બોલિવૂડ / પટિયાલામાં ખેડૂતોએ રોક્યુ જ્હાન્વી કપૂરની ફિલ્મનું શૂટિંગ, જ્હાન્વી વાપસ જાઓનાં નારા લગાવ્યા

• જ્હાન્વી કપૂર વાપસ જાઓનાં નારા બાદ તે હોટલમાં પરત ફરી
• શૂટિંગ સ્થળ પર આંદોલનનાં સમર્થકોએ ધમાલ કરી
• શૂટિંગ યુનિટની સુરક્ષા માટે વહિવટી તંત્ર સતર્ક બન્યુ
•  

ફિલ્મ ગુડ લક જેરીનું શૂટિંગ અટક્યું
પટિયાલામાં ફિલ્મ ગુડ લક જેરીની શૂટિંગ કરી રહેલ એક્ટ્રેસ જ્હાન્વી અને ફિલ્મની પૂરી ટીમને શનિવારે ખેડૂત આંદોલનનો સામનો કરવો પડ્યો હતો. આંદોલન કરી રહેલા ખેડૂતોએ આ શૂટિંગનો જબરજસ્ત વિરોધ કર્યો હતો. જેનાં લીધે ફિલ્મ પ્રોડક્શન હાઉસને ત્વરિત આ ફિલ્મનું શૂટિંગ રોકવા પર મજબૂર થવું પડ્યું હતું.

પોલીસે ઘટના સ્થળે પહોંચી સ્થિતિ સંભાળી
આંદોલન કરી રહેલા ખેડૂતોએ ફિલ્મની શૂટિંગને લઈને ખૂબ નારાજગી વ્યક્ત કરી હતી અને શૂટિંગને બંધ કરવાની માંગ કરી હતી. એટલું જ નહીં દરેક ખેડૂતોએ ભેગા થઈને શૂટિંગની જગ્યા પર ધમાલ કરી દીધી હતી અને જ્હાનવી કપૂર વાપસ જાઓનાં નારા પણ લગાવ્યા હતા. પરિસ્થિતિ વધારે વણસતા જ્હાન્વી કપૂર અને ફિલ્મની પૂરી યુનિટને હોટલમાં પરત ફરવુ પડ્યું હતું. બીજી તરફ આ ઘટનાની જાણ થતા સ્થાનિક પોલીસની એક ટીમ ઘટના સ્થળે પહોંચી ગઈ હતી અને સ્થિતિને સંભાળી લીધી હતી.

ઘણાં સમયથી પટિયાલાનાં વિવિધ સ્થળો પર થઈ રહ્યું હતું શૂટિંગ
ઉલ્લેખનીય છે કે, જ્હન્વીની ફિલ્મ ગુડ લક જેરી સાઉથની ફિલ્મ કોલામવુ કેકિલાની રિમેક છે. જેમાં જ્હાન્વી એક સાધારણ છોકરીનું પાત્ર નીભાવી રહી છે. છેલ્લા ઘણાં સમયથી આ ફિલ્મનું શૂટિંગ પટિયાલાનાં અમુક વિસ્તારોમાં થઈ રહ્યું હતું. એક માહિતી અનુસાર ફિલ્મની શૂટિંગ માટે વધુ એક યુનિટ થોડા દિવસોમાં પટિયાલા પહોંચવાનું છે. જેમની સુરક્ષાને ધ્યાનમાં રાખીને પ્રશાસન પણ તેનાં પર બાજ નજર રાખી રહ્યું છે. જે અર્થે મોડી રાત્રે જિલ્લા પોલીસે વહિવટી તંત્ર સાથે અન્ય અધિકારીઓ સાથે એક મિટિંગ પણ કરી હતી. પણ ખેડૂતોને રોકવા માટે સોમવારે એક મીટિંગ કરવામાં આવશે. આ ફિલ્મ ઉપરાંત અન્ય બે બોલિવૂ઼ડની ફિલ્મોની ટીમ પણ પંજાબમાં શૂટિંગ કરવાની યોજના બનાવી રહ્યું છે.