આંદોલન / રેલ રોકો અભિયાન : ગુજરાતના આ રેલવે સ્ટેશન પર ખેડૂતો દ્વારા પ્રદર્શન, પોલીસે અટકાવ્યા

• કૃષિ બિલના વિરોધમાં આંદોલન
• ધાનેરા રેલવે સ્ટેશન પર રોકી ટ્રેન
• ખેડૂત આગોવાનોને અટકાવ્યા
• સરકાર વિરુદ્ધ સૂત્રોચ્ચાર

ધાનેરા રેલવે સ્ટેશન પર રાષ્ટ્રીય કિસાન સંગઠનનું આંદોલન

દેશમાં આજે ખેડૂતો દ્વારા કૃષિ કાયદાના વિરોધમાં રેલ રોકો અણદોલનનું આહવાહન કરવામાં આવ્યું છે ત્યારે ગુજરાતમાં પણ તેની અસર જોવા મળી હતી. ગુજરાતના ધાનેરા રેલવે સ્ટેશન પર રાષ્ટ્રીય કિસાન સંગઠન દ્વારા વિરોધ કરવામાં આવ્યો હતો. ખેડૂતો આગેવાનોએ અહિયાં સરકાર સામે સૂત્રોચ્ચાર કર્યા હતા.  

ટ્રેન રોકવા પહોંચેલા ખેડૂતોને રેલવે પોલીસે અટકાવ્યા

જોકે ખેડૂતોના આંદોલનને જોતાં પોલીસ પણ અલર્ટ હતી અને ટ્રેન રોકવા પહોંચેલા ખેડૂતોને રેલવે પોલીસે અટકાવી દીધા હતા. આગેવાનો રેલવે સ્ટેશનમાં આવી જતાં પોલીસ કાફલો આવી પહોંચ્યો હતો અને નેતાઓને અટકાવવામાં આવ્યા હતા. 

પંજાબ અને હરિયાણામાં ખેડૂતોએ અટકાવી ટ્રેન

કેન્દ્ર સરકારના નવા કૃષિ કાયદાના વિરોધમાં આજે ખેડૂતો રેલ રોકો આંદોલન કરી રહ્યા છે ત્યારે દેશના વિવિધ શહેરોમાં તેની અસર જોવા મળી હતી. ખેડૂતોનું રેલ રોકો અભિયાનની અસર દેશભરમાં અલગ અલગ જગ્યાઓ પર દેખાઈ રહી છે. અંબાલામાં સેંકડોની સંખ્યામાં ખેડૂતો ટ્રેક પર બેસી ગયા છે, જ્યારે દિલ્હીની આસપાસ પણ ખેડૂતોએ ટ્રેક પર કબજો જમાવ્યો છે અને રેલ રોકવાની તૈયારીઓ કરી છે.

ખેડૂતની આરપારની લડાઈ 

ગાઝીપુર બોર્ડરની પાસે મોદીનગર રેલ્વે સ્ટેશન પર પણ ખેડૂતોનો જમાવડો જોવા મળ્યો છે. અલગ અલગ રેલ્વે ટ્રેક પર પોલીસે પણ કાફલો વધાર્યો છે અને સુરક્ષાની વ્યવસ્થા કરી છે. નાંગલોઈ રેલ્વે સ્ટશન પર ખેડૂતોએ રેલ રોકોનું અભિયાન શરૂ કર્યુ હતું જ્યાં તેમણે 4 કલાક સુધી રેલ રોકવાની જાહેરાત કરી છે. બીજી બાજુ ખેડૂતોના રેલ રોકો અભિયાનના પગલે દિલ્હીમાં અમુક જગ્યાઓએ મેટ્રો સ્ટેશન બંધ કરવામાં આવ્યાં છે. દિલ્હી મેટ્રોની ટિકરી બોર્ડર, પંડિત શ્રી રામ શર્મા, બહાદુરગઢ, બ્રિગેડિયર હોશિયાર સિંહ મેટ્રો સ્ટેશનના એન્ટ્રી અને એગ્ઝિટ ગેટ બંધ કરી દેવાયા છે.

બિહારમાં પણ અભિયાનની અસર

આ બાજુ બિહારમાં પણ જન અધિકાર પાર્ટીના કાર્યકરોએ રેલ રોકો અભિયાન હેઠળ પટના જંક્શન પર ટ્રેક પર પોતાના વિરોધ પ્રદર્શન કર્યા હતા. દિલ્હીનું ખેડૂતોનું રેલ રોકો અભિયાન જમ્મુ-કાશ્મીર સુધી પહોંચ્યું હતું. યુનાઈટેડ કિસાન ફ્રન્ટે જમ્મુના ચન્ની હિમત વિસ્તારમાં પ્રદર્શન કર્યુ હતું.