આંદોલન અપડેટ / દિલ્હીમાં કડકડતી ઠંડીની વચ્ચે કરા સાથે વરસાદ, ખેડૂતોએ સરકાર સામે અપનાવી નવી રણનીતિ

• આવતીકાલે દિલ્હીની સરહદો પર થશે ટ્રેક્ટર માર્ચ 
• ખેડૂતોએ કહ્યું આ તો 26મીએ જે પરેડ થશે તેનું ટ્રેલર હશે 
• આજે દિલ્હીમાં કડકડતી ઠંડીમાં કરા સાથે પડ્યો વરસાદ 
• ખેડૂતોની નવી રણનીતિ : સંવાદ પહેલા પ્રદર્શન 

અડગ છે આંદોલન : 

આજે ખેડૂતોના આંદોલનનો 41મો દિવસ છે ત્યારે ખેડૂતોએ પોતાની માંગ માટે નવી રણનીતિ અપનાવી છે. આઠમી જાન્યુઆરીના રોજ સરકાર અને ખેડૂતો વચ્ચે ચર્ચા થવાની છે પણ તે પહેલા આવતીકાલે ખેડૂતો મોટું પ્રદર્શન કરવા જઇ રહયા છે. જો 8 જાન્યુઆરીએ સમાધાન ન આવે તો 9મી કૃષિ કાયદાઇ કોપીને બાળવામાં આવશે. અને હરિયાણામાં ખેડૂતો ઘરેઘરે જઈને સંપર્ક ચાલુ કરી દેશે તથા 26મીએ ખેડૂતો દ્વારા ટ્રેક્ટર પરેડ કરવામાં આવશે. 

સુરક્ષા વધારવામાં આવી : 

ખેડૂતોની આક્રમકતાને ધ્યાનમાં રાખીને  સરકાર પણ અલર્ટ થઈ ગઈ છે અને સિંઘુ બોર્ડર પર જવાનોની તૈનાતી કરી દેવામાં આવી છે. 

દિલ્હીમાં ઠંડીમાં વધારો : 

ટીકરી બોર્ડર પર કૃષિ કાયદાના વિરોધમાં આજે પણ આંદોલન ચાલુ છે અને પ્રદર્શન સ્થળ પર લંગર વહેંચવામાં આવી રહ્યું છે. બીજી તરફ દિલ્હીમાં આજે પણ વરસાદ પડ્યો હતો અને અધૂરામાં પૂરું કરા પણ પડ્યા હતા. દિલ્હીમાં પહેલેથી જ કડકડતી ઠંડી પડી રહી છે ત્યારે વરસાદના કારણે ખેડૂતોની સમસ્યામાં વધારો થયો છે. 

શિવસેનાએ સરકાર પર સાધ્યું નિશાન : 

ખેડૂતોના આંદોલન મુદ્દે શિવસેનાએ કેન્દ્ર સરકાર પર નિશાન સાધ્યું છે. શિવસેનાએ સામનામાં લખ્યું કે દિલ્હીની સરહદ પર કેન્દ્રના કાયદાના વિરોધમાં 50થી વધારે ખેડૂતોએ પોતાના જીવ ગુમાવ્યા છે. સરકારની નજરમાં આ બલિદાનની કોઇ કિંમત નથી. સરકારમાં જો માનવતા હોત તો કૃષિ કાયદા તાત્કાલિક રૂપે સ્થગિત કરી દેવામાં આવ્યા હોત.