ટ્રાફિકના નવા નિયમો જાહેર થયા બાદ મુખ્યમંત્રી વિજય રૂપાણીની ગાડીના પીયુસી, ઈન્શ્યોરન્સ ન હોવાની માહિતી સોશિયલ મીડિયામાં અપલોડ કરવામાં આવી હતી. જે ખોટી હોવાનું સામે આવતા ગુનો નોંધવામાં આવ્યો હતો. આજે સુરતમાંથી ક્રાઈમબ્રાન્ચ દ્વારા મુખ્યમંત્રીની ગાડીના ફોટો સાથેની વિગતોની ખોટી માહિતી અપલોડ કરવાના ગુનામાં એક યુવકની ધરપકડ કરવામાં આવી છે. અને વધુ તપાસ હાથ ધરી છે.
પોલીસે ફોટો વાઈરલ કરનારને સુરતથી ઝડપી પાડ્યો
PUC અને ઈન્સ્યોરન્સ મામલે કર્યો હતો ખોટો ફોટો વાઈરલ
સરકારી ગાડીના સુપરવાઈઝરે નોંધાવી હતી આ અંગે ફરિયાજ
સીએમ વિજય રૂપાણીની ગાડીના ફોટા વાઈરલ થયા બાદ આ અંગે સરકારી ગાડીના સુપરવાઈઝરે પોલીસમાં ફરિયાદ નોંધાવી હતી જે મામલે ક્રાઈમ બ્રાન્ચે આજે સુરતથી આ ખોટી માહિતી વાળો ફોટો વાઈરલ કરનાર યુવાનને પકડી પાડ્યો હતો. અને આ અંગેની પત્રકાર પરિષદમાં જાહેરાત કરી હતી કે, યુવાને જણાવેલી વિગતો ખોટી છે.
શું હતો મામલો
મુખ્યમંત્રી વિજયભાઈ રૂપાણી ગુજરાત સરકારની સ્કોર્પિયો ગાડી નં. GJ-18-G-9085 ઉપયોગ કરે છે તે ગાડી ડિરેક્ટર જનરલ ઓફ પોલીસનાં નામે નોંધાયેલી છે અને તેનો વીમો 31 ડિસેમ્બર 2019 સુધી વેલીડ છે. તેની ફિટનેશ પણ 10 એપ્રિલ 2029 સુધીની છે. સોશિયલ મીડિયામાં મેસેજ ફરતો થયો હતો કે સીએમની ગાડી જ મોટર વ્હીકલ એક્ટનું પાલન નથી કરતી. જો કે આ મેસેજ તદ્દન ખોટો હોવાનું તપાસમાં સામે આવ્યું હતુ.
પોલીસે આ અંગે ગુનો નોંધી તપાસ હાથ ધરી
સરકારી ગાડીના સુપરવાઈઝરે આ અંગે ફરિયાદ નોંધાવી હતી. પોલીસે આ અંગે ગુનો નોંધીને તપાસ હાથ ધરી હતી. જેમાં ખોટી માહિતી અપલોડ કરવા અંગે તપાસ કરવામાં આવતા સુરતના એક યુવકનું નામ સામે આવ્યું હતું. આજે ક્રાઈમ બ્રાન્ચ દ્વારા ધરપકડ કરવામાં આવી છે. હાલ ક્રાઈમ બ્રાન્ચ દ્વારા આ અંગે યુવકની પૂછપરછ કરવામાં આવી રહી છે.