રાજકોટના અધિક કલેકટરના PA મહેન્દ્ર લુણાગરીયાનો પુત્ર રક્ષિત લુણાગરિયા રાજકોટ શહેરના રેસકોર્સ લવ ગાર્ડનમાં નકલી PI બનીને પહોંચ્યો હતો
રાજકોટમાં ઝડપાયો નકલી PI
અધિક કલેકટરના PAનો પુત્ર બન્યો નકલી PI
રક્ષિત લુણાગરિયાની ધરપકડ
રાજકોટમાં નકલી પોલીસ ઇન્સ્પેક્ટર ઝડપાયો હોવાનું સામે આવ્યું છે. અધિક કલેકટરના PAનો પુત્ર નકલી પોલીસ અધિકારી બનીને રોફ જમાવતો ઝડપાયો છે. રાજકોટના અધિક કલેકટરના PA મહેન્દ્ર લુણાગરીયાનો પુત્ર રક્ષિત લુણાગરિયા રાજકોટ શહેરના રેસકોર્સ લવ ગાર્ડનમાં નકલી પીઆઇ બનીને પહોંચ્યો હતો અને ગાર્ડનમાં બેઠેલા પ્રેમીયુગલો અને અન્ય એકલ-દોકલ યુવકોને કે જે ઓએ માસ્ક ન પહેર્યા હોય તેને ધમકી આપીને રોફ જમાવતો હતો. જે દરમિયાન હાજર રહેલા લોકોએ તેનું આઈકાર્ડ માંગતા સમગ્ર કૌભાંડનો પર્દાફાશ થયો હતો. આથી આ મામલે હાજર રહેલા યુવકોએ કંટ્રોલ રૂમને જાણ કરતા પ્રદ્યુમનનગર પોલીસનો કાફલો ઘટના સ્થળે પહોંચ્યો હતો અને પોલીસના નામે રોફ જમાવનાર રક્ષિતની ધરપકડ કરીને કાયદેસરની કાર્યવાહી હાથ ધરી હતી.
શહેરના રેસકોર્ષ વિસ્તારમાં છેલ્લા ઘણા દિવસથી એક શખ્સ એકટીવા લઇને આવતો હોય અને પોતાને પોલીસ ઇન્સ્પેકટર હોવાનું જણાવી ત્યાં બેઠેલા કપલ અને અન્યોને ધમકાવી માસ્ક પહેર્યુ ન હોય તો રોફ જમાવી પોલીસના નામે ડરાવતો હતો. આ બાબતે ત્યાં હાજર યુવકોએ પોલીસ કંટ્રોલ રૂમને જાણ કરતા અસલી પોલીસ આવી જતાં નકલી પીઆઇ બનેલા આ યુવકને અસલી પોલીસનો ભેંટો થઇ જતાં તેના રંગરૂપ બદલાઇ ગયા હતા. પોલીસની પૂછપરછમાં પણ પીઆઇ જેવો રોફ જમાવતો હોવાનું ખુલ્યું હતી. પ્ર.નગર પોલીસ જયારે રેસકોર્ષ લવ ગાર્ડનમાં પહોંચી ત્યારે એકટીવા મોટર સાયકલ લઇને ઉભેલા અને ધાક ધમકી આપતા આ યુવકની પૂછપરછ કરતાં પ્ર.નગર પોલીસ સમક્ષ પણ આ યુવકે પોતાનું નામ રક્ષીત મહેન્દ્ર લુણાગરીયા હોવાનું અને પોતે ધરમ સિનેમા પાસે ધ્રોલ વેરહાઉસ પાસે રહેતો હોવાનું જણાવ્યું હતું.
એક તબક્કે ત્યાં આવેલ પોલીસ પણ તેને સાચો PI સમજી બેઠી હતી. કારણ કે ધ્રોલ હાઉસ પાસે મોટા ભાગે પોલીસ અધિકારીઓના જ આવાસ આવેલા છે. પોતાને પીઆઇ તરીકે ઓળખાવી અસલી પોલીસ પાસે પણ પીઆઇ જેવો રોફ જમાવ્યો હતો. યુવક-યુવતીઓ અને અન્ય લોકોને ટાર્ગેટ બનાવતો હતો. પોલીસના નામે રક્ષીત એકલ-દોકલ કપલને કે પછી ટોળામાં બેઠેલા યુવકો કે લવરમુછીયાઓને ટાર્ગેટ બનાવતો અને માસ્ક કેમ પહેર્યુ નથી? દંડ ભરવો પડશે તેવુ કહીને તોડ કરવાની કોશિશ કરતો હતો. મોટા ભાગે લોકો રક્ષીતના હાવભાવ અને બોડી લેંગ્વેજ ઉપરથી તેને પોલીસ જ સમજી તેનાથી ડરી જતાં હતાં.
નકલી પોલીસ અધિકારી અધિક કલેકટરના પીએ મહેન્દ્ર લુણાગરીયાના પુત્ર વિરૂઘ્ધ ગુનો નોંધાયો હતો. પ્ર.નગર પોલીસે નકલી પીઆઇ બનેલા અધિક કલેકટરના પીએ તરીકે ફરજ બજાવતા મહેન્દ્ર લુણાગરીયાના 28 વર્ષીય પુત્ર રક્ષીત વિરૂઘ્ધ આઇપીસી કલમ 170 હેઠળ ગુનો નોંઘ્યો છે અને રક્ષીતે અગાઉ પણ આ રીતે પીઆઇ બનીને કયાંય તોડ કર્યો કે કોઇ પોલીસના નામે અન્ય મોટી છેતરપીંડી કરી છે કે કેમ તે અંગે તપાસ કરવામાં આવી રહી છે.