આગાહી / ગુજરાતના અનેક જિલ્લાઓના વાતાવરણમાં પલટો આવતા ધરતીપુત્રો ચિંતિત, જુઓ આગામી દિવસોમાં તાપમાન કેવું રહેશે

• ઠંડી ઘટી પરંતુ કેટલાક વિસ્તારમાં વાદળછાયું વાતાવરણ
• આગામી દિવસોમાં ગરમીનું પ્રમાણ વધવાની આગાહી 
• 16 ફેબ્રુઆરીએ ગરમીનો પારો 40 ડીગ્રીને પાર જવાની આગાહી 

ગુજરાતમાં અત્યારે સવારના સમયગાળામાં ઠંડીનો ચમકારો વર્તાઈ રહ્યો છે. જોકે, દિવસ દરમિયાન ગરમીનો અહેસાસ થઈ રહ્યો છે તો વળી રાતે વાતાવરણમાં ઠંડક પ્રસરે છે. આમ અત્યારે તો ડબલ ઋતુનો અનુભવ થઈ રહ્યો છે. આ વચ્ચે આજે રાજ્યના કેટલાક વિસ્તારમાં વાદળછાયું વાતાવરણ જોવા મળી રહ્યું છે. અમદાવાદમાં આજે વહેલી સવારે હિલ સ્ટેશન જેવું વાતાવરણ સર્જાયું હતું. 

સાબરકાંઠામાં પણ વહેલી સવારથી વાદળ છાયું વાતાવરણ
આજે સાબરકાંઠા જિલ્લાના વાતાવરણમાં પણ પલટો આવ્યો છે. વહેલી સવારથી વાદળ છાયું વાતાવરણ જોવા મળી રહ્યું છે. હિંમતનગરના ગ્રામ્ય વિસ્તારોમાં ભારે પવન ફૂંકાઈ રહ્યો છે. કમોસમી વરસાદની શક્યતાને લઇ ખેડૂતોમાં ચિંતા જોવા મળી રહી છે. કમોસમી વરસાદ થાય તો ઘઉ, જીરું સહિતના પાકને નુકસાન થઈ શકે છે. તો ભારે પવનથી ઘઉં, પપૈયા અને અન્ય પાકોને નુકસાનની ભીતી સેવાઈ રહી છે. 

ગરમીનું પ્રમાણ વધવાની આગાહી
હવામાન વિભાગના જણાવ્યા અનુસાર, રાજ્યમાં 24 કલાકમાં ઠંડીનો ચમકારો અનુભવાશે. રાજ્યમાં આવતીકાલથી 2થી 3 ડિગ્રી નીચું જશે તાપમાન, જેથી રાજ્યના લોકોને ફરી ઠંડી અનુભવાશે. જે બાદ આવતા અઠવાડિયાથી ગરમીના પ્રમાણમાં વધારો થશે. આગામી દિવસોમાં ગરમીનું પ્રમાણ વધવાની આગાહી વ્યક્ત કરવામાં આવી છે. અમદાવાદમાં આવતા અઠવાડીયે ગરમીનો પારો 40 ડિગ્રીને પાર જવાની શક્યતા છે. 16 ફેબ્રુઆરીએ ગરમીનો પારો 40 ડીગ્રીને પાર જવાની આગાહી વ્યક્ત કરવામાં આવી છે. આવતા અઠવાડિયાથી રાજ્યના અન્ય જિલ્લામાં પણ ગરમીનું પ્રમાણ વધશે.

ગઈકાલે 9.3 ડિગ્રી સાથે દાહોદ સૌથી ઠંડુંગાર શહેર બન્યું હતું 
ગઈકાલે રાજ્યનું દાહોદ 9.3 ડિગ્રી ઠંડી સાથે સૌથી ઠંડુંગાર શહેર બન્યું હતું. નર્મદામાં 9.5 ડિગ્રી ઠંડી નોંધાઈ હતી, જ્યારે નલિયામાં 18 ડિગ્રી ઠંડી નોંધાતાં લોકોએ ભારે હળવાશ અનુભવી હતી. રાજ્યનાં ચાર પ્રમુખ શહેરોની ઠંડી તપાસતાં વડોદરામાં 15, સુરતમાં 16, રાજકોટમાં 13.7 અને ભુજમાં 16.7 ડિગ્રી ઠંડી નોંધાઈ હતી.