કોરોના વાયરસ / ફેસબુકના COOએ ગુજરાતના શિક્ષકો અને વિદ્યાર્થીઓના આ પ્રયાસના વખાણ કરતી પોસ્ટ કરી શેર

• કોરોના વાયરસને લઇને ગુજરાતના શિક્ષકોનો ઉત્તમ પ્રયાસ
• ફેસબુક અને ઇન્સ્ટાગ્રામમાં સેન્ડબર્ગે પોસ્ટ શેર કરી
• ગુજરાતના શિક્ષકો અને વિદ્યાર્થીઓના વખાણ કર્યા

ગુજરાતમાં હાલ તમામ શાળા અને કોલેજોમાં બે સપ્તાહનું વેકેશન આપી દેવાયું છે. ત્યારે રાજ્યના શિક્ષકો અને વિદ્યાર્થીઓએ જે સરળતાથી હાથને ધોવા ઉપરાંત એકંદર સ્વચ્છતા જાળવવાની બાબતને સરળતાથી સમજાવતો વીડિયો બનાવ્યો છે. આ શિક્ષકો અને વિદ્યાર્થીઓના પ્રયાસનો COO શેરિલ સેન્ડબર્ગે પોતાની પોસ્ટમાં ઉલ્લેખ કર્યો છે. ફેસબુક પરના ફોલોઅર્સને માહિતગાર કર્યા છે કે લોકોને સુમાહિતગાર રાખવા ફેસબુક અમેરિકાના શિક્ષણ વિભાગ સાથે સતત કાર્યશીલ છે.

સેન્ડબર્ગની આ પોસ્ટને ફેસબુક અને ઈન્સ્ટાગ્રામ પર શેર કરવામાં આવી છે. આ પોસ્ટમાં સેન્ડબર્ગે લખ્યું છે કે, COVID-19 મહામારીના આ કટોકટીના સમયગાળામાં પોતાના બાળકો અને સમુદાયના લોકોને તેની રોકથામ માટે ઉપયોગી પગલાં વિશે માહિતગાર રાખવા બદલ ગુજરાતના શિક્ષકો, શિક્ષણ અધિકારીઓ અને વિદ્યાર્થીઓના આ શ્રેષ્ઠ પ્રયાસ બદલ હું તેમનો આભાર માનું છું. ગુજરાતમાં 1 લાખ શિક્ષકો અને હજારો સ્કૂલો ‘વર્કપ્લેસ બાય ફેસબુક’નો ઉપયોગ કરી રહ્યા છે જે ઓનલાઈન ટીમ કોલેબોરેશન ટૂલ છે. આ ટૂલનો ઉપયોગ કોવિડ-19 મહામારીની રોકથામનાં પગલાં, સલાહ-સૂચન અને અધિકૃત સમાચારના ફેલાવા માટે કરાઈ રહ્યો છે.

અમરગઢ પ્રા. શાળામાં વિદ્યાર્થીના વીડિયોનો સ્ક્રીનશોટ શેર કરીને ફેસબુક સીઓઓએ લખ્યું કે, બાળકોને હાથ ધોવા પ્રોત્સાહિત કેવી રીતે કરવા તે શીખવાય છે, અમે ગુજરાતના શિક્ષણ વિભાગ સાથે પણ સહકાર સાધવા પર કામ કરી રહ્યા છીએ. આ પાછળનો હેતુ લોકોને માહિતગાર રાખવા લાઈવ સેશન હાથ ધરવાનો છે. આ શેર ઓનલાઈન થઈ ત્યારથી ફેસબુક અને ઈન્સ્ટાગ્રામ પર તેને 700થી વધુ લાઈક્સ મળી છે અને હજારો કોમેન્ટ આવી છે.