અલગ-અલગ બનાવટી એપ્લિકેશન પરથી લોન લેતા લોકો માટે ચેતવણીરૂપ કિસ્સો સામે આવ્યો છે. ફરિયાદીએ લોન ન ભરતા ફરિયાદીના પત્નીનો નગ્ન ફોટો બનાવી વાયરલ કર્યો હતો.
એપ્લિકેશન પરથી લોન લેતા સાચવજો!
બનાવટી લોન એપ્લિકેશનનો પર્દાફાશ
આરોપી જોગીન્દ્રસિંહ કુશવાહની ધરપકડ
અમદાવાદ સાયબર ક્રાઇમની કસ્ટડીમાં રહેલા આરોપીનું નામ જોગીન્દ્ર સિંહ કુશવાહ છે. જે મૂળ ઉત્તરપ્રદેશના ગાજીપુરનો વતની છે. સુરતના હજીરા ખાતે રહી નોકરી કરે છે. સાથે જ સાથે આરોપી ઓનલાઈન લોન મેળવી રૂપિયા ન ભરનાર લોકોની માહિતી એકઠી કરી લોન ભરવા માટે મેસેજ કરી ધમકી પણ આપતો હતો.
લોન ન ભરતના વ્યક્તિની પત્નીનો ફોટો મોર્ફ કરીને નગ્ન ફોટો કર્યો વાયરલ
આ પ્રકારે આરોપીએ લોન નહિ ભરનાર વ્યક્તિની પત્નીનો ફોટો મોર્ફ કરીને નગ્ન ફોટો સોશિયલ મીડીયામાં વાયરલ કર્યો છે. જેથી સાયબર ક્રાઇમે જોગીન્દ્રસિંહ કુશવાની ધરપકડ કરી છે. આરોપીની પાસેથી એક લેપટોપ અને મોબાઈલ કબજે કરવામાં આવ્યો છે. જે મોબાઈલમાંથી ચાઈનીઝ વેબસાઈટની લોન એપ્લિકેશનની ઘણી માહિતી મળી આવી છે. સાઇબર ક્રાઇમની તપાસ દરમિયાન આરોપી જોગીન્દ્ર એક સામાન્ય પ્યાદુ હોવાનુ સામે આવ્યુ છે. કારણ કે આ તમામ એપ્લિકેશન અન્ય દેશમાંથી ઓપરેટ થાય છે. ત્યાંથી જ લોકોને બ્લેકમેઇલ કરવામાં આવે છે.
આ એપથી ક્યારે લોન ન લેશો
મહત્વનુ છે કે બે દિવસ અગાઉ અમદાવાદ સાયબર ક્રાઇમમાં ફરિયાદ નોંધાઈ હતી કે હેન્ડ કેસ, વન લોન્સ, રૂપી ગો, સીની રૂપી, ફ્રી કેસ, સ્વીટ લોન, ક્રેડીટ વોલેટ, ફાસ્ટ રૂપી, એજી લોન, મીનીટ કેસ અને ઈજી ક્રેટીટ જેવી વિવિધ ઓનલાઈન એપ્લિકેશન પરથી ઓછા દરની લોન આપવામા આવે છે. પરંતુ લોનની સાથે ફરિયાદીઓના ફોન હેક કરી તમામ માહિતી મેળવી લેવામાં આવે છે. જો કોઈ લોન ન ભરે તો તેના પરિવાર અને મિત્ર વર્તુળમાં ફોન કરી ધમકી આપવામાં આવે છે. સાથે જ ફરિયાદીની પત્નીનો ફોટો મોર્ફ કરી નગ્ન ફોટા બનાવી વાયરલ કરવામાં આવ્યા હતા. જે અંગે સાઇબર ક્રાઇમને ગુનો નોંધી આરોપીને ઝડપી પાડયો છે. સાથે આવી ગેરકાયદે ચાલતી આવી એપ્લિકેશનો પર પ્રતિબંધ મુકવા કાર્યવાહી હાથ ધરી.
તાત્કાલિક લોન આપતી આ એપ્લિકેશનોની ક્યાંય નોંધણી થતી નથી
સૌથી મહત્વની વાત એ છે કે ઓનલાઈન અને તાત્કાલિક લોન આપતી આ એપ્લિકેશનોની ક્યાંય નોંધણી થતી નથી. સાથે આરબીઆઇના નિયમોનું પણ ઉલ્લંઘન કરવામાં આવે છે. ત્યારે સાઇબર ક્રાઇમ દ્વારા લોકોને અપીલ કરવામાં આવી છે કે, આવી એપ્લિકેશન થકી જો ભોગ બન્યા હોય તો સાઇબર ક્રાઇમનો સંપર્ક કરવો, સાથે જ ઝડપાયેલા આરોપીની તપાસ મોટા ખુલાસા થાય તેવી શક્યતા છે.
કેવી રીતે છેતરપિંડી કરી?
વિવિધ ઓનલાઈન એપ્લિકેશન પરથી ઓછા દરની લોન આપવાની જાહેરાત
લોનની સાથે ફરિયાદીઓના ફોન હેક કરી તમામ માહિતી મેળવી લેવામાં આવતી
આ તમામ એપ્લિકેશન અન્ય દેશમાંથી ઓપરેટ થાય છે
ત્યાંથી જ લોકોને બ્લેકમેઇલ કરવામાં આવે છે
જો કોઈ લોન ન ભરે તો તેના પરિવાર અને મિત્ર વર્તુળમાં ફોન કરી ધમકી આપવામાં આવતી
ફોનના ડેટા હેક કરી ફોટોગ્રાફ્સ મોર્ફ કરી વાયરલ કરવામાં આવતા
શું ધ્યાન રાખવું જોઇએ?
ઓછા દરની લોન આપવાની જાહેરાતમાં ભરમાવું નહિ
આ એપ્લિકેશનોની ક્યાંય નોંધણી થાય છે કે નહિ તેની તપાસ કરવી
RBIના નિયમોનું ઉલ્લંઘન કરવામાં આવતું નથી ને તેની જાત તપાસ કરવી
આવી એપ્લિકેશન દ્વારા ભોગ બન્યા હોય તો સાઇબર ક્રાઇમનો સંપર્ક કરવો