ટેકનોલોજી / ગુગલ, એપલને ટક્કર આપવા ફેસબુક પણ લાવી રહ્યું છે મોબાઇલ ઓપરેટિંગ સિસ્ટમ

ફેસબુક હાર્ડવેરના વાઇસ પ્રેસિડેન્ટ એન્ડ્ર્યુ બોસવર્થ કહે છે કે અમે સાબિત કરવા માગીએ છીએ કે અમારું હવે પછીનું લક્ષ્ય અંતરિક્ષ છે. અમારે બીજા પર નિર્ભર રહેવું નથી અને બધું જાતે જ કરવા માંગીએ છીએ. એક અહેવાલ મુજબ કેલિફોર્નિયામાં ફેસબુક 77 હજાર ચોરસ ફૂટમાં એક નવું કેમ્પસ બનાવી રહ્યું છે. જેમાં 4 હજાર કર્મચારીઓ કામ કરી શકશે. અહેવાલમાં દાવો કરવામાં આવ્યો છે કે કંપની સિલિકોન ચિપ્સ અને આર્ટિફિશિયલ ઇન્ટેલિજન્સની મદદથી વોઇસ આસિસ્ટન્ટ બનાવી રહી છે. જેનો ઉપયોગ ઓપરેટિંગ સિસ્ટમ ડેવલપ કરવામાં થશે.

અગાઉ ફેસબુકે પોતાનો મોબાઇલ ફોન અને સોફ્ટવેર બનાવ્યું હતું પરંતુ આ પ્રોજેક્ટ નિષ્ફળ ગયો હતો. ફેસબુકે 'પ્રોજેક્ટ ઓક્સિજન' પણ અમલમાં મુકયો હતો. જેનાથી ગુગલ પ્લે સ્ટોર  ફેસબુકની કોઇ એપ બ્લોક કરે કે ઉપયોગની પરમિશન ન આપે તો યુઝર્સ તેને અન્ય પ્લેટફોર્મથી ડાઉનલોડ કરી શકતા હતા.

ઉલ્લ્ખનીય છે કે ચીનની જાયન્ટ ટેક કંપની હુઆવેએ પણ પોતાની હાર્મની નામની ઓપરેટિંગ સિસ્ટમ  બનાવી છે. હુઆવેના જણાવ્યા મુજબ 2020થી તેના ફોન આ ઓએસ સાથે લોન્ચ કરાશે. હુઆવે પર અમેરિકાએ મુકેલા પ્રતિબંધ બાદ ગુગલે તેની તમામ સર્વિસ આપવાનું બંધ કર્યું છે. જોકે હુઆવે કહે છે કે  હાર્મોની ઓએસ વિશ્વભરમાં રહેશે પરંતુ હાલ એન્ડ્રોઇડને બાકાત રાખવામાં નહીં આવે. જો અમેરિકાની સરકાર ગુગલની એન્ડ્રોઇડ સર્વિસના ઉપયોગ પર પ્રતિબંધ ચાલુ રાખશે તો અમે માત્ર અમારી ઓપરેટિંગ સિસ્ટમનો ઉપયોગ કરીશું.