ગોલમાલ / કૌભાંડ: ન્યુ હરિશચંદ્ર સોસાયટીમાં જ નકલી આધારકાર્ડનો ધીકતો ધંધો, કોની છે રહેમ નજર?

• નકલી આધારકાર્ડ બનાવવાનું કૌભાંડ ઝડપાયું
• રવિકાન્ત શર્માની ધરપકડ
• લેપટોપ, મોબાઈલ અને ફિંગરપ્રિન્ટ મશીન જપ્ત

શહેરની રામોલ પોલીસે રવિકાન્ત શર્મા નામના ભેજાબાજની ધરપકડ કરી છે. જે પંદરેક દિવસથી ઘરની બહાર જ એક ઓફિસ ખોલીને બેઠો હતો. આમ તો તે પાનકાર્ડ, લાયસન્સ બનાવી આપવાનું કાયદેસર કામ કરે છે. પણ છેલ્લા પંદરેક દિવસથી તેને આધારકાર્ડમાં ફ્રોડ કરવાનું કામ શરૂ કર્યું હતું. આ શખસ લોકોને 100થી 150 રૂપિયામાં આધારકાર્ડમાં સુધારો કરી આપતો હતો. ફોર્મમાં મામલતદાર નો સિક્કો તો હોય જ જેથી તે અધિકારીની ખોટી સહીઓ કરી તે ફોર્મ અપલોડ કરી દેતો હતો.  જોકે જે અધિકારી એટલે કે મામલતદાર ની સહી કરતો હતો તે મામલતદાર નહિ પણ નાયબ મામલતદાર હોવાનું તપાસમાં સામે આવ્યું છે. જોકે ગઠિયાની કારીગરી જોઈને ખુદ પોલીસ પણ ચોંકી ઉઠી હતી. 

ન્યુ હરિષચંદ્ર સોસાયટીમાં જ નકલી આધારકાર્ડનો ધંધો

આરોપી રામોલમાં આવેલી ન્યુ હરિષચંદ્ર સોસાયટીમાં જ રહે છે અને ઘરની બહાર આવેલી અશ્વિત એન્ટરપ્રાઇઝ નામની દુકાન ખોલી આરોપીએ આ ફ્રોડ કરવાનું કામ શરૂ કર્યું હતું. રવિકાન્ત શર્માએ લેપટોપ અને ફોનથી અસારવા મામલતદાર ના નામથી આધાર એનેક્સર ફોર્મ પર બનાવતી બનાવતી સહી સિક્કા કરી ઓનલાઈન ગ્રાહકોના આધાર કાર્ડ માં લોકોના રહેઠાણ સરનામા માં ફેરફાર કરી નવા આધાર કાર્ડ બનાવી આપ્યા હતા.

અસારવા મામલતદારનો ગોળ સિક્કો

આરોપીના લેપટોપમાંથી identification authority of india નામનું પેજ પણ મળી આવ્યું હતું. અને લેપટોપમાં વિન્ડોઝ ફોટો વ્યૂઅર નામનું ફોલ્ડર પણ ખુલ્લું હતું.. જે ફોલ્ડરમાં સર્ટિફિકેટ ફોર આધાર એનરોલમેન્ટ / અપડેટ લખેલું એક ફોર્મ પણ હતું. અને આ ફોર્મમાં વચ્ચે એક મહિલાનો ફોટો હતો અને તેની વચ્ચે અસારવા મામલતદારનો ગોળ સિક્કો મારેલો હતો. અને આજ સિક્કાના ચાર અલગ અલગ ફોટો પણ મળી આવ્યા હતા.

આવા કેટલા કાર્ડ બનાવ્યા તે અંગે તપાસ 

તપાસમાં સામે આવ્યું કે આરોપી જે અસારવા મામલતદાર લખેલો સિક્કો મારી તેની પર વસંત પટેલ ગેઝેટેડ ઓફિસર-બીની સહી કરતો તે નાયબ મામલતદાર છે. જોકે અત્યારસુધીમાં આરોપીએ કેટલા લોકોને આવા આધારકાર્ડ બનાવી આપ્યા તે બાબતે તપાસ શરૂ કરાઇ છે.