જેતપુરના ખેડૂતે ખેતી ક્ષેત્રે પરિવર્તન કરી ઇઝરાયેલી ખારેકના વાવેતર થકી લાખો રૂપિયાની કમાણી કરી છે.
જેતપુરના ખેડૂતે ખારેકની ખેતીથી કરી લાખોની કમાણી
ઇઝરાયેલી ખારેકના વાવેતર થકી એક વીઘામાંથી 50 હજારની કરી કમાણી
11 વીઘામાં 215 ખારેકના ઝાડનું વાવેતર
સમય સાથે હવે સૌરાષ્ટ્રના ખેડૂતો ખેતીમાં પરિવર્તન લાવી રહ્યા છે. જેના થકી લાખો રૂપિયાની કમાણી પર રોળતા થયા છે. ત્યારે જેતપુરના મંડલીકપુરમાં ખેડૂતે ઇઝરાયેલની ખારેકની ખેતી કરીને લાખો રૂપિયાની કમાણી કરી છે.ખારેકની ખેતીની વાત આવે એટલે કચ્છમાં થતી ખારેકની ખેતી જ લોકોને યાદ આવે. પરંતુ કચ્છમાં નહીં પરંતુ જેતપુરના મંડલીકપુરમાં શૈલેષભાઈ રાદડિયા નામના એક ખેડૂતે પરંપરાગત ખેતીની સાથે-સાથે ઇઝરાયેલી ખારેકની ખેતી કરી છે જેમાં 5 વર્ષની લાંબી મહેનત પછી હવે લાખો રૂપિયાની કમાણી કરી રહ્યા છે.
જેતપુરના ખેડૂતે કર્યું હતું ઇઝરાયેલી ખારેકનું વાવેતર
મહત્વનું છે કે, શૈલેષભાઈ રાદડીયા નામના આ ખેડૂતે વારંવાર કમોસમી વરસાદ અને વાવાઝોડાના કારણે ખેતીમાં થતા નુકસાનને ધ્યાને રાખીને ખારેકની ખેતીનું વિચાર્યું હતું. ત્યારબાદઆ તેમણે પોતાના 11 વીઘા ખેતરમાં ઈઝરાયલી ખારેકના 215 રોપાનું વાવેતર કર્યું હતું. તેમણે ખારેકનો એક રોપો 3500 રૂપિયામાં ખરીદ્યો હતો. આમ 1 વીઘા જમીનમાં 90 હજાર રૂપિયાનો ખર્ચો કર્યો હતો. આજે ખર્ચ સામે તેઓ પ્રતિ એકવીઘા જમીનમાંથી 50 હજાર રૂપિયાની આવક મેળવી રહ્યા છે. શૈલેષભાઈ રાદડિયા 5 વર્ષ પહેલા ખારેકના રોપાનું વાવેતર કર્યું હતું અને 3 વર્ષે આવકની શરૂઆત થઈ હતી જેને પગલે આજે 5 વર્ષે ખુબ સારું ઉત્પાદન લઈ રહ્યા છે અને કચ્છની ખારેકને ટક્કર આપી રહ્યા છે.
ઓછી મહેનત અને ખર્ચમાં વધુ નફો મળે છે
જોકે આ ખેતીમાં ખેડૂતને ફાયદો બે ગણો મળી રહ્યો છે. કારણ કે, ખારેકના ઝાડ વચ્ચે ખુબ મોટું અંતર રાખવું પડે છે. તેવામાં ખેડૂતો ખારેકના બાગમાં વચ્ચે પરંપરાગત ખેતી પણ કરી શકે છે. ઉપરાંત ખેતીમાં જીવાતની સંભાવતા ઓછી રહે છે અને પાણીની જરૂરીયાત પણ રહેતી નથી. આમ ખારેકની ખેતી બાગાયતિ ખેતી કરનારા ખેડૂતો માટે ફાયદાકારક સાબિત થઈ શકે છે.