ઉત્તર પ્રદેશના મેરઠમાંથી નકલી ક્રિકેટ સટ્ટાકાંડ ઝડપાયુ. પોલીસે બે આરોપીને ઝડપી પાડ્યા, યુપી સટ્ટાકાંડનું મહેસાણા કનેક્શન આવ્યુ સામે
યુપીમાંથી પણ મહેસાણા જેવુ સટ્ટાકાંડ ઝડપાયું
મહેસાણા સટ્ટાકાંડનો આરોપી યુપીમાં પણ સંડોવાયેલો
યુપી પોલીસે બે આરોપીની કરી ધરપકડ
મહેસાણાના વડનગર તાલુકાના મોલિપુર ગામમાં નકલી ક્રિકેટ સટ્ટાકાંડ ઝડપાયા બાદ ઉત્તર પ્રદેશમાંથી પણ નકલી ક્રિકેટ સટ્ટાકાંડ ઝડપાયુ છે. મહેસાણાના મોલિપુરમાં ભાડાના ખેતરમાં ક્રિકેટ રમાડી રશિયામાં બેઠેલો આસિફ મોહમદ રશીયાના લોકો પાસે મોટી મેચ બતાવી ક્રિકેટ મેચ પર સટ્ટો લગાવતો હતો. જે વ્યક્તિ યુપીમાંથી ઝડપાયેલ સટ્ટાકાંડમાં સંડોવાયેલો હોવાનું સામે આવ્યું છે.. આ કેસમાં અશોક ચૌધરી અને આસિફ મોહમફ વિરુદ્ધ યુપી પોલીસે પણ ગુનો દાખલ કર્યો છે.
મોટી મેચમાં રમવાની ખેલાડીઓને લાલચ અપાતી
યુપીમાં જે સટ્ટાકાંડ સામે આવ્યો તેની મોડસ ઓપરેન્ડી મહેસાણાના સટ્ટાકાંડ જેવી જ હતી. યુપીના મેરઠમાં ક્રિકેટ ગ્રાઉન્ડ ભાડે રાખવામાં આવ્યુ હતુ અને ત્યાના લોકલ ખેલાડીઓને મેચ રમવા બોલાવવામાં આવતા. તેઓને કહેવામાં આવતુ કે તમારુ પર્ફોમન્સ જોઇને મોટી ટીમમાં સિલેક્શન કરીશું. અંદાજે 40 હજાર રૂપિયા ભાડુ આપીને નકલી મેચ રમાડવામાં આવતી હતી. અને આરોપી અશોક ચૌધરી મેચ રમાડવાના 30 થી 40 હજાર રૂપિયા શિતાબ ઉર્ફ શબ્બુને આપતો હતો.
કેવી રીતે રમતા હતા નકલી ક્રિકેટ સટ્ટો
આ કાંડનો મુખ્ય આરોપી શિતાબ ઉર્ફે અબ્બુ છે જે પોતે ક્રિકેટર છે. તે અગાઉ રશિયામાં ક્રિકેટ મેચ રમીને આવ્યો હતો. તેનો સંપર્ક આસિફ મહમદ જોડે થયો. આસિફે જ શિતાબને નકલી ક્રિકેટ મેચ રમાડવાની ઓફર કરી હતી. મહેસાણા જેવી જ પદ્ધતિથી નકલી મેચ રમાડીને રશિયામાં લાઇવ કરતો હતો. યુપીના મેરઠમાં રમાતી મેચોને પંજાબ લીગ નામ આપવામાં આવ્યુ હતું. આ મામલે યુપી પોલીસે બે આરોપીની ધરપકડ કરી છે.
ખેલાડીઓને એક મેચ રમવા એક રૂપિયો પણ ન અપાયો
યુપીમાંથી ઝડપાયેલા સટ્ટાકાંડમાં ખેલાડીઓને મેચ રમવા બદલ એક પણ રૂપિયો આપવામાં આવતો ન હતો. તેઓને મોટી મેચમાં રમવાની લાલચ આપવામાં આવતી હતી. આરોપી આસિફ મહમદ રશિયાથી જ આખી મેચ હેન્ડલિંગ કરતો હતો. જે મહેસાણા સટ્ટાકાંડમાં પણસંડોવાયેલો છે. આ મામલે મહેસાણા પોલીસ મેરઠ જવા રવાના થઇ છે.
મહેસાણામાં પણ ઝડપાયુ હતું નકલી સટ્ટાકાંડ
મહેસાણાના વડનગર તાલુકાના મોલિપુર ગામમાં ક્રિકેટ સટ્ટો રમાડવા માટે ખેતરમાં મેદાન બનાવાયું હતું. લાઈવ ટેલિકાસ્ટ કરી રશિયામાં બેઠેલા સટ્ટોડિયાની મદદથી મેચ ફિક્સ કરી સટ્ટો રમવામાં આવતો. મહેસાણા SOG પોલીસને ખેતરમાં સટ્ટો રમવા માટે બનાવેલા મેદાનની જાણ થઈ ત્યારે રેડ કરી 4 જેટલા શખ્સને ઝડપી લીધા હતા. આ ગામમાં દાવડા સોએબ અબ્દુલ મજીદ નામના શખ્સે સટ્ટો રમાડવા માટે આખું મેદાન તૈયાર કર્યું હતું.અને આ મેદાનમાં 20 ઓવરની મેચ રમવામાં આવતી. જો કે મેચ રમવા માટે આવતા તમામ ખેલાડીને કેવી રીતે રમવું ક્યારે આઉટ થવું અને ક્યારે કેટલા રન કરવા તેની સૂચના પહેલેથી જ આપવામાં આવતી.