આ વર્ષે સારા વરસાદ વચ્ચે સમગ્ર સૌરાષ્ટ્રમાં મગફળીનું મબલખ ઉત્પાદન થયું છે. જેને લઈને ખેડૂતોમાં ખુશીનો માહોલ છવાયો છે. આ માહોલમાં ત્યારે ચાર ચાંદ લાગી ગયા જ્યારે ખુલ્લા બજારમાં મગફળીના ભાવ ઊંચા બોલાયા. જામનગરમાં ટેકાના ભાવની સરખામણીએ ખુલ્લા બજારની હરાજીમાં 800થી 1475 રૂપિયા ભાવ બોલતા હોવાથી ખેડૂતોનો પ્રવાહ ખુલ્લા બજાર તરફ વળ્યો છે.
મગફળીની ખરીદી મુદ્દે સૌથી મોટા સમાચાર
જામનગરમાં આજે સિઝનનો સૌથી ઊંચો ભાવ બોલાયો
સરકારને મગફળી વેચવામાં ખેડૂતોની નિરસતા
હાલ જામનગરમાં ખુલ્લા બજારમાં રાજ્યમાં સૌથી વધુ ભાવે મગફળી ખરીદી કરવામાં આવી રહી છે. બીજી તરફ ટેકાના ભાવની મગફળી ખરીદીમાં ખેડૂતોની નિરસતા ઉડીને આંખે વળગે છે. સરકારે ટેકાના ભાવે મગફળી ખરીદવા 16583 મેસેજ કર્યા છે. ગત રોજ સરકાર તરફથી 7996 મેસેજ કરાયા હતા. આ 7996 પૈકી માત્ર 491 ખેડૂતો જ મગફળી વેચવા માટે આવ્યા હતા. ટેકાના ભાવ કરતા વેપારીઓ વધુ ભાવ આપે છે. જેને લઇને ખેડૂતોએ વેપારીને મગફળી વેચવા તરફ વળ્યા છે.
જામનગરમાં આજે સિઝનનો સૌથી ઊંચો ભાવ બોલાયો
મગફળીની ખરીદી મુદ્દે ખેડૂતો માટે સારા સમાચાર છે. આજે સિઝનનો સૌથી ઊંચો ભાવ બોલાયો છે. જામનગરમાં હાપા માર્કેટયાર્ડમાં રૂ.1 હજાર 480 ભાવ બોલાયો છે. પ્રતિ મણ આજે મગફળીનો 1 હજાર 480 ભાવ બોલાતા ખેડૂતોને સારૂ વળતર મળી રહ્યું છે. ઓપન હરાજીમાં આજે સૌથી ઊંચો ભાવ બોલાયો છે. દક્ષિણ ભારતના વેપારીઓ ખરીદી માટે આવતા મગફળીનો ભાવ ઉંચકાયો છે.
જામનગરમાં છેલ્લા એક સપ્તાહમાં રૂપિયા 800થી 1200 વચ્ચે શરૂ થયેલ ખરીદ પ્રક્રિયામાં દિવસેને દિવસે ભાવમાં ઉછાળો આવી રહ્યો છે. છેલ્લા એક સપ્તાહથી જામનગર યાર્ડમાં મગફળીના ભાવ રાજ્યભરમાં સૌથી વધુ રહ્યા છે. આજે તો માગફળીએ નવો કિર્તમાન કર્યો છે.
સચરાચર વરસાદ અને મગફળીને અનુકૂળ વાતાવરણ બરકરાર રહેતા આ વર્ષે મગફળીનું ચિત્ર ફુલગુલાબી બન્યું છે. રેકોર્ડ બ્રેક વાવેતર વચ્ચે મગફળીનું મબલખ ઉત્પાદન થયું છે. મગફળીના હબ ગણાતા જૂનાગઢ, અમરેલી અને જામનગર-દ્વારકા સહિતના જિલ્લાઓમાં હાલ યાર્ડ માગફળીથી છલકાઈ રહ્યા છે. મબલખ ઉત્પાદન બાદ ખુલ્લા બજારમાં ભાવ પણ સારા રહેતા ખેડૂતો હાલ ઓપન બજાર તરફ વળ્યા છે. છેલ્લા એક સપ્તાહમાં જામનગર યાર્ડ ખાતે રેકોર્ડ બ્રેક આવક થતા તંત્રએ આવક બંધ કરવા મજબૂર થવું પડ્યું છે.
ટેકાના ભાવની ખરીદીમાં ખેડૂતોને ભેજનો મુદ્દો પણ સતાવી રહ્યો છે
આજે સરકાર દ્વારા એક હજાર ખેડૂતોને બોલાવાયા હતા જેમાં માત્ર 35 ખેડૂતોએ ટેકાના ભાવમાં મગફળી વેચી હતી. જ્યારે ખુલ્લા બજારમાં ટેકાના ભાવની સરખામણીએ ઊંચા ભાવ અને તુરંત પેમેન્ટ તેમજ રિજેક્ટ થવાની પણ નોબત ન રહેતા ખેડૂતો ઓપન બજાર તરફ વળ્યા છે. ટેકાના ભાવની ખરીદીમાં ખેડૂતોને ભેજનો મુદ્દો પણ સતાવી રહ્યો છે. જેને કારણે ખેડૂતો ખુલ્લા બજારની હરાજી તરફ વળ્યા છે. મબલખ ઉત્પાદન બાદ સારો ભાવ આવતા ખેડૂતો પણ ખુશખુશાલ જોવા મળી રહ્યા છે. તો બીજી તરફ ટેકાના ભાવની ખરીદીમાં નિરસતા જીવ મળી રહી છે.