અમદાવાદ / રામોલમાં નકલી નંબર પ્લેટ લગાવવાના કૌભાંડનો થયો પર્દાફાશ, બેની ધરપકડ

અમદાવાદના રામોલ વિસ્તારમાં ગેરકાયદે નંબર પ્લેટ લગાવવાના કૌભાંડનો રામોલ પોલીસે પર્દાફાશ કર્યો છે. પોલીસે પર નકલી નંબર પ્લેટ જ્પ્ત કરીને બે યુવકોની ધરપકડ કરી વધુ પૂછપરછ હાથ ધરી છે. 

મળતી માહિતી પ્રમાણે રામોલ પોલીસ જયારે પેટ્રોલિંગ હતી ત્યારે પોલીસની ટીમને બાતમી મળી હતી કે એક યુવક નૈયા પેરેડાઇઝ તરફ જાય છે અને તેની પાસે ગેરકાયદે ડુપ્લીકેટ આરટીઓની આઈ.એડ કોડ વગરની નંબર પ્લેટ છે. આ બાતમીના આધારે વસ્ત્રાલ ચાર રસ્તા પાસેથી કિરણ ગલ્સર નામની વ્યક્તિ સહિત અન્ય એક વ્યક્તિને ઊભી રાખીને તેની પૂછપરછ કરી હતી. તેની પાસેથી ૪ર એચએસઆરપી મળી આવી હતી, જે બાબતે પૂછપરછ કરતાં તે આ નંબર પ્લેટ રામોલની પેઇન્ટર બી ગજ્જર નામની દુકાનમાં આપે છે. પોલીસે દુકાનમાં જઈ તપાસ કરતાં વધુ ૧૦ નંબર પ્લેટ મળી આવી હતી.

પોલીસે આ મામલે આરટીઓના અધિકારીને બોલાવી તપાસ કરાવતાં અમુક નંબર પ્લેટમાં બ્લૂ કલરથી ઇન્ડિયા લખ્યું ન હતું અને અમુકમાં ઇન્ડિયા લખેલું હતું. એક પણ નંબર પ્લેટમાં આઇડેન્ટિફિકેશન કોડ જ નહોતો, અશોક ચક્ર પણ ન હતું તેમજ પાછળના ભાગે બારકોડ સ્ટિકર પણ લગાવેલ નથી. પોલીસે કિરણ ગલ્સર અને દુકાન માલિક ભીખાભાઇ ગજ્જરની ધરપકડ કરી વધુ પૂછપરછ હાથ ધરી છે.

ઉલ્લેખનીય છે કે હાલમાં ૩૧ ઓગસ્ટ સુધીમાં તમામ વાહનમાં એચએસઆરપી લગાવી દેવી ફરજિયાત છે, જેનો ફાયદો ઉઠાવી કેટલાક વેપારીઓ પૈસા કમાવવા નકલી એચએસઆરપી વાહનોમાં લગાવી દે છે. આરટીઓના અધિકારીઓ જો શહેરમાં ચે‌િકંગ હાથ ધરે તો ગેરકાયદે નંબર પ્લેટ લગાવવાનું મોટા પાયે ચાલતું કૌભાંડ બહાર
આવી શકે તેમ છે.