ક્રાઈમ / કપાતર દીકરો ! પત્નીને રાજી રાખવા બીમાર માતાને નદીમાં ફેંકીને મારી નાખી, કિસ્સો જાણીને દ્રવી ઉઠશો

• કર્ણાટકના યાદગિર જિલ્લાની ચોંકવનારી ઘટના
• દોસ્તની સાથે મળીને કરી માતાની હત્યા
• પત્ની બીમાર સાસુથી છૂટકારો મેળવવા માગતી હતી

કર્ણાટકના યાદગિર જિલ્લામાં બનેલી એક અત્યંત ચોંકાવનારી પરંતુ માથુ શરમથી ઝુકી જાય તેવી એક ઘટનામાં કળીયુગી દીકરાએ પોતાની સગી જનેતાને નદીમાં ફેંકીને મારી નાખી હતી અને કારણ એટલું જ કે પત્નીને બીમાર સાસુની સેવા અને દેખરેખ રાખવાનું કઠતું હતું તેથી તેણે તેના પતિને આ વાતનો નિકાલ લાવવાનું કહ્યું અને કમભાગી દિકરાએ પત્નીનું કહ્યું માનીને તેનો નિકાલ પણ લાવી દીધો. યાદગિર જિલ્લામાં રહેતો 38 વર્ષીય ભીમાશંકર યાલિમેલી નામના વ્યક્તિએ તેના મિત્ર મુત્તપાની મદદથી આવું કાળું કામ કર્યું હતું અને પોતાની સગી જનેતાને નદીમાં ફેંકી દીધી હતી. 

હોસ્પિટલ લઈ જવાને બહાને લઈ ગયો નદી પાસે
માતા રચમ્મા છેલ્લા ઘણા સમયથી બીમાર હતી અને તેથી હોસ્પિટલ લઈ જવાને બહાને પુત્ર ભીમાશંકર માતાને નદી પાસે લઈ ગયો અને મિત્રની મદદથી માતાને ભીમા નદીમાં ફેંકી દીધી હતી. 

મહિલાની લાશ નદીમાં તરતી મળી આવી
બુધવારે જ્યારે મહિલાની લાશ પાણીમાં જોવા મળી ત્યારે આ ઘટના સામે આવી હતી. પોલીસે આ કેસમાં હત્યાનો ગુનો દાખલ કરીને આરોપીની ધરપકડ કરી હોવાનું પણ જણાવાઈ રહ્યું છે.

પત્ની બીમાર માતાથી છૂટકારો મેળવવા માગતી હતી
આરોપીએ પોલીસ પૂછપરછમાં જણાવ્યું હતું કે માતા બીમાર હતી અને પત્નીને તેની સેવા કરવી પડી હતી,પત્નીને આ કામ કરવું ગમતું નહોતું અને તે બીમાર માતાથી છૂટકારો મેળવવા માગતી હતી અને તેથી તેણે આવું કર્યું હતું.