નોઇડાના સેક્ટર નંબર-24ની પોલીસે કેટલાય રાજ્યોની પોલીસના માથાનો દુખાવો બનેલ એક લૂંટારા દુલ્હાને અને તેની કથિત બહેનની દબોચી લીધા છે. દિલ્હી પોલીસની ઝપટે ચડેલ બંન્ને આરોપીએ અલગ-અલગ શહેરમાં મેટ્રોમોનિયલ સાઇટથી નંબર લઇને છોકરીઓને લગ્નજાળમાં ફસાવતા હતા.
જે છોકરીઓ આ લોકોની માયાજાળમાં ફસાઇ જતી હતી તેમની પાસેથી પૈસાની છેતરપિંડી કરવામાં આવતી હતી. પોલીસની ઝપટે ચડેલ આ વ્યક્તિ જે છોકરીના સંપર્કમાં આવતો તેને પોતે એક ન્યૂઝ ચેનલનો ડાયરેક્ટર હોવાની વાત કરતો હતો. પોતાની સેલેરી 20 લાખ પ્રતિમાસ હોવાની પણ વાત કરતો અને છોકરીઓને મોહમાયામાં ફસાવતો.
ઝડપાયેલ આરોપીની કથિત બહેન પોતાને કેન્સરની દર્દીની ઓળખ આપતી હતી અને વિવિધ ક્ષેત્રની છોકરીઓને પોતાના ભાઇ સાથે લગ્ન કરી લેવા માટે રાજી કરતી હતી. નોઇડા પોલીસની ઝપટે આવેલ આ બંન્ને આરોપીઓ સામે છેતરપિંડીની ફરિયાદ નોંધાયેલ છે જેમાં એપ્રિલ 2017માં દિલ્હીની એક નર્સ પાસેથી 40 લાખ પડાવી લીધા હતા અને બન્ને ફરાર થઇ ગયા હતા.
નોઇડા પોલીસે ઝડપી લીધેલ બંન્ને આરોપીઓ છેલ્લા કેટલાક સમયથી કેટલાક રાજ્યોની પોલીસનો માથાનો દુ:ખાવો બન્યા હતા.
આ મામલે સ્થાનિક SPના જણાવ્યા અનુસાર આરોપીઓ ગત વર્ષે દિલ્હી સ્થિત નોઇડાની એક નર્સના સંપર્કમાં આવ્યો હતો અને પોતાને નોઇડાની એક ન્યૂઝ કંપનીનો માલીક ગણાવી 18 એપ્રીલ 2017માં તે છોકરી સાથે લગ્ન કર્યા હતા. આપને જણાવી દઇએ કે લગ્ન કર્યા બાદ 10 દિવસ સુધી આ આરોપીએ છોકરીને હનીમૂનના નામ પર કાશ્મીરમાં ફેરવી હતી. આ ઘટના બાદ પીડિતાની માતાના રિટાયરમેન્ટ સમયે 40 લાખની રકમ લઇ તે ફરાર થઇ ગયો હતો.
ઉલ્લેખનીય છે કે પતિ દ્વારા કરવામાં આવેલ આ પ્રકારની ઠગાઇથી વ્યથિત થઇ ગયેલી નર્સે નજીકના પોલીસ મથકમાં આ મામલે ફરિયાદ નોંધાવી હતી.
આ ઘટનાની નોંધ લઇને સ્થાનિક પોલીસે તપાસ કરતા આ વ્યક્તિએ ભોપાલમાં પણ એક ઓફિસ ખોલીને એક HR મેનેજર અને ત્યારબાદ બનારસની એક મહિલા સાથે આ પ્રકારને છેતરપિંડી આચરી હતી. ત્યારે તાજેતરમાં લૂંટારુ દુલ્હાને પોલીસે ઝડપી લીધા છે અને પ્રાથમિક તપાસ હાથ ધરી હતી.