હાલાકી / સાણંદ APMCમાં ખેડૂતો રઝળી પડ્યાં, MSP ન મળતાં પાક વેચવા 5 કિ.મી લાંબી લાઈન

• ગુજરાતના ખેડૂતોની દિલ્હી વારી 
• અમદાવાદના સાણંદના ખેડૂતો આંદોલનના માર્ગે 
• ચૂંટણી પુરી થતા નેતાઓ ભૂલ્યા છે વચન 

ગુજરાતના ખેડૂતો પણ હવે આંદોલનના માર્ગે છે. ચૂંટણી વખતે જગતના તાતને માટે મોટા મોટા ઠાલા વચનો બાદ હવે વિજય હાંસલ થયો ગયો એટલે તું કોણ અને હું કોણ જેવો ઘાટ ઘડાયો છે. ત્યારે ખરેખર ખેડૂતોનું કોઈ સાંભળશે કે નહીં તે અંગે ખેડૂતોની આ તસવીરો ઘણુ કહી રહી છે. ઘઉંના પૂરતા ભાવ ન મળતા અમદાવાદની સાણંદ AMPC ખાતે ખેડૂતો રઝળ્યા છે. અને અમદાવાદના સાણંદમાં દિલ્લી ખેડૂત આંદોલન જેવા દ્રશ્યો જોવા મળ્યા છે.

ટેકાનો પૂરતો ભાવ ન મળતા ખેડૂતોએ હરાજી બંધ કરાવી દીધી છે. ત્યારે દિલ્હીના સિંઘુ બોર્ડરની જેમ સાણંદમાં 5 કિલોમીટર સુધી ટ્રેક્ટરનો ખડકલો જોવા મળ્યો છે. વિધાનસભામાં બેઠેલા ધારાસભ્યોએ જગતના તાતની આ સ્થિતિ જોવી જોઇએ.

ગુજરાતમાં ખેડૂતોને જે હાલાકી પડી રહી છે તે સરકારને ભારે પડી શકે છે. કોરોનાકાળમાં જ્યારે ભીડ ભેગી ન કરવાની હોય તેવા સલાહો આપવામાં આવી રહી છે. મહાનગરોમાં રાત્રી કર્ફ્યુ મુકવામાં આવ્યો છે ત્યારે ખેડૂતોને આવી લાંબી લાઈનો ખરેખર ચિંતનીય છે. 

ખરીદી ચાલુ થતા સરખા ભાવ ન મળતા ખેડૂતોએ હોબાળો કર્યો

સાણંદના માર્કેટીંગ યાર્ડમાં ઘઉંની ખરીદી ચાલી રહી હતી ત્યારે આ ખરીદી ચાલુ થતા સરખા ભાવ ન મળતા ખેડૂતોએ હોબાળો કર્યો હતો .સવારે ખેડૂતોના ઘઉં માત્ર 300 ખરીદાતા હતા જયારે હવે તેના 350 રૂપિયા મળી રહ્યા છે.અત્યારે ખેડૂતોને વેપારીઓ થોડા વધારે ભાવ આપી રહ્યા છે પરંતુ ખેડુતોનો આક્ષેપ છે કે, હજુ પણ સરખા ભાવ મળતા નથી.