શિક્ષણનો મૂળ ધર્મ સમાજમાં તાલીમબદ્ધ બુદ્ધિધન અર્પિત કરવાનો છે. પરંતુ કેટલાંક ધંધાદારી લોકો આ ધર્મને ધંધો સમજી બેઠા અને આ તેનું જ પરિણામ છે કે, નાના શહેરોથી માંડીને મહાનગરોમાં નાણાં ખંખેરી બોગસ ડિગ્રી આપતી ગેરકાયદેસર સંસ્થાઓનો રાફડો ફાટી નીકળ્યો છે. ત્યારે સાબરકાંઠા જિલ્લામાંથી પણ નાણાં વસૂલી બોગસ ડિગ્રી પધરાવતી એક બનાવટી ઇન્સ્ટિટ્યૂટનો પર્દાફાશ થયો છે. આ સંસ્થા વિદ્યાર્થીઓ સાથે કેવી રીતે કરતી હતી છેતરપિંડી તે જોઈએ આ અહેવાલમાં.
જો તમારે ફાયર ઓફિસર બનવું હોય કે નર્સ. તમે માત્ર પૈસો ફેંકો અને ડિગ્રી લઈ જાઓ. આ ખેલ ચાલી રહ્યો છે સાબરકાંઠા જિલ્લામાં. જ્યાં નકલી ડિગ્રી બનાવી આપવાનો વેપાર ધમધમી રહ્યો છે. સાબરકાંઠા જિલ્લાનાં હિંમતનગરમાં ચાલતી દયાની ઇન્સ્ટિટ્યૂટનાં છે. આ ઈન્સ્ટિચ્યૂટ નર્સિંગનો પેરામેડિકલ કોર્સ અને ફાયર સેફ્ટી એન્જીનિયરિંગનો કોર્સ ચલાવી રહી છે. આ એક એવી બોગસ ઈન્સ્ટિટયૂટ છે. જે વિદ્યાર્થીઓને લલચાવીને પૈસા ખંખેરીને પછી એવું ડિગ્રી સર્ટિફિકેટ આપે છે જે સરકારી નોકરી માટે ક્યાંય પણ માન્ય ગણાતું નથી. બોગસ ડિગ્રીનાં કાળા કારોબારીઓ વિદ્યાર્થીઓને તે પોતાની જાળમાં ફસાવે છે.
લાગી રહ્યું છે કે બોગસ ડિગ્રીની હાટડી માંડીને બેઠેલા ધંધાદારીઓ એ ડિગ્રીની ચિંતા કરનારાઓની બધી ચિંતા દૂર કરી દેશે પરંતુ તે માટે તમારે નાણાં છૂટા મૂકવા પડશે. કેમ કે આ સંસ્થા જેને ભણ્યા વગર ડિગ્રી લેવી છે તેને 18 જેટલા કોર્સનાં ડિગ્રી સર્ટી આપવામાં મહારથ ધરાવે છે અને તે માટે આ દયાની ઈન્સ્ટિટયૂટ વિદ્યાર્થીઓનાં ભવિષ્યની જરા પણ દયા રાખ્યા વગર તેમની પાસેથી 20 હજારથી લઈને રૂપિયા 4 લાખ સુધીની ફી વસૂલે છે. વિદ્યાર્થીઓને આકર્ષવા માટે આ સંસ્થા ઊંચી સ્કોરશિપની લાલચ પણ આપે છે. પરંતુ જ્યારે વિદ્યાર્થી અહીંથી ડિગ્રી લઈ નોકરીનાં માર્કેટમાં જાય છે ત્યારે તેમને છેતરાયા હોવાનું ભાન થાય છે.
હિંમતનગરમાં દયાની ઈન્સ્ટિટયૂટનાં નામે ચાલતી આ બોગસ ઈન્સ્ટિટયૂટ પાસે કોઈ બિલ્ડિંગ નથી, કોઈ મેદાન નથી કે નથી કોઈ પ્રેક્ટિકલ માટેની વ્યવસ્થા. બસ માત્ર બે દુકાનમાં બેંચ ગોઠવીને તેને ઈન્સ્ટિટયૂટ તરીકે રજૂ કરવામાં આવી રહી છે. એટલે સુધી કે આ ઈન્સ્ટિટયૂટે નર્સિગ કોર્સ માટે કે એન્જીનિયરિંગ કોર્સ માટે રાજ્ય સરકારમાં સંબંધિત ખાતામાં રજિસ્ટ્રેશન પણ કરાવ્યું નથી.
