ફરીયાદ / અજીબોગરીબ કિસ્સોઃ દિયર સાથે બહેનને પરણાવવા જેઠાણીએ દેરાણીનું ઘર ભાંગ્યું

રામોલના જનતાનગરમાં રહેતી ૩૦ વર્ષીય યુવતીનાં લગ્ન વર્ષ ૨૦૦૯માં થયાં હતાં. લગ્ન બાદથી અત્યાર સુધી આ યુવતી તેના પતિ સાસુ સસરા સાથે સંયુક્ત કુટુંબમાં રહેતી હતી અને તેમનાં પાડોશમાં જેઠ અને જેઠાણી રહેતાં હતાં.

લગ્નના બે મહિના બાદ યુવતીની ઘરકામ તથા રસોઈ બનાવવા બાબતે ભૂલો કાઢી સાસુ સસરા ત્રાસ આપતાં હતાં અને તારી માએ કાંઈ શીખવાડ્યું નથી તેમ કહી જેઠ જેઠાણી પણ અવારનવાર તેના ઘરે આવી નિંદા કરતાં હતાં.

યુવતીનો પતિ તેની સાથે ઝઘડો કરી બોલાચાલી કરતો હતો અને માર પણ મારતો હતો. આ તમામ લોકો ભેગા મળી યુવતીને છૂટાછેડા આપી દેવાનું પણ કહેતાં હતાં. પરંતુ સંસાર ન બગડે તે માટે સાસરિયાંનો ત્રાસ આ યુવતી સહન કરતી હતી. ફરિયાદમાં કરેલા આક્ષેપ મુજબ યુવતીની જેઠાણીની બહેનના છૂટાછેડા થઇ ગયાં હતાં.

જેથી આ યુવતીની જેઠાણી તેના દિયર સાથે બહેનના નિકાહ કરાવવા માગતી હોવાથી તે અવારનવાર ઝઘડા પણ કરાવતી હતી. એક દિવસ આ યુવતીના ફોન ઉપર રોંગ નંબર આવતાં તેના પતિએ તેની પર શંકા રાખી તેની સાથે ઝઘડો કરી તેને માર માર્યો હતો.

સાસરિયાંના ત્રાસથી કંટાળીને યુવતીએ રામોલ પોલીસ સ્ટેશનમાં ફરિયાદ કરી છે. પોલીસે સાસુ, સસરા, પતિ તેમજ જેઠ જેઠાણી વિરુદ્ધ ગુનો નોંધીને તપાસ શરૂ કરી છે.