Rain forecast in Gujarat today: ગુજરાતમાં બે દિવસથી મેઘરાજા ધડબડાટી બોલાવી રહ્યા છે. ત્યારે હવામાન વિભાગે આજે પણ વરસાદની આગાહી કરતા જગતનો તાત ચિંતામાં મુકાયો છે.
રાજ્યમાં આજે પણ વરસાદની આગાહી
અમદાવાદ, અરવલ્લીમાં વરસાદની સંભાવના
ગાંધીનગર,ખેડા, મહીસાગરમાં પણ વરસાદની શક્યતા
ઉત્તર પશ્ચિમ રાજસ્થાન અને તેને અડીને આવેલા વિસ્તારોમાં સાઈક્લોનિક સર્ક્યુલેશન સિસ્ટમ સર્જાઈ છે. તેની સાથે જ ઉત્તરી મધ્યપ્રદેશમાં ટ્રફ સર્જાયું છે. જ્યારે પાકિસ્તાન નજીક વેસ્ટર્ન ડિસ્ટર્બન્સ સર્જાયું છે. આ ત્રણ સિસ્ટમને કારણે ગુજરાતમાં છેલ્લા 2 દિવસ વરસાદ વરસી રહ્યો છે. ગઈકાલે પણ રાજ્યના 28 તાલુકામાં વરસાદ નોંધાયો છે. વરસાદને કારણે ગઈકાલની મેચ પણ થોડા સમય માટે રોકી દેવામાં આવી હતી.
28 તાલુકાઓમાં નોંધાયો વરસાદ
છેલ્લા 24 કલાકમાં રાજ્યના 28 તાલુકામાં વરસાદ નોંધાયો છે. જેમાં સૌથી વધુ કચ્છના અંજારમાં નોંધાયો છે. અંજારમાં 24 કલાકમાં પોણા 2 ઈંચ વરસાદ નોંધાયો છે. જ્યારે ધોરાજીમાં 1.5 ઈંચ, પાલીતાણામાં 1.5 ઈંચ, શિહોરમાં સવા ઈંચ, ગારિયાધારમાં 1 ઈંચ, ગોંડલમાં 1 ઈંચ, વલ્લભીપુરમાં 1 ઈંચ, જામકંડોરણામાં પોણો ઈંચ, કોટડાસાંગાણીમાં પોણો ઈંચ, ગાંધીધામમાં પોણો ઈંચ, મહુવામાં પોણો ઈંચ, જેસરમાં પોણો ઈંચ, ઉમરાળામાં પોણો ઈંચ, સૂઈગામમાં પોણો ઈંચ, બરવાળામાં પોણો ઈંચ, તળાજામાં પોણો ઈંચ વરસાદ નોંધાયો છે.
આજે આ વિસ્તારમાં વરસાદની આગાહી
હવામાન વિભાગે આજે પણ ગુજરાતમાં વરસાદની આગાહી કરી છે. હવામાન વિભાગના જણાવ્યા અનુસાર આજે અમદાવાદ, અરવલ્લી, બનાસકાંઠા, દાહોદ, ગાંધીનગર, ખેડા, મહીસાગર, મહેસાણા, પંચમહાલ, પાટણ, સાબરકાંઠા, અમરેલી, ભાવનગર અને કચ્છમાં વરસાદની આગાહી છે.
વરસાદનાં કારણે અમદાવાદમાં મેચ રોકવી પડી
આપને જણાવી દઈએ કે, વરસાદના કારણે અમદાવાદના નરેન્દ્ર મોદી સ્ટેડિયમમાં રવિવાર, 28 મેના રોજ રમાનારી મેચ મોકૂફ રાખવી પડી હતી. જે બાદ સોમવારે રિઝર્વ ડે પર રમાયેલી મેચમાં પણ ગુજરાતની બેટિંગ પૂર્ણ થયા બાદ વરસાદ ખાબક્યો હતો. જે બાદ મેચને રોકી દેવામાં આવી હતી. ધોધમાર વરસાદનાં કારણે ગ્રાઉન્ડ સ્ટાફ ત્વરિત ઝડપે કામે લાગી ગયો હતો. વરસાદ બંધ થયા બાદ તાત્કાલિક ગ્રાઉન્ડે સૂકાવવામાં આવ્યું હતું. થોડીવાર બાદ મેચ ફરી શરૂ થઈ હતી અને CSKની શાનદાર જીત થઈ હતી.
રવિવારે પણ ખાબક્યો હતો ભારે વરસાદ
હવામાન વિભાગની કમોસમી વરસાદની આગાહી વચ્ચે રવિવારે પણ રાજ્યના ઘણા વિસ્તારોના વાતાવરણમાં પલટો આવ્યો હતો અને મેઘરાજાએ બેટિંગ શરૂ કરી હતી. રવિવારે બપોર પછી મોટાભાગના વિસ્તારોનું વાતાવરણ પલટાયું હતું. વીજળીના કડાકા-ભડકા અને ભારે પવન સાથે વરસાદ શરૂ થયો હતો. જેમાં સૌથી વધારે વરસાદ અમદાવાદમાં નોંધાયો હતો. અમદાવાદમાં સૌથી વધુ 3 ઈંચ વરસાદ નોંધાયો હતો. અમદાવાદમાં કરા અને ભારે પવન સાથે પડેલા વરસાદને કારણે રવિવારે IPL 2023ની ફાઈનલ મેચ પણ કેન્સલ કરવામાં આવી હતી.