ચિંતાજનક / ગુજરાતીઓ રાત્રી કર્ફ્યૂમાં નકલી પોલીસથી સાવધાન! અમદાવાદમાં બની ચોંકાવનારી ઘટના

• અમદાવાદમાં નકલી પોલીસનો ત્રાસ
• કર્ફ્યૂ સમયે પણ નકલી પોલીસ એક્ટિવ
• રામોલમાં એક વ્યક્તિને નકલી પોલીસે લૂંટ્યો

અમદાવાદમાં નકલી પોલીસનો ત્રાસ યથાવત

ગુજરાત સહિત આખા ભારતમાં કોરોના વાયરસના કેસ વધી રહ્યા છે અને આ વાયરસને રોકવા માટે ગુજરાત સરકાર દ્વારા રાત્રિ કર્ફ્યૂ સહિતના જુદા જુદા પ્રતિબંધ લગાવવામાં આવ્યા છે. રાત્રિ કર્ફ્યૂમાં લોકોના અવરજવર પર પ્રતિબંધ છે ત્યારે અમદાવાદમાં આવા સમયમાં પણ કર્ફ્યૂ માફિયાઓ એક્ટિવ થઈ ગયા છે. 

કલમ 188 લગાવવાની ધમકી આપી માગ્યા રૂપિયા

અમદાવાદમાં રાત્રિ કર્ફ્યૂ દરમિયાન નકલી પોલીસનો ત્રાસ વધ્યો છે. અમદાવાદના રામોલ વિસ્તારમાં નકલી પોલીસે યુવકને રાત્રિ કર્ફ્યૂમાં લૂંટ્યો હોવાની ઘટના સામે આવી છે. નોંધનીય છે કે અમદાવાદમાં રાત્રિ કર્ફ્યૂમાં આ યુવક બહાર નીકળ્યો હતો જે બાદ તેને નકલી પોલીસે ઊભો રાખો અને તે બાદ તેને કલમ 188 લગાવવાની ધમકી આપી. આ ધમકીના બદલામાં તે યુવક પાસેથી રૂપિયા પડાવવામાં આવ્યા છે. 

ફરાર એક શખ્સની રામોલ પોલીસે શોધખોળ શરૂ કરી

નોંધનીય છે કે આ સમગ્ર ઘટનામાં ત્યાર સુધી પોલીસે પ્રદીપ મોરે નામના શખ્સની ધરપકડ કરી છે અને પ્રદીપ મોરે TRB જવાન હોવાનું સામે આવ્યું છે જ્યારે હજુ એક ફરાર શખ્સની પોલીસ દ્વારા શોધખોળ ચાલુ છે. 

ગુજરાતમાં કોરોનાનો ચિતાર 

ગુજરાત રાજ્યમાં કોરોના સામેની લડાઇ વધુ મજબૂત થતી જઈ રહી હોય તેવી પરિસ્થિતિનું નિર્માણ થઈ રહ્યું છે. રાજ્યમાં કોરોના વાયરસના કડક પ્રતિબંધોની અસર જોવા મળી રહી છે અને નવા કેસની સંખ્યા સતત ઓછી થઈ રહી છે. રાજ્યમાં મે મહિનાની શરૂઆત થઈ ત્યારથી કેસમાં ઘટાડાનો ટ્રેન્ડ ચાલુ થઈ ગયો છે ત્યારે એક્ટિવ કેસ તથા ગંભીર દર્દીઓ પણ ઓછા થઈ રહ્યા છે. આટલું જ નહીં રાજ્યમાં પોઝિટિવિટી રેટમાં પણ ઘટાડો આવી રહ્યો છે. હાલ રાજ્યમાં 1,39,614 એક્ટિવ કેસ, 786 વેન્ટિલેટર પર છે.