વ્યથા / ખેડૂતોની કઠણાઇ તો જુઓ! ટમેટાનો ભાવ 2 રૂપિયા કિલો બોલાતા ખેડૂતોએ ભારૈ હૈયે કર્યું આ કામ

• રાજકોટમાં રસ્તા પર ટામટા ફેંકાયા 
• મજૂરી ખર્ચ પણ ન નિકળતા સરકાર સામે રોષ
• માર્કેટમાં પ્રતિ કિલો ટામેટાનો મળે છે 2 રૂપિયા ભાવ

શિયાળાની ઋતુમાં લીલીશાકભાજી વધુ પ્રમાણમાં બજારમાં જોવા મળે. અને લોકો પણ લીલા શાકભાજી ખાવાનું પસંદ કરે છે. પરંતુ જ્યારે વધુ માગ હોય ત્યારે જ ભાવ ન મળતા ખેડૂતોને રોવાના દિવસો આવે છે. આવું જ હાલમાં પણ થઈ રહ્યું છે. ખેડૂતોને ટામેટાના રસ્તા પર ફેકવાનો વારો આવ્યો છે. શા માટે તો જુઓ આ રિપોર્ટ.. 

માર્કેટમાં લઈ જવાનું ભાડું પણ પોસાતુ નથી
શિયાળાની સિઝન છે. એટલે દરેક પ્રકારના લીલા શાકભાજી બજારમાં મળી રહ્યા છે. પરંતુ શાકભાજીના વધુ ઉત્પાદનની અસર હવે તેના ભાવ પર પણ જોવા મળી રહી છે. જે ટામેટાનો બારેમાસ ગૃહિણીઓ ઉપયોગ કરે છે. તે ટામેટા હાલમાં પાણીથી પણ સસ્તાભાવે મળી રહ્યા છે. જેના કારણે ગૃહિણીઓ તો ખુશ છે. પરંતુ ટામેટાનું ઉત્પાદન કરતા ખેડૂતોમાં રોષ ફેલાયો છે. કારણ કે, ખેડૂતોને ટામેટાના એટલા ભાવ મળી રહ્યા છે કે, માર્કેટમાં લઈ જવાનું ભાડું પણ પોસાય તેમ નથી. જેથી રોષે ભરાયેલા કેટલાક ખેડૂતો રસ્તા પર જ ટામેટા ઠાલવી રહ્યા છે. 

2 રૂપિયે પ્રતિકિલો વેચાઈ રહ્યા છે ટામેટા
રસ્તા પર ટામેટા ઠાલવવાની આ ઘટના જામકંડોરણાના બાલાપર ગામની છે. જ્યાં એક ખેડૂતે પોતાની જમીનમાં ટામેટાનું વાવેતર કર્યું હતું. ડિસેમ્બર મહિનામાં તો ટામેટાના 40 થી 50 રૂપિયા ભાવ મળી જતા હતા. પરંતુ હાલની તારીખે જ્યારે ઉત્પાદન સારું ઉતરવા લાગ્યું ત્યારે ટામેટાના પ્રતિકિલોના ભાવ માત્ર 2 રૂપિયા જ મળી રહ્યા છે. તેવામાં મજૂરી ખર્ચ કાઢવો પણ મુશ્કેલ બની ગયો છે. તો પછી માર્કેટ લઈ જવાનો સવાલ જ નથી રહેતો. તેવામાં આ પ્રકારની નુકસાનીનો સામનો કરી રહેલા ખેડૂતોનું શું કહેવું છે જરા તે પણ સાંભળો. 

શું છે ખેડૂતોની માંગ
ખેડૂતોની એવી માગ છે કે, સરકાર શાકભાજીના પુરતા ભાવ મળી રહે તેવા કોઈ પ્રયાસ કરે. અથવા તો આ સમયમાં કોઈ સહાય આપે. તેવામાં જોવાનું એ રહેશે કે, તળિયે પહોંચી ગયેલા ટામેટાના ભાવ ક્યારે ઉપર આવે છે. અને ખેડૂતો આ નુકસાનીમાંથી બહાર નિકળી શકે છે.