એક ખેડૂતે અનોખી કમાલ કરી છે. એવી કમાલ કે, જેના થકી ખેડૂત વધારાના ખર્ચથી તો બચી જ શકે છે. સાથે-સાથે પોતાનું કામ પણ સરળ રીતે કરી શકે. ગીર ગઢડાના સોનપાર ગામના એક ખેડૂતે યુટ્યૂબ પરથી માહિતી મેળવી એક કપાસના ડી-ટોપિંગ માટેનું મશીન તૈયાર કર્યું છે. તે પણ એવું કે ખર્ચ ઓછો અને કામ વધુ આપે. ત્યારે કેવી છે આ સિદ્ધિ અને કેવું છે ડી-ટોપિંગ મશીન....
ડી-ટોપિંગની મશીનનો આવિષ્કાર
કપાસના ટોપકા કાપવા બનાવ્યું મશીન
મજૂરી ખર્ચમાં થાય છે બચત
કહેવાય છે ને કે મન હોય તો માળવે જવાય... અડગ મનનાં માનવીને હિમાલય પણ નડતો નથી.... આ બંને ઉક્તિ ગીર સોમનાથનાં નાનકડા ગામના ખેડૂતે સાર્થક કરી બતાવી છે. આ ખેડૂતે ડી-ટોપિંગ મશિનનો આવિષ્કાર જાતે કર્યો છે. તે પણ યુટ્યુબની કમાલથી. આ આવિષ્કાર કરવા પાછળનું ઉદ્દેશ્ય પણ જરા હટકે છે.
ડી-ટોપિંગ એટલે કે, કપાસની ઊંચાઈ વધે ત્યારે તેના ટોપકા કટિંગ કરવા. આ માટે ખેડૂતને મજૂર કરવા પડે અને તેમાં ખર્ચો વધી જાય. રસિકભાઈને વિચાર આવ્યો કે, આ ખર્ચને ઘટાડવા કેમ કોઈ આવિષ્કાર ન કરવામાં આવે. બસ આ જ વિચાર સાથે તેણે મિશન મશિન શરૂ કર્યું અને યુટ્યુબમાં જોઈ-જોઈને તેમણે પીવીસીના પાઈપની મદદથી આ મશિન તૈયાર કર્યું અને તેમાં તેમને સફળતા પણ મળી. આ સફળતાને કૃષિ વિભાગે પણ આવકારી છે.
આ કોઈ નાનકડી સિદ્ધિ નથી. પરંતુ કપાસનું વાવેતર કરતા હજારો ખેડૂતો માટે એક બચતની સાથે-સાથે વિકાસની ગતિમાં વધારો છે. કારણ કે, ખેડૂતનો સમય પણ બચશે. તેની સાથે-સાથે પૈસાની પણ બચત થશે. આ સફળતાને જિલ્લાના ખેડૂતો તો આવકારી રહ્યા જ છે. સાથે-સાથે રાજ્યના અન્ય ભાગમાંથી પણ ખેડૂતો આ મશીન અંગે પ્રેરણા લેવા માટે આવી રહ્યા. એક વાત સ્પષ્ટ છે કે, માણસ ધારે તો કાંઈપણ કરી શકે. તેના માટે ભણતરની જરૂર નથી, આવડતની જરૂર છે. જે આ ખેડૂતે સાબિત કરી બતાવ્યું.