મધ્યપ્રદેશના મિન્ડા ગામમાંથી નીકળતી મહી નદી રાજસ્થાનના વાગડ વિસ્તારમાં થઈને ગુજરાતમાં દાખલ થાય છે, ક્યારેય ન સૂકાતી મહી નદીના પટ્ટ ખાલી દેખાતા ચિંતા વધી
બનાસ નદી બાદ મધ્યપ્રદેશથી નીકળતી મહી નદી સુકીભટ્ટ
કોઈ દિવસ ન સૂકાતી મહી નદીના પટને ખાલી જોઈ ખેડૂતોમાં ચિંતા
વરસાદ ખેંચાતા પરંપરાગત નદીઓ પણ સૂકાવવા લાગી
સુકીભટ્ટ બનાસ નદીની સ્થિતિ તો આપણે જોઈએ. હવે આપને ગુજરાતના વધુ એક જિલ્લાની જીવાદોરીના દર્શન પણ કરાવીએ. જે પણ હાલની સ્થિતિમાં સુકીભટ્ટ થઈ ગઈ છે. કારણ કે, ચોમાસું ગુજરાતમાં લંબાયું છે. અને ક્યાં સુધી લંબાશે તે કુદરતના હાથમાં છે. પરંતુ લોકોની મુશ્કેલી તો વધવાની જ છે. ત્યારે કેવી છે મહિસાગર જિલ્લામાંથી પસાર થતી બે જીવાદોરી સમાન નદીઓની સ્થિતિ આવો તે પણ જોઈએ..
મધ્યપ્રદેશના મિન્ડા ગામમાંથી નીકળતી મહી નદી રાજસ્થાનના વાગડ વિસ્તારમાં થઈને ગુજરાતમાં દાખલ થાય છે. અને અરબી સમુદ્રમાં ભળી જાય છે. સૌથી લાંબી નદી હોવાથી મહી હંમેશા છલકાયેલી રહે છે. પરંતુ આ વર્ષે મહીના પટ પણ સુકાભટ્ટ થઈ ગયા છે. વરસાદ લંબાતા ક્યારેય ન સૂકાતી મહી નદીના પાણી જોવા માટે લોકોની આંખો તરસી રહી છે. જેના કારણે ખેડા જિલ્લાના લોકો અને ખેડૂતોની ચિંતામાં વધારો થયો છે.
ખેડા જિલ્લામાંથી મહી અને શેઢી સહિત કુલ 7 બારમાસી નદીઓ પસાર થાય છે. જે બારેમાસ પાણી આપતી રહે છે. પરંતુ હાલ તમામ નદીઓ સૂકાઈ રહી છે. નદીનો કાંપ દેખાવા લાગ્યો છે. વર્ષો પછી નદીકાંઠાના લોકોએ નદીના તળિયા જોયા છે. અને આ સુકાભટ્ટ તળિયા દેખાતા ધરતીપુત્રોને દુકાળ જેવા આભાસ થઈ રહ્યા છે. જો કે, આ વર્ષે વરસાદ નથી થયો તેવું નથી. પરંતુ તેની નિયમિતતામાં અંતર જોવા મળી રહ્યું છે.