કમોસમી વરસાદ / આગામી 24 કલાક ગાજવીજ સાથે વરસાદની આગાહી: ગુજરાતનાં આ 4 જિલ્લાઓમાં 'ઍલર્ટ'

• ફરી કમોસમી વરસાદની આગાહી
• દક્ષિણ ગુજરાતમાં વરસાદની આગાહી
• વાવાઝોડા સાથે વરસાદની શક્યતા

એક તરફ રાજ્યમાં કમોસમી વરસાદને કારણે ખેડૂતોના રવિપાકને મોટા પ્રમાણમાં નુકસાન થયું છે. જેથી ખેડૂતોએ સરકાર સમક્ષ નુકસાની સામે યોગ્ય વળતર ચૂકવવાની માંગ કરી છે. તો બીજી તરફ હવામાન વિભાગે ફરી કમોસમી વરસાદની આગાહી કરી છે. હવામાન વિભાગ દ્વારા આગામી 24 કલાકમાં દક્ષિણ ગુજરાતમાં વાવાઝોડા સાથે કમોસમી વરસાદની આગાહી કરવામાં આવી છે. 

આ વિસ્તારમાં પડી શકે છે કમોસમી વરસાદ
હવામાન વિભાગના અમદાવાદ કેન્દ્રના ડિરેક્ટર ડૉ. મનોરમા મોહંતીએ જણાવ્યું કે, થંડરસ્ટ્રોમ એક્ટિવિટી સક્રિય હોવાને કારણે ગુજરાતમાં વરસાદી માહોલ રહેશે. આગામી 24 કલાકમાં દક્ષિણ ગુજરાતમાં કમોસમી વરસાદ પડી શકે છે. આગામી 24 કલાકમાં વાવાઝોડા સાથે સુરત, નવસારી, ડાંગ, તાપીમાં કમોસમી વરસાદની આગાહી છે. હવામાન વિભાગે ભરઉનાળે ફરી માવઠાને લઈને આગાહી કરતા જગતનો તાત ચિંતામાં મુકાયો છે.

40 કિમીની ઝડપે ફૂંકાશે પવન 
તેમણે જણાવ્યું કે, આગામી 24 કલાક દક્ષિણ ગુજરાતમાં કમોસમી વરસાદની સાથે 40 કિમીની ઝડપે પવન પણ ફૂંકાશે. વીજળીના કાડાકા અને પવન સાથે વરસાદ વરસવાનો હોવાથી હવામાન  વિભાગે સાવચેતી રાખવા માટે કેટલાક સૂચનો પણ આઆપ્યા છે. 

આવતીકાલથી વરસાદની શક્યતા નહીંવતઃ મનોરમા મોહંતી
તેમણે રાહતના સમાચાર આપતા કહ્યું કે, આવતીકાલથી હવામાન મોટાભાગે સૂકું રહેવાની સંભાવના છે. આવતીકાલથી વરસાદની શક્યતા નહીંવત છે. 24 કલાક બાદ તાપમાનમાં ઘટાડો થવાની આગાહી હવામાન વિભાગ દ્વારા વ્યક્ત કરવામાં આવી છે. 

'ચાર દિવસ વાતાવરણ સૂકું રહેશે'
હવામાન વિભાગ અનુસાર, આગામી ચાર દિવસ રાજ્યમાં તાપમાનમાં વધઘટ જોવા મળી શકે છે. ચાર દિવસ વાતાવરણ સૂકું રહેશે. આગામી બે દિવસ તાપમાનમાં કોઈ ફેરફાર નહીં થાય. જ્યારે બે દિવસ બાદ એક ડિગ્રી તાપમાન ઘટશે. બે દિવસ સૌરાષ્ટ્રના સુરેન્દ્રનગર, રાજકોટ, અમરેલીમાં એક ડિગ્રી તાપમાન વધવાની શક્યતા છે. ઉત્તરી દિશાથી સૂકા પવન ફૂંકાવાને લઈને તાપમાનમાં વધારો થશે તો બીજી તરફ રાહત આપનારા સમાચારમાં હાલ એલર્ટની કોઈ આગાહી નથી. 

અમદાવાદમાં વધશે ગરમી
અત્રે ઉલ્લેખનીય છે કે, ગઈકાલે અમદાવાદમાં 40.08 ડિગ્રી તાપમાન નોંધાયું હતું. જ્યારે રાજકોટમાં 41.03, જૂનાગઢમાં 41.02, ગાંધીનગરમાં 41, ભુજમમાં 41, વડોદરામાં 40.02. ડાંગમાં 40.06 ડિગ્રી તાપમાન નોંધાયું હતું. હજુ પણ અમદાવાદમાં ગરમી વધે તેવી આગાહી કરવામાં આવી છે.