માવઠાની મોકાણ / ખેડૂતો પર છવાયા ચિંતાના વાદળ, અહીં કમોસમી વરસાદથી ઉનાળુ પાકમાં મોટું નુકસાન થવાની શક્યતા

• સૌરાષ્ટ્રના અનેક વિસ્તારોમાં વાદળછાયું વાતાવરણ
• કમોસમી વરસાદ થવાથી ઉનાળુ પાકને થઇ શકે નુકસાન 
• મગ, તલ, સહિતના પાકને મોટા પ્રમાણમાં નુકસાનની સંભાવના

સૌરાષ્ટ્રમાં આજે વહેલી સવારથી વાદળછાયું વાતાવરણ સર્જાયું છે. જેને લઈ જગતના તાત ભારે ચિંતામાં જોવા મળી રહ્યા છે. એક તરફ ખાતર-બિયારણના ભાવની કંટાળેલા ખેડૂતને હવે જો કૃષિપાક ફળે તો કઈક થાય. જોકે વહેલી સવારથી વાતાવરણમાં પલટો આવતા હવે કૃષિપાકોને નુકશાનની ભીતિ સર્જાઇ છે. 

રાજકોટ સહિત સૌરાષ્ટ્રના અનેક વિસ્તારમાં આજે સવારથી વાદળછાયું વાતાવરણ સર્જાયું છે. ખેડૂતોને કમોસમી વરસાદને લઇ મગ, તલ, કેરી સહિતના પાકને મોટા પ્રમાણમાં નુકસાન થવાની ભીતિ છે. નોંધનીય છે કે, સૌરાષ્ટ્રમાં આ વર્ષે ઉનાળુ તલનું મોટા પ્રમાણમાં વાવેતર કરવામાં આવ્યું છે. પરંતુ છેલ્લા ત્રણ વર્ષથી દર વર્ષ કમોસમી વરસાદથી ખેડૂતો પરેશાન બન્યા છે. 

સૂત્રોએ જણાવ્યું હતું કે, સૌરાષ્ટ્રમાં વહેલી સવારથી વાદળછાયું વાતાવરણ સર્જાયા બાડ કદાચ વરસાદ પડી શકે છે. જો હવે વરસાદ આવે તો ખેડૂતો માંડ તૈયાર થવાને આરે આવેલો પાકને મોટું નુકશાન પહોંચી શકે છે. આ વર્ષે સૌરાષ્ટ્રમાં મોટા પ્રમાણમાં ઉનાળુ તલનું વાવેતર કરવામાં આવ્યું છે. જેથી કમોસમી વરસાદ થવાથી પાક નિષ્ફળ જવાની સંભાવના સેવાઈ રહી છે.