ધમકી / લોરેન્સ બિશ્નોઈ ગેંગની ગુજરાત પર નજર! બિઝનેસમેનના પરિવારને જાનથી મારવાની ધમકી, 25 લાખની કરી માંગ

• મોરબીના સિરામિક ઉદ્યોગપતિ પાસે ખંડણીની માંગ
• લોરેન્સ બિશ્નોઇ ગેંગના માણસના નામે ઉદ્યોગપતિ પાસે માંગી ખંડણી
• 25 લાખ રૂપિયાની ખંડણી માંગ

કુખ્યાત ગેંગસ્ટર લોરેન્સ બિશ્નોઇ વધુ એકવાર ચર્ચામાં આવ્યો છે. પંજાબી સિંગર સિદ્ધુ મુસેવાલાની હત્યાના આરોપમાં જેલમાં બંધ બિશ્નોઇની ગેંગે ગુજરાતના એક ઉદ્યોગપતિ પાસે ખંડણી માંગી. લોરેન્સ બિશ્નોઇ ગેંગના માણસના નામે મોરબીના ઉદ્યોગપતિ પાસે 25 લાખની ખંડણી માંગી. વોટ્સએપ પર મેસેજ, ઑડિયો, વીડિયો મોકલાવી ખંડણી માંગી. અજાણ્યા શખ્સે પોતાનું બેંક એકાઉન્ટ, પેટીએમ સહિતની ડિટેઇલ પણ મોકલી આપી.  આટલું જ નહીં ફરીયાદીના મોબાઇલમાં રીવોલ્વર તથા કાર્ટીઝનો વિડીયો મુકી મૃત્યુનો ભય બતાવ્યો હતો.

જો રૂપિયા નહી મોકલાવે તો...

જો રૂપિયા નહીં મોકલાવે તો ઉદ્યોગપતિ સહિતના પરિવારને જાનથી મારવાની પણ ધમકી આપી. આ મામલે ઉદ્યોગપતિએ મોરબી સિટી એ ડિવિઝન પોલીસ સ્ટેશને ફરિયાદ નોંધાવી છે. લોરેન્સ બિશ્નોઇ ગેંગના માણસની ઓળખ તથા મોબાઇલ નંબર, વીડિયો અને ઓડિયો સહિતની માહિતી પોલીસને આપીને પોલીસે તેની સાથે સંડોવાયેલા શખ્સોની સામે ફરિયાદ નોંધી. પોલીસે IPC કલમ 384, 387, 507 511 મુજબ ગુનો નોંધીને આરોપીને ઝડપી પાડવા તપાસના ચક્રોગતિમાન કર્યા.

સિધ્ધુ મુસેવાલા બાદ સલમાન ખાન હતો ટાર્ગેટ

મશહૂર પંજાબી સિંગર અને રેપર સિધ્ધુ મુસેવાલાની હત્યા પછી ગેંગસ્ટર લોરેન્સ બિશ્નોઇ ઘણો ચર્ચામાં છે. ગેંગસ્ટર લોરેન્સ બિશ્નોઇએ સિધ્ધુ મુસેવાલાના હત્યાની જવાબદારી લીધી હતી અને તેનો બીજો નિશાનો સલમાન ખાનને બનાવ્યો હતો. ગયા મહિને જ સલમાન ખાનના પિતા એક્ટર સલીમ ખાનને મોર્નિંગ વોક સમયે એક ધમકી ભર્યો પત્ર મળ્યો હતો. જે પછી બૉલીવુડ ઇન્ડસ્ટ્રીમાં ઘણી હલચલ મચી ગઈ હતી.  જો કે આ બાદ મુંબઈ પોલીસે બોલીવુડ અભિનેતા સલમાન ખાનને બંદુક રાખવાનું લાઇસન્સ આપી દીધું છે. લોરેન્સ બિશ્નોઇની ગેંગના સદસ્યો દ્વારા મળતી ધમકીને લઈને આત્મરક્ષા માટે સલમાન ખાને બંદુકના લાઇસન્સ માટે અરજી કરી હતી. મુંબઈ પોલીસે સલમાન ખાનને ગન રાખવા માટેનું લાઇસન્સ જારી કરી દીધું હતું.