હાહાકાર / કોરોનાથી બચવાની એક અફવાના કારણે 300 લોકો મોતને ભેટી જતા હડકંપ, 1000 બીમાર

• મિથેનોલ પીવાથી કોરોનાથી બચવાની ફેલાઈ અફવા 
• કોરોના વાયરસના કારણે પહેલેથી ઈરાનની હાલત ખરાબ 
• સોશિયલ મીડિયામાં એક અફવાનાં કારણે ગયા લોકોના જીવ 

કોરોના વાયરસનાં કારણે વિશ્વમાં હાહાકાર મચી ગયો છે. હજારો લોકોએ કોરોના વાયરસનાં કારણે પોતાના જીવ ગુમાવ્યા છે. એવામાં ઈરાનમાં લોકોની મુર્ખામીનાં કારણે સેંકડો લોકોએ પોતાના જીવ ગુમાવ્યા અને એક હજાર જેટલા હજુ બીમાર છે. 

સોશિયલ મીડિયામાં અફવા ફેલાઈ કે મિથેનોલ પીવાથી કોરોના વાયરસથી બચી શકાય છે જે બાદ ઈરાનનાં મીડિયા અહેવાલો મુજબ સોશિયલ મીડિયામાં ફેલાયેલી અફવાનાં કારણે ઈરાનમાં અત્યાર સુધી 300 માર્યા ગયા છે અને એક હજાર હજુ પીડાઈ રહ્યા છે. નોંધનીય છે કે ઈરાનમાં દારૂ પર પ્રતિબંધ છે લોકો બુટલેગર પર જ આધાર રાખે છે.નિષ્ણાતો મુજબ ઈરાનનાં લોકો જાણકારીનાં અભાવે આ બધું કરી રહ્યા છે અને જો હજુ તે નહીં સમજે અને મિથેનોલનું સેવન ચાલુ  રાખશે તો પરિસ્થિતિ હજુ ખરાબ થઇ શકે છે.

ઈરાનમાં અત્યાર સુધી આશરે 30 હજાર જેટલા કોરોના વાયરસના કેસ નોંધાયા છે. મિડલ ઈસ્ટના દેશોમાં સૌથી વધારે નુકસાન ઈરાનમાં જ જોવા મળી રહ્યું છે. કોરોના વાયરસે ઈરાનમાં 2200 લોકોનો ભોગ લીધો છે. વિદેશી મીડિયા દ્વારા બહાર પાડવામાં ઘણા અહેવાલોમાં તો દાવો કરવામાં આવે છે કે ઈરાનમાં કોરોના વાયરસના અસલી આંકડા આનાથી પણ વધારે હોઈ શકે છે. 

ઈરાનમાં ગરીબી, શિક્ષણની કમી અને અફવાઓનાં કારણે લોકો જીવ ગુમાવી રહ્યા છે. અફવાઓનાં આધારે લોકો મિથેનોલ મિશ્રિત દારુનું સેવન કરીને મોતને ભેટી રહ્યા છે. ઈરાનની મીડિયાનાં અહેવાલો જોઇને કોઈ પણ વ્યક્તિનું હૃદય કંપી ઉઠે તેવા હાલ છે. એક તરફ કોરોનાનો કહેર અને બીજી તરફ આવી અફવાનાં કારણે કપરી પરિસ્થિતિ બાદ લોકો જીવન મરણ વચ્ચે લડાઈ લડી રહ્યા છે. 

ઈરાનમાં એવી અફવા પણ ફેલાઈ હતી કે આલ્કોહોલ શરીરનાં પાચનતંત્રને પણ ચોખ્ખું કરી શકે છે જેથી કોરોના વાયરસથી બચી શકાય. નોંધનીય છે કે કોરોના વાયરસ ફેલાયો ન હતો તે પહેલાં પણ મિથેનોલનાં કારણે કેટલાય લોકોનાં જીવ ગયા છે.સાથે જ ઈરાનમાં જે કોઈ પણ મુસ્લિમ આલ્કોહોલનું સેવન કરે તેને દંડ ફટકારવામાં આવે છે, જોકે લઘુમતી સમુદાયને તેમાં છૂટ આપવામાં આવે છે.