કોઈ પણ જાતનાં રજિસ્ટ્રેશન વગરી આ ઈન્સ્ટિટયૂટ વિદ્યાર્થીઓ પાસેથી કોર્સ પ્રમાણે જે ફી ઊઘરાવે છે તેનાં આંકડાઓ જો જોશો તો તમે ચોંકી જશો. GNM નર્સિંગ કોર્સની ફી 3થી 4 લાખ રૂપિયા. નર્સિંગ આસિસ્ટન્ટ કોર્સની ફી 20થી 25 હજાર રૂપિયા, મેડીકલ લેબ ટેક્નિશિયન કોર્સની ફી 20થી 25 હજાર રૂપિયા. હેલ્થ સેનેટરી ઈન્સ્પેક્ટર કોર્સની ફી 30 હજાર રૂપિયા.
GNM નર્સિંગ -3થી 4 લાખ રૂપિયા
નર્સિંગ આસિસ્ટન્ટ -20થી 25 હજાર
મેડીકલ લેબ ટેકનિશિયન -20થી 25 હજાર
હેલ્થ સેનેટરી ઈન્સ્પેક્ટર -30 હજાર
ઓપરેશન થિયેટર ટેકનિશિયન -70 હજાર
ફીમેલ હેલ્થ વર્કર -20થી 25 હજાર
ડિપ્લોમા ઈન ફાયર સેફ્ટી -20થી 25 વર્ષ
ફાયર મેન -25 હજાર
હોસ્પિટલ આસિસ્ટન્ટ ટેકનિશિયન -20થી 25 હજાર
લાઈવ સ્ટોક ઈન્સ્પેક્ટર -20થી 25 હજાર
BSC નર્સિંગ -3થી 4 લાખ
ઈમરજન્સી મેડિકલ ટેકનિશિયન -30 હજાર
ડેન્ટલ ટેકનોલોજી -70 હજાર
જનરલ ડ્યુટી આસિસ્ટન્ટ -20 હજાર
ડેન્ટલ લેબ ટેકનિશિયન -70 હજાર
ફિઝીયોથેરાપી ટેકનોલોજી -70 હજાર
ડાયાલીસીસ ટેકનિશિયન -70 હજાર
બ્લડ બેંક ટેકનિશિયન -70 હજાર
ઓપરેશન થિયેટર ટેકનિશિયન કોર્સની ફી 70 હજાર રૂપિયા તો ફીમેલ હેલ્થ વર્કર કોર્સની ફી 20થી 25 હજાર રૂપિયા. ડિપ્લોમા ઈન ફાયર સેફ્ટી કોર્સની 20થી 25 હજાર રૂપિયા. ફાયરમેન કોર્સની ફી 25 હજાર રૂપિયા અને BSC નર્સિંગ કોર્સની ફી 3થી 4 લાખ રૂપિયા આ બોગસ સંસ્થા વસૂલી રહી છે. આ ડિગ્રીઓ અને તેનાં ભાવનું લિસ્ટ લાંબુ પરંતુ આપની જાણકારી માટે આટલું પૂરતું છે. જ્યારે આ ડિગ્રી નોકરી મેળવવા માટે ગેરલાયક ઠરી તો વિદ્યાર્થીઓનાં અસંતોષમાંથી ફરિયાદ ઊભી થઈ અને આખો મામલો પહોંચ્યો ચીફ ડિસ્ટ્રીક્ટ હેલ્થ ઓફિસર પાસે. જેમણે આ કિસ્સાને મેડિકલ સેવા માટે જોખમરૂપ ગણાવ્યો છે.
ડિગ્રીઓની આવી દુકાનોમાંથી આવી ડિગ્રી સહેલાઈથી મળી જાય છે. પરંતુ નોકરીનાં બજારમાં તેની કોઈ કિંમત હોતી નથી. કદાચ બોગસ ઈન્સ્ટીટયૂટ ચલાનારા વગના જોરે છટકી જશે પરંતુ આવી સંસ્થાઓનાં ભરોસે જે વિદ્યાર્થીઓએ પોતાનો અમૂલ્ય સમય વેડફ્યો હોય છે તેની આજીવન ભરપાઈ થતી નથી. આવાં કિસ્સાઓમાં સરકાર, વિદ્યાર્થીઓ અને તેમના વાલીઓએ સાવચેતીપૂર્વક આગળ વધવાની જરૂર છે.