અહેવાલ / FASTag ઇફેક્ટ : નેશનલ હાઇવે ની આવક આટલી વધી પરંતુ સાથે સાથે ટોલ ગેટ ઉપર...

• નેશનલ હાઈવેની ટોલ ટેક્સની આવકમાં 15%નો ઉછાળો
• સરેરાશ વેઈટિંગ ટાઇમમાં 2 મિનિટનો વધારો

સૂત્રોના મતે નેશનલ હાઇવે ઓથોરીટી ઓફ ઇન્ડિયાની દૈનિક આવક જુલાઈ ઓગસ્ટમાં સરેરાશ 65 થી 68 કરોડ રૂપિયા હતી. આ આવક વધીને 80 કરોડ થઇ ગઈ છે. આ આવકના આંકડા હજુ વધવાની સંભાવના છે. 

ટ્રાફિક જામ વધ્યો

જો કે સત્તાધિશોએ સ્વીકાર્યું છે કે કુલ 530 ટોલ પ્લાઝામાંથી 40 થી 45 ટોલ પ્લાઝામાં FASTag ના કારણે ટ્રાફિક જામ સર્જાયો હતો. 488 ટોલ પ્લાઝાનો લાઈવ ટ્રાફિક ટ્રેક કરતી એક IT કંપનીએ દાવો કર્યો હતો કે સરેરાશ વેઇટિંગ ટાઈમ રવિવારે 12 મિનિટ હતો. એક વર્ષ અગાઉ આ સમય 10.04 મિનિટ હતો અને એક મહિના અગાઉ આ સમય 10.57 મિનિટ હતો. 

FASTag વગરના ગાડીવાળા FASTagની લાઈનમાં આવી જાય છે 

કેટલાક મુસાફરોએ જણાવ્યું હતું કે ઘણા FASTag વગરના ગાડીવાળા FASTagની લાઈનમાં આવી ગયા હતા જયારે કેટલાક મુસાફરો દંડ ભરવાનો ઇન્કાર કરી રહ્યા હતા જેના પગલે લાઈન વધુને વધુ લાંબી થઇ રહી હતી. એક અધિકારીએ પણ સ્વીકાર્યું હતું કે હજુ FASTagમાં ટેક્નિકલ સમસ્યાઓ આવી રહી છે.

FASTag વાહનો પાસે FASTag હોવા છતાં FASTag વગરના વાહનો અથવા ઓછા બેલેન્સ વાળા FASTag વાહનોના કારણે તેમને વિલંબ થાય છે. આ માટે હવે FASTag વગરના વાહનો પાસે બમણો ટોલ ઉઘરાવવાની યોજના ચર્ચાઈ રહી છે.  

આ સામે હાઇવે મંત્રાલયના અધિકારીઓએ 245 ટોલ પ્લાઝા ઉપર ટ્રાફિકની પરિસ્થિતિને નોર્મલ ગણાવી હતી.  બીજા 242 ટોલ પ્લાઝા ઉપર 25% લેન્સમાં કેશ ટ્રાન્સેક્શન્સ થાય છે ત્યાં પણ પરિસ્થિતિ સામાન્ય છે. પરંતુ 40-42 ટોલ પ્લાઝા ઉપર ટ્રાફિક સમસ્યા ગંભીર હોવાનું સામે આવ્યું છે.