અસંતોષ / સરકાર કોઈ સ્કીમ લાવે તો વધુ ભાવ મળે : શેરડીના ટેકાના ભાવથી દ.ગુજરાતના ખેડૂતો નારાજ

• કેન્દ્ર સરકારે શેરડીના ટેકાના ભાવ જાહેર કર્યા
• ટેકાના ભાવ સામે દક્ષિણ ગુજરાતના ખેડૂતોની નારાજગી
• દક્ષિણ ગુજરાતની સુગર ફેક્ટરીઓ વધુ ભાવ ખેડૂતોને ચૂકવે છેઃ ખેડૂતો

કેન્દ્ર સરકાર દ્વારા શેરડીના ટેકાના ભાવ જાહેર કરવામાં આવ્યા પરંતુ આ ભાવને લઇને ગુજરાતના ખેડૂતોમાં નારાજગી જોવા મળી રહી છે.  ટેકાના ભાવ સામે દક્ષિણ ગુજરાતના ખેડૂતો નારાજ થયા.  ખેડૂતોનું કહેવુ છે કે  દક્ષિણ ગુજરાતની સુગર ફેક્ટરીઓ આના કરતા વધારે ભાવ ચૂકવે છે. સરકાર કોઇ સ્કીમ લાવે તો ખેડૂતોને વધુ ભાવ મળી શકે તેમ છે.  સરકારની જાહેરાતથી દ.ગુજરાતના ખેડૂતોને કોઇ ફાયદો નથી. ખેડૂતો ખર્ચ સામે ટેકાના ભાવને નગણ્ય ગણી રહ્યા છે. વીટીવી ન્યૂઝ દ્વારા દ. ગુજરાતના ખેડૂતો સાથે વાત કરતા જણાવ્યું કે આટલા ભાવથી પોસાતુ નથી. ટેકાના ભાવ 4000 હોવા જોઇએ. જો સરકાર ખાંડના ભાવ વધારે તો ખેડૂતોને ફાયદો થાય એમ છે. 

કેન્દ્ર સરકારે પ્રતિ ક્વિન્ટલ શેરડીના ટેકાના ભાવમાં કર્યો છે વધારો

મહત્વનું છે કે કેન્દ્ર સરકારે શેરડીના ટેકાના ભાવમાં પ્રતિ ક્વિન્ટલ 15 રૂપિયાનો વધારો કરીને 305 રૂપિયા કરવામાં આવ્યા છે. જે ઓક્ટોબરથી શરૂ થતા માર્કેટિંગ વર્ષ 2022-23 માટે અમલી બનશે.ખાંડની મિલો પાસેથી ખેડૂતોને એક ક્વિન્ટલ શેરડી માટે ઓછામાં ઓછા 305 રૂપિયા મળશે. કેન્દ્ર સરકારના આ નિર્ણયથી દેશમાં શેરડીના પાંચ કરોડ ખેડૂતો, તેમના આશ્ચિતો, ખાંડની મિલો અને તેનાથી સંબધિત પ્રવૃત્તિઓ સાથે સંકળાયેલા પાંચ લાખ શ્રમિકોને  ફાયદો થવાનું અનુમાન છે. પહેલા શેરડીના ભાવ 290 પ્રતિ ક્વિન્ટલ હતા.જે હવે વધીને 305 કરવામાં આવ્યા છે.આઠ વર્ષમાં પહેલીવાર 34 ટકાનો વધારો શેરડીના ભાવમાં કરવામાં આવ્યો છે પરંતુ દ. ગુજરાતના ખેડૂતોએ શેરડીના ટેકાના આ ભાવથી સંતોષ જણાયા નહીં. 

3500 રૂપિયા આપે તો પણ ઓછા પડે- ખેડૂત 

ઉલ્લેખનીય છે કે પીએમ મોદીના નેતૃત્વવાળી આર્થિક બાબતોની કેબિનેટ કમિટીએ માર્કેટીંગ વર્ષ ઑક્ટોબર-સપ્ટેમ્બર 2022-23 માટે શેરડીનો ટેકાનો ભાવ 305 રૂપિયા કરવાના નિર્ણયને મંજૂરી આપી છે.  મહત્વનું છે કે  માર્કેટિંગ વર્ષ 2022-23 માટે એક ક્વિન્ટલ શેરડીનો ઉત્પાદન ખર્ચ 162 રૂપિયા નક્કી કરવામાં આવ્યો છે. જેથી હવે 305 રૂપિયાનો ભાવ મળતા ખેડૂતોને 142 રૂપિયાનો ફાયદો થશે. ખેડૂતોને પડતર કિંમત પર 88 ટકાનો નફો થશે. પરંતુ દ. ગુજરાતના ખેડૂતો જણાવી રહ્યા છે કે બિયારણ, વીજળી, પાણી આ બધા પાછળ જ ખર્ચ એટલો થઇ જાય છે 3500 રૂપિયા ટેકાનો ભાવ આપે તો પણ ઓછા પડે.