રાજકોટ જિલ્લાના જેતપુરમાં પેટ્રોલ અને ડીઝલના ભાવમાં વધારો આવતા ખેડૂતો ટ્રેકટર-રોટાવેટર મશીનો બંધ કરીને બળદ ગાડાંથી ખેતી શરૂ કરી રહ્યા છે
જેતપુરમાં ડીઝલના ભાવ વધતા ખેડૂતો પરેશાન
ટ્રેકટર છોડી બળદગાડાના ભરોસે ખેડૂતો
બિયારણ,ખાતરના ભાવ વધારાથી પણ ખેડૂતો પરેશાન
દેશભરમાં તમામ ચીજ વસ્તુના ભાવ વધારાએ માજા મૂકી છે. પેટ્રોલ અને ડીઝલના ભાવમાં પણ વધારો અકલ્પનિય થઈ રહ્યો છે. જેના કારણે ખેડૂતોને પણ મુશ્કેલી પડી રહી છે. ઘણા ખેડૂતોએ આધુનિક ખેતી બંધ કરીને પરંપરાગત ખેતી તરફ વળી રહ્યા છે. ટ્રેકટર-રોટાવેટર મશીનો બંધ કરીને બળદ ગાડાંથી ખેતી શરૂ કરી છે. અને ખેતી માટે ડીઝલમાં સબસીડીની માગ કરી રહ્યા છે.
ખેડૂતોની હાલત પહેલાથી જ ખરાબ છે. બીજ દવા ખાતરના ભાવ વધારા બાદ ડીઝલમાં ભાવ વધતા મુશ્કેલીમાં મુકાયા છે. અને ઘણા ખેડૂતો ડીઝલનો ભાવ વધતા મુશ્કેલીમાં આવી ગયા છે. ખેતીમાં વપરાતી તમામ વસ્તુઓમાં જે ભાવ વધારો આવ્યો છે. તેને લઇને ખેડૂતોને ઉત્પાદન ખર્ચમાં તોતિંગ વધારો થયો છે. ત્યારે સામે પક્ષે તૈયાર ખેત જણસીના ભાવમાં કોઈ વધારો થયો નથી. પરંતુ તેમાં ઘટાડો આવ્યો છે. સાથે ગત વર્ષથી તો ખેડૂતો કુદરતી આપદા, લોકડાઉન પૂર જેવી સ્થિતિને લઈને ખેત પાકમાં ખાસ કંઈ મળેલ નથી.
ત્યારે ડીઝલમાં ભાવવધારો થતા ખેડૂતોની હાલત ખૂબ જ ખરાબ છે. ખેતીમાં વાપરવામાં આવતા ટ્રેકટર રોટાવેટર જેવા મશીનો હવે ખેતરમાં ચલાવવા મોંઘા પડી રહ્યા છે. જેને લઈને ખેડૂતો ફરી પાછા 18મી સદી તરફ વળતા જોવા મળ્યા છે. ખેડૂતો ટ્રેકટર રોટાવેટર જેવી મશીનરી પડતી મૂકીને બળદ ગાડાં તરફ વળ્યાં છે. અને ખેતરમાં ફરી બળદોને જોતરીને ખેતી શરૂ કરી છે. તમામ જગ્યાએ થયેલા ભાવ વધારાના પગલે એક કુટુંબને ખેતીમાં કામ કરતા હોય ત્યારે પૂરતું વળતર પણ મળતું નથી. એક દિવસની રોજગારી પણ મળતી નથી. જે એક દયનિય હાલત સમાન છે.