VTVએ કર્યો પર્દાફાશ / સાણંદ ટોલનાકા પાસે ઉઘાડી લૂંટનો મામલો: DySPએ કર્યો મોટો ખુલાસો, કહ્યું સ્વેચ્છાએ જ રેડિયમ લગાવવાની છે મંજૂરી

• VTV NEWSના અહેવાલની અસર
• અમદાવાદ ગ્રામ્ય DySPનું નિવેદન
• "ટ્રસ્ટને માત્ર રેડિયમ રીફલેક્ટર લગાવવાની મંજૂરી"
• VTV NEWSએ કર્યો હતો લૂંટનો પર્દાફાશ

અમદાવાદના સાણંદમાં VTV NEWSના અહેવાલની અસર દેખાઇ છે. સાણંદ ટોલ ટેક્સ પાસે ટ્રક ચાલકો સાથે ઉઘાડી લૂંટ મામલે અમદાવાદ ગ્રામ્યના DySP મેઘા તેવરનું નિવેદન સામે આવ્યું છે.  DySP મેઘા તેવરે જણાવ્યું કે, દર્શન ચેરીટેબલ ટ્રસ્ટને માત્ર રેડિયમ રીફલેકટર લગાવવાની મંજૂરી આપવામાં આવી છે. આ ટ્રસ્ટને અમદાવાદ શહેરના હદમાં કુલ 5 જગ્યા પર મંજૂરી આપવામાં આવી છે. 

ઉઘાડી લૂંટ મામલે ખુલાસો
DySPએ જણાવ્યું કે, દર્શન ચેરીટેબલ ટ્રસ્ટને રાત્રે 9 વાગ્યાથી સવારના 5 વાગ્યા સુધી વાહન માલિકોની સ્વૈચ્છિક મંજૂરીથી રેડિયમ લગાવવાની મંજૂરી આપવામાં આવી છે. જેમાં કાર, બસ, ટ્રક, મોટા વાહનો માટે અલગ અલગ ભાવ નક્કી કરવામાં આવ્યા છે.  નક્કી કરેલા સ્થળો સિવાય અન્ય સ્થળ પર ઉભા હશે તો કાર્યવાહી થશે.

.... તો કાર્યવાહી કરવામાં આવશેઃ DySP
DySP મેઘા તેવરે જણાવ્યું કે, વાહન ચાલકો પાસેથી બળજબરીથી રૂપિયા ઉઘરાવતા હશે તો કાર્યવાહી કરીશું.  આ માણસ વતી બીજા કોઈ વ્યક્તિ પૈસા ઉઘરાવતા હશે તો તેની સામે પણ કાર્યવાહી કરવામાં આવશે. આ વ્યક્તિએ ખોટી રીતે અમારા લેટરનો ઉપયોગ કર્યો છે, તો એના માટે પણ જરૂરી કાયદેસરની કાર્યવાહી કરવામાં આવશે.  કોઈની સાથે જબરદસ્તી કરવાની સૂચના પોલીસે આપી જ નથી. મહત્વનું છે કે,  VTV NEWSએ ટોલ ટેક્સ પાસે ચાલતી ઉઘાડી લૂંટનો પર્દાફાશ કર્યો હતો.  'દર્શન ચેરