Photos / આંદોલનમાં ઘરની યાદ આવી તો ટ્રકમાં જ ઊભી કરી દીધી સોફા-વૉશરૂમ જેવી સુવિધાઓ, જુઓ Photos

• સતત આવતી આફતો વચ્ચે અડગ છે અન્નદાતાનું આંદોલન 
• દિલ્હીમાં કડકડતી ઠંડીની વચ્ચે વરસાદનો માર 
• એક ખેડૂતે ટ્રકને ફેરવી નાખ્યું ઘરમાં, સોફા અને ટોયલેટ જેવી સુવિધા 

શું છે મામલો ? 

દિલ્હીમાં એક તરફ જ્યાં ખેડૂતોનું આંદોલન ચાલી રહ્યું છે ત્યારે ઘણા બધા ખેડૂતોને શિયાળામાં ઠંડી અને ઠંડીની સાથે સાથે દિલ્હીમાં પડી રહેલા વરસાદના કારણે તકલીફનો સામનો કરવો પડી રહયો છે ત્યારે બીજી તરફ એક ખેડૂતે એક અનોખી રીત અપનાવી છે. એક ખેડૂતે કન્ટેનર ટ્રકને એક ઘરના રૂપમાં બદલી નાખ્યું છે. આટલું જ નહીં આ ટ્રકમાં સોફા, બેડ, ટીવી અને મોબાઈલ ચાર્જિંગ પોઈન્ટની સુવિધા પણ મળી રહે તેવી વ્યવસ્થા કરવામાં આવી છે. ટ્રકમાં એક ટોઇલેટ પણ બનાવવામાં આવ્યું છે. 

કોણ છે આ ખેડૂત ? 

હરપ્રીત સિંહ મટ્ટૂ જાલંધરના રહેવાસી છે અને તેમણે ટ્રકમાં જ ઘર ઉભું કર્યું છે. ન્યૂઝ એજન્સી સાથે વાતચીતમાં તેમણે કહ્યું કે હું મારા મોટા ભાઈના કહેવાય પર બીજી ડિસેમ્બરે અહિયાં આવ્યો હતો અને અહિયાં મને ખેડૂતોની સેવા કરવાનું કહેવામાં આવ્યું છે. મેં મારુ બધુ કામ છોડી દીધું છે અને બોર્ડર પર સેવા કરી રહ્યો છું.આ પહેલા મારા પાંચ ટ્રક આવ્યા હતા જ્યારે હું મારા હોટલમાં પાછો ગયો ત્યારે મને ઘરની યાદ આવી તેથી વિચાર્યું કે ટ્રકની અંદર જ ઘર કેમ ઊભું  ન કરી દઈએ. 

આ કામને પૂરૂ કરવામાં દોઢ દિવસનો સમય લાગ્યો અને આ બનાવવામાં તેમના મિત્રોએ પણ તેમની મદદ કરી હતી. આ સિવાય આ ખેડૂત હવે લંગર સેવા પણ આપે છે જેમાં ખેડૂતોને ચા-નાસ્તો અને ભોજન કરાવવામાં આવે છે. 

ખેડૂતો પર આકાશથી વરસતી આફત 

નોંધનીય છે કે ખેડૂતો દ્વારા કેન્દ્ર સરકારના નવા કાયદાઓ સામે વિરોધ કરવામાં આવી રહ્યો છે અને સરકાર કહી રહી છે કે આ કાયદા ક્રાંતિ લાવવાના છે જ્યારે ખેડૂતો કહી રહ્યા છે કે આ કાયદા કાળા કાયદા છે. કૃષિ કાયદાના વિરોધમાં થઈ રહેલા આંદોલનમાં કોરોના વાયરસનો ખતરો, કડકડતી ઠંડી અને તે બાદ વરસાદનો માર પણ ખેડૂતો પર પડ્યો છે ત્યારે આ આંદોલનમાં એક આવા ખેડૂત જોવા મળ્યા છે જેની તસવીરો સોશ્યલ મીડિયામાં વાયરલ થઈ રહી છે.