ખરા સમયે વીજળી ન મળતા રાજ્યમાં અનેક ગામના ખેડૂતો સરકાર સામે વિરોધ કરી રહ્યા છે. 8 કલાકને બદલે 6 કલાક વીજળી આપી વીજ અધિકારીઓ મનફાવે તેમ જવાબ આપી રહ્યા છે.
ખેડૂતોને પુરતા પ્રમાણમાં વીજળી આપવાની માંગ
રાજ્યમાં ઠેર ઠેર ખેડૂતોનો વિરોધ
સૌરાષ્ટ્રમાં વીજળી કાપથી ખેડૂતોની મુશ્કેલી વધી
રાજ્યભરમાં સમયસર વીજળી ન મળતા ખેડૂતોમાં રોષ જોવા મળ્યો છે. સાવરકુંડલા, કચ્છ, ગાંધીનગર, ઉપલેટા અને સાબરકાંઠામાં ખેડૂતોએ રોષ ઠાલવ્યો છે. અમરેલીના સાવરકુંડલાની PGVCL કચેરીમાં તાળાબંધી કરવામાં આવી હતી. અને ખેડૂતોએ હલ્લાબોલ કર્યો હતો. તેમજ વીજકચેરી ખાતે ધરણા કર્યા હતાં. સીમરણ, જીરા, ઓળીયા, ચરખડીયા સહિતના 5થી વધુ ગામડામાં વીજળી અનિયમિત મળી રહી છે. કાળઝાળ ગરમી અને તાપમાન વચ્ચે ઘઉં, બાજરીના પાકને પાણીની અતિ જરૂરિયાત હોય છે.
ઉગ્ર બોલાચાલીનો ઓડિયો વાયરલ
સાબરકાંઠામાં વીજળીના પ્રશ્ને ઉગ્રતા જોવા મળી છે. આ સાથે ખેડૂત અને UGVCL કર્મચારી સામે ઉગ્ર બોલાચાલીનો ઓડિયો વાયરલ થયો છે.જેમાં હિંમતનગર અધિક્ષક ઇજનેરની ઓફિસમાં વીજળી મુદ્દે ખેડૂતો બિલ ન ભરતા હોવાનુ કહેનાર અધિકારી સામે બળાપો ઠાલવાઈ રહ્યો છે અને UGVCLના અધિકારીઓ યોગ્ય જવાબ ન આપતા હોવાની ફરીયાદ સાથે જવાબદાર અધિકારીઓ સામે કાર્યવાહી કરવા ખેડૂતો માંગ કરી રહ્યા છે.
શું છે અધિકારી અને ખેડૂતોની વાયરલ ઓડિયો ક્લિપમાં
ખેડૂત અને UGVCL કર્મચારી સામે ઉગ્ર બોલાચાલીનો ઓડિયો વાયરલ થયો છે જેમાં ખેડૂત અધિકારીને સમજાવી રહ્યો છે કે 8 કલાકના રૂપિયા ભરે છે જેની સામે માત્ર 6 કલાક જ વીજળી મળે છે. સામે અધિકારી ખેડૂતને લાઇટ મીટર પર ચલાવી લેવાનું કહે છે. ખેડૂત સામે આજીજી કરી રહ્યો છે કે આજ દિવસ સુધી હોર્સ પાવર પર વીજળી મળતી હતી તો હવે લાભ આપવામાં સરકારને વાંધો નથી તો અધિકારીને કેમ છે? તો વળતાં જવાબમાં અધિકારી ઉડાઉ જવાબ આપતા કહે છે કે બધા લાભ લેવા હોય તેમ ન ચાલે. ખેડૂત આ સાંભળીને વળતો જવાબ આપે છે કે સાહેબ તમારો પગાર 50 હજાર હશે અમે નાની ખેતી કરી પરિવાર ચલાવનાર છીએ સરકાર લાભ આપે છે તો આપવાનો તમારો અધિકાર છે..
સૂત્રોચ્ચાર કરી વિરોધ
તો કચ્છમાં વીજળીને લઈ મુશ્કેલી પડતી હોવાથી ખેડૂતોએ અનોખો વિરોધ કર્યો છે. કચ્છના નખત્રાણા PGVCLની કચેરી સામે ખેડૂતોએ એકઠા થઈ ઢોલ-નગારા વગાડીને વિરોધ વ્યક્ત કર્યો હતો. તો આ તરફ ગાંધીનગરમાં પુરતા પ્રમાણમાં વીજળી આપવાની માંગ થઇ છે. તો ઉપલેટામાં વીજળી અંગે ખેડૂતોએ સૂત્રોચ્ચાર કર્યા હતાં.
ધારાસભ્ય વિરજી ઠુંમ્મર, અમરીશ ડેર, પ્રતાપ દુધાતના ધરણા
વિધાનસભામાં બજેટ સત્ર પણ ચાલી રહ્યું છે. ત્યારે વીજળી મામલે કોંગ્રેસના ત્રણ ધારાસભ્યએ વિરોધ પ્રદર્શન કર્યા હતા, સૌરાષ્ટ્રમાં વીજળી કાપને લઈને ખેડૂતોને પુરતા પ્રમાણમાં જોઈતી વીજળી મળી રહી નથી. જેથી ધારાસભ્ય વિરજી ઠુંમ્મર, અમરીશ ડેર, પ્રતાપ દુધાતે વિધાનસભા પ્રવેશદ્વાર પર વિરોધ કરી સરકારનું ધ્યાન વીજ કાપ તરફ દોર્યું હતું.