ધરપકડ / અમદાવાદમાં નકલી ડ્રાઈવિંગ લાઈસન્સ અને આધાર કાર્ડ બનાવતી ટોળકીનો પર્દાફાશ

• ડુપ્લીકેટ ડ્રાઈવીંગ લાઈસન્સના રેકેટનો પર્દાફાશ
• અમદાવાદ ક્રાઈમ બ્રાંચે બે શખ્સોની ધરપકડ કરી
• 85 પાસપોર્ટ ફોટા, 19 ડ્રાઇવિંગ લાયસન્સ જપ્ત

અમદાવાદમાં બનાવટી ડ્રાઈવિંગ લાઈસન્સ બનાવતી ટોળકીનો પર્દાફાશ થયો છે. અમદાવાદ ક્રાઈમ બ્રાંચે બે શખ્સોની ધરપકડ કરીને બનાવટી લાઇસન્સ બનાવવાનું રેકેટ ઝડપી પાડ્યું છે. ક્રાઈમ બ્રાંચે મળેલી બાતમીના આધારે અફસરુલ શેખ અને મારુફમુલ્લા નામના શખ્સની ધરપકડ કરી છે. પોલીસે બંને આરોપીઓ પાસેથી 19 ડ્રાઈવિંગ લાઈસન્સ, 5 આધારકાર્ડ, 3 પાન કાર્ડ, 85 વ્યક્તિઓના પાસપોર્ટ ફોટા, બનાવટી લાઇસન્સ બનાવવા માટે વપરાતા ચીપવાળા કાર્ડ અને ચીપ વગરના 20 કાર્ડ જપ્ત કર્યા છે.

પોલીસ તપાસમાં આ બન્ને શખ્સોએ અત્યાર સુધીમાં 39 જેટલા બનાવટી ડ્રાઈવિંગ લાઈસન્સ બનાવી આપ્યા હોવાનું સામે આવ્યું છે. જો કે, પોલીસે હાલ આ બંને આરોપીઓ સામે ગુનો નોંધીને અન્ય કેટલા લોકો આ કૌભાંડમાં સંડોવાયેલા છે તે મામલે કાયદેસરની કાર્યવાહી શરૂ કરી છે.