વિરોધ / ખેડૂતો આંદોલનને વધારે ઉગ્ર બનાવવાની તૈયારીઓમાં, જણાવ્યો 27 ડિસેમ્બર સુધીનો પ્લાન

• ખેડૂત આંદોલન બન્યું વધારે ઉગ્ર
• સરકારે ખેડૂતો સાથે વાતચીત માટે મોકલ્યો પત્ર
• 27 ડિસેમ્બર સુધી ખેડૂત આંદોલનનો આવો છે પ્લાન

છેલ્લા 26 દિવસથી ખેડૂતો સિંધુ બોર્ડર, દિલ્હી અને હરિયાણાની સીમાઓ પર આંદોલન કરી રહ્યા છે. તેમ છતાં તેનો હજુ સુધી કોઈ રસ્તો નીકળ્યો નથી. કેન્દ્ર અને અન્નદાતાઓ પોતાની જગ્યાએ કાયમ છે. સોમવારે એટલે કે આજે ખેડૂતોએ 24 કલાકની ભૂખ હડતાળ કરી છે અને આંદોલનને વધારે ઉગ્ર બનાવ્યું છે. રોજ 11 ખેડૂતો 24 કલાકની ભૂખ હડતાળ કરશે તેમ જણાવાયું છે. 

સરકાર અમારી માંગ નહીં માને તો અમે તેમને મનાવીશુ

ખેડૂતોનું કહેવું છે કે અમે રોજ આ રીતે ભૂખ હડતાળ કરીશું અને સરકાર અમારી વાત નહીં માને તો અમે તેમને માનવા મજબૂર કરીશું. એટલું નહીં 23 ડિસેમ્બરે પ્રદર્શનકારીએ  કિસાન દિવસ મનાવવાનું નક્કી કર્યું છે. જેમાં લોકોને અપીલ કરાશે કે તે દિવસે ખાવાનું ન બનાવો. સાથે ભોજન પણ ન કરો અને ખેડૂતોના આંદોલનને યાદ કરો. હરિયાણામાં 25-27 ડિસેમ્બર સુધી ટોલ ફ્રી કરાશે. આ જાહેરાત રવિવારે કરી દેવામાં આવી હતી.

સરકારે ખેડૂતોને મોકલેલા પત્રમાં કહેવાઈ છે આ વાત

આ સમયે સરકારની તરફથી આંદોલન કારી ખેડૂતોને એક પત્ર મોકલવામાં આવ્યો છે અને વાતચીતનું આમંત્રણ આપવામાં આવ્યું છે. આ પત્રમાં કેન્દ્રની તરફથી ખેડૂત નેતાઓની બેઠકની તારીખને લઈને સૂચનો માંગવામાં આવ્યા છે. પત્રના આધારે સરકાર ખેડૂતોની સમસ્યા સાંભળવા તૈયાર છે. મંત્રાલયના આધારે સંયુક્ત સચિવ વિવેક અગ્રવાલે 40 ખેડૂત સંગઠનોને પત્ર લખ્યો છે. કહ્યું છે કે કેન્દ્ર ખેડૂતોની દરેક ચિંતાનું સમાધાન લાવવા શક્ય તમામ પ્રયાસો કરી રહી છે. 

કેન્દ્રીય મંત્રી નરેન્દ્ર સિંહ તોમર 1 કે 2 દિવસમાં ખેડૂતો સાથે કરશે વાતઃ શાહ

આ પત્ર એવા સમયે લખાયો છે જ્યારે કેન્દ્રીય ગૃહ મંત્રી અમિત શાહે કોલકત્તામાં કહ્યું કે કેન્દ્રીય મંત્રી નરેન્દ્ર સિંહ તોમર 1 કે 2 દિવસમાં પ્રદર્શન કારીઓના સમૂહ સાથે માંગ પર વાતચીત કરી શકે છે.

 નવા કૃષિ કાયદાને પરત લેવાની માંગને લઈને દિલ્હીની સીમાઓ પર હજારો ખેડૂતો આંદોલન કરી રહ્યા છે. આ પહેલાં પણ તેમની સરકાર સાથે 5 વખત વાતચીત થઈ છે પણ કોઈ નિષ્કર્ષ આવ્યો નથી.