર્થે સરકારી હોસ્પિટલ ખાતે ખસેડવા સહીતની કાર્યવાહી હાથ ધરી છે.