શહેરના ગુરુકુળમાં રહેતી એક પરિણીત મહિલાને સોશિયલ મીડિયાથી વિદેશમાં રહેતા એક યુવક સાથે દોસ્તી કરવાની મોંઘી સાબિત થઇ છે. ફેસબુક ફ્રેન્ડે મહિલા માટે ગિફ્ટ મોકલી છે તેને કસ્ટમથી છોડાવવાની છે તેમ કહીને સાડા સાત લાખ રૂપિયા પડાવી લીધા હતા.
ફેસબુક પર વિદેશી યુવક સાથેની દોસ્તી પરિણીતાને ભારે પડી
ગુરૂકુળ રોડ પરના એક કોમ્પ્લેક્સમાં રહેતી ૪૭ વર્ષીય મહિલાની થલતેજ નજીક દુકાન છે, જેણે સાયબર ક્રાઇમમાં ફેસબુક ફ્રેન્ડ તેમજ તેના બે સાગરીતો વિરુદ્ધમાં સાડા સાત લાખ રૂપિયાના ચીટિંગની ફરિયાદ કરી છે. મહિલાનાં લગ્ન ર૦૧૦માં થયાં હતાં, પરંતુ પતિ સાથે મનમેળ ન હોવાથી કોઇ સારું પાત્ર મળશે તો લગ્ન કરી લેશે તેવી વાત મહિલાએ તેના પતિને કરી હતી.
મહિલાને ફેસબુક પર આવી ફ્રેન્ડ રિક્વેસ્ટ
ચારેક માસ પહેલાં મહિલાને ફેસબુક પર બેન મોરિસ નામના આઇડી પરથી ફ્રેન્ડ રિક્વેસ્ટ આવી હતી, જે એક્સેપ્ટ કર્યા બાદ બેન મોરિસ અને મહિલાએ મોબાઇલ નંબરની આપલે કરી હતી. મોરિસે કન્સ્ટ્રક્શન કંપનીમાં સિવિલ એન્જિનિયર હોવાનું તેમજ પોતે વિધુર હોવાનું મહિલાને કહ્યું હતું. મોરિસ પોતે ભારત આવવાનો છે અને છ મહિના રોકાવવાનો છે તેમ મહિલાને જણાવ્યું હતું.
મોરિસે મહિલા સાથે લગ્ન કરવાનો મૂક્યો પ્રસ્તાવ
મોરિસે મહિલા સાથે લગ્ન કરવાનો પ્રસ્તાવ મૂક્યો હતો. ત્યાર બાદ મોરિસે મહિલાને ગિફ્ટમાં હેન્ડબેગ, લેડીઝ વેર, જ્વેલરી, રોલેક્સ ઘડિયાળ, ડાયમંડ રિંગ, ગોલ્ડ એરિંગ્સ, ગોલ્ડ નેકલેસ, આઇફોન 7S મોકલ્યાં હોવાનું કહ્યું હતું. તે પછી મહિલા પર સુમિતા ચૌધરી નામની કસ્ટમ ઓફિસરનો ફોન આવ્યો હતો અને ગિફ્ટ છોડાવવા ડ્યૂટી ભરવાની વાત કરી હતી.
ઓફિસરની ખોટી ઓળખ આપી મહિલા પાસેથી પડાવ્યાં પૈસા
સુમિતા ચૌધરીએ મહિલાને કસ્ટમ કસ્ટમ ડ્યૂટી પેટે પચાસ હજાર રૂપિયા ભરાવ્યા હતા. થોડાક દિવસ પછી સુમિતાએ ફરીથી ફોન કર્યો હતો અને કહ્યું હતું કે ગિફ્ટનું પાર્સલ સ્કેન કરતાં હતાં, જેમાં પાઉન્ડ અને કીમતી વસ્તુ છે, જે કરન્સી કન્વર્ટ ચાર્જ તરીકે બે લાખ રૂપિયા ભરવા પડશે. સુમિતા ચૌધરી અને અન્ય શખ્સે બેન્ક ઓફિસરની ઓળખ આપી બેન મોરિસ સાથે મળીને કુલ સાડા સાત લાખ રૂપિયા ગિફ્ટ છોડાવવા માટે મહિલા પાસેથી પડાવ્યા હતા.
મહિલાએ છેતરપિંડી થયાની શંકા બાદ તપાસ કરાવી
ઓનલાઈન સાડા સાત લાખ રૂપિયા ટ્રાન્સફર કરાવ્યા બાદ મિનિસ્ટ્રી ઓફ ફાઇનાન્સ ડિપાર્ટમેન્ટ ઓફ રેવન્યૂનું ખોટું સર્ટિફિકેટ પણ મહિલાને બેન મોરિસે વોટ્સએપ પર મોકલાવ્યું હતું. મહિલાને પોતાની સાથે છેતરપિંડી થયાની શંકા થતાં તેણે તપાસ કરાવી હતી, જેમાં તેને બેન મોરિસ સહિતના લોકો બોગસ હોવાનું જાણવા મળતાં તેણે સાયબર ક્રાઇમમાં ફરિયાદ નોંધાવી હતી. સાયબર ક્રાઇમે આ મામલે ગુનો દાખલ કરીને તપાસ શરૂ કરી છે. પોલીસને શંકા છે કે બેન મોરિસના નામે કોઇ ભારતીય ગઠિયાએ આ ચીટિંગ આચર્યું હોઇ શકે છે. ઉલ્લેખનીય છે કે અગાઉ પણ આ પ્રકારની મોડસ ઓપરેન્ડી ધરાવતી ટોળકીઓએ અનેક મહિલાઓ સાથે લાખો રૂપિયાનું ચીિટંગ કર્યું છે.