આંદોલન / દિલ્હી તરફ આગળ વધી રહ્યી છે ખેડૂતોની કૂચ, 21મીએ મહાઘેરાવનો પ્લાન

• મેરઠથી રવાના થયેલ ખેડૂતોની પદયાત્રા બુધવારે ગાજિયાબાદ પહોંચશે
• ત્યારબાદ નોઇડા થઇને 21 સપ્ટેમ્બરે દિલ્હી પહોંચશે
• 21 સપ્ટેમ્બરે દિલ્હી પહોંચીને મોદી સરકાર સામે કરશે માંગ

ભારતીય ખેડૂત સંગઠનના ઉપાધ્યક્ષ રાધે ઠાકુરે એક ન્યૂઝ ચેનલ સાથેની વાતચીતમાં જણાવ્યું કે, સહારનપુરથી દિલ્હી માટે નીકળેલી 'ખેડૂત-મજૂર યાત્રા' માં હજારો ખેડૂતો સામેલ થયા છે. સહારનપુરથી દિલ્હીના કિસાન ઘાટ સુધી પગપાળા યાત્રા કરી રહ્યા છે. એમણે કહ્યું કે વર્તમાન સમયમાં ખેડૂતોની હાલત દયનીય છે. અને ખેડૂતો આર્થિક સંકટનો સામનો કરી રહ્યા છે. પરંતુ સરકાર હાથ પર હાથ રાખી સુઇ રહી છે. 

રાધે ઠાકુરે કહ્યું કે સમયસર ખેડૂતોને શેરડીના મૂલ્યની ચુકવણી નથી થઇ રહી. યોગી સરકારે વીજળીના દર વધારીને ખેડૂતોની કમર તોડી નાંખી છે અને દેવાને પગલે ખેડૂતો આત્મહત્યા કરવા માટે મજબૂર થઇ રહ્યા છે. આ કારણે દેશના ખેડૂતોને દિલ્હી પગપાળા આવવા માટે કૂચ કરવી પડી રહી છે. જ્યાં સુધી ખેડૂતોની માંગ વિશે સરકાર કોઇ નક્કર આશ્વાસન નથી આપતી ત્યાં સુધી ખેડૂતો દિલ્હી છોડવાના નથી. ભલે કેટલાય દિવસો સુધી દિલ્હીમાં પડાવ નાંખવો પડે. 

ખેડૂત મજૂર અધિકાર યાત્રા દરમિયાન સુશીલ ચૌધરી નામના ખેડૂતે કહ્યું કે, શેરડીના મૂલ્યની ચૂકવણી નથી થઇ. રેટ પણ બે વર્ષથી વધ્યા નથી. આ ઉપરાંત સરકારે ડીઝલ અને વીજળીના ભાવમાં વધારો કરી તેમની કમર તોડી નાંખી છે. અન્ય એક ખેડૂત નેતા સોમપાલ સિંહે કહ્યું કે, શેરડીના મૂલ્યની ચૂકવણી ન થતા આર્થિક સ્થિતિ એ હદે ખરાબ થઇ ગઇ છે કે, બાળકોની ફી પણ નથી ભરી શકતા. બે ટાઇમ ભોજન પણ ફાંફા છે. 

ખેડૂત સંગઠનોની મુખ્ય માંગ

1 ભારતના તમામ ખેડૂતોના દેવાને પૂર્ણ રીતે માફ કરવામાં આવે. 

2 ખેડૂતોને સિંચાઇ માટે વીજળી મફત મળે. 

3 ખેડૂતો અને મજૂરોને મફત શિક્ષણ અને સ્વાસ્થ્ય 

4 ખેડૂતો- મજૂરોને 60 વર્ષની ઉંમર બાદ 5000 રૂપિયા મહીને પેન્શન મળે.

5 પાકના ભાવ ખેડૂત પ્રતિનિધિઓની હાજરીમાં નક્કી કરવામાં આવે.

6 ખેતી કરી રહેલા ખેડૂતોની દૂર્ઘટનામાં મૃત્યુ થવા પર શહીદનો દરજ્જો આપવામાં આવે.

7 ખેડૂતોની સાથે-સાથે પરિવારને દુર્ઘટના વીમા યોજનાનો લાભ મળે.

8 પશ્ચિમી ઉત્તર પ્રદેશમાં હાઇકોર્ટ અને એમ્સની સ્થાપના થાય. 

9 ખેડૂતોને શેરડીના મૂલ્યની ચૂકવણી વ્યાજ સહિત જલ્દી કરવામાં આવે.

10 ભારતમાં સ્વામીનાથન આયોગની રિપોર્ટ લાગૂ કરવામાં આવે. 

11 તમામ પ્રદુષિત નદીઓને પ્રદૂષણ મૂક્ત કરવામાં આવે.