કરોડોની કમાણી / વિસાવદરના 306 ખેડૂતો જે પાક ક્યાંય વેચવા જ નથી જતા, કોઈએ વિચાર્યું પણ નહીં હોય તેવો રસ્તો અપનાવ્યો

• ખેડૂતોનું ક્રાંતિકારી પગલું 
• વિસાવદર પંથકનાં ખેડૂતોએ બનાવી કંપની 
• વાવેતરથી લઈને વેચાણ સુધીની પ્રક્રિયા થશે 

ખેતી દિવસેને દિવસે મોંઘી બનતી જઈ રહી છે.તેવામાં પોષણક્ષમ ભાવ માટે ખેડૂતો વારંવાર ફરિયાદો કરતા રહે છે.ત્યારે જૂનાગઢ જિલ્લાના ખેડૂતોએ ક્રાંતિકારી પગલું ભર્યું છે.અને 306 ખેડૂતોએ સાથે મળીને પોતાની જ કંપની બનાવી નાખી છે.જેના દ્વારા ખુદના ઉત્પાદનોને ખુદ પ્રોસેસ કરી બજારમાં મૂકશે.ત્યારે કેવું છે આ ક્રાંતિકારી પગલું.અને કેવી રીતે ખેડૂતોને થશે ફાયદો.આવો જોઈએ.

306 ખાતેદારએ શરૂ કરી છે પોતાની કંપની 
દિવસે દિવસે મોંઘવારી સાથે ખેતી પણ મોંઘી થઇ રહી છે. ત્યારે ખેડૂતોને મહામહેનતે તૈયાર કરેલા પાકના યોગ્ય ભાવ ન મળતા હોવાની અનેકવાર ફરિયાદ ઉઠી છે. ત્યારે જૂનાગઢ જિલ્લાના સાત તાલુકાના ખેડૂતોએ આવી સમસ્યાઓમાંથી મુક્તિ મેળવવા માટે નવતર પ્રયોગ હાથ ધર્યો છે. વિસાવદર પંથકના 306 ખેડૂતોએ 4000 વિઘા જમીનમાં ખેતી કરીને તેના પાકના વેચાણ માટે પણ એક કંપની બનાવી છે. આ કંપનીની વિસાવદર તાલુકા ખેત સહકારી મંડળી લિમિટેડ નામથી સ્થાપના કરવામાં આવી છે. અને 306 ખેડૂતોને આ કંપનીના સભાસદ એટલે કે શેરહોલ્ડર બનાવવામાં આવ્યા છે.

મગફળીનું જાતે જ તેલ કાઢી કરશે બજારમાં વેચાણ 
આ ખેડૂતોની કંપનીનું મુખ્ય ઉદ્દેશ્ય ખેત ઉત્પાદનના પોષણક્ષમ ભાવ મળી રહે તે માટેનું છે.હવે ખેડૂતને જ્યારે વાવેતર કરવું હોય ત્યારે આ કંપની પાસેથી ખેડૂત સભાસદો  ખાતર દવા બિયારણની ખરીદી કરશે.અને તેનો માલ તૈયાર થશે તે પણ તેની કંપનીને જ આપશે. આ કંપની ખેડૂતના આવેલ માલમાં વેપારીની જેમ શોર્ટીગ કરી પેકિંગ પ્રોસેસિંગ સહિતની તમામ કામગીરી કરશે અને ક્યા સેન્ટરમાં તે જણસોનો વધુ ભાવ મળે છે. તે અંગેનો સર્વે કરી, જેતે તે વિસ્તારમાં ખેડૂતનો આવેલ માલ મોકલશે.જેથી ખેડૂતોનો પાક ઊંચા ભાવે વેચાઇ શકે.

હવે પોષણક્ષમ ભાવ માટે તરસવું નહીં પડે!
મહત્વનું છે કે, આ કંપની બનાવવાથી ખેડૂતોને અને લોકોને પણ ફાયદો થશે. કેમકે જૂનાગઢ જિલ્લામાં મુખ્ય પાક મગફળી હોય છે. જેથી આ કંપની સાથે જોડાયેલા ખેડૂતોને પોતાની મગફળીના પાકના ભાવ સારી રીતે મળી રહેશે.અને કંપની ખુદ ઘરઆંગણે મગફળીનું તેલ બનાવી બજારમાં વેંચશે. જેથી સારા ભાવ ખેડૂતોને મળી શકે.ખેડૂતોની આ કંપની માટે હાલ પુરજોશમાં તૈયારીઓ પણ શરૂ થઈ ગઈ છે.અને આગામી સમયમાં આ ક્રાંતિકારી પગલું ખુબ મોટી સફળતા પ્રાપ્ત કરી શકે છે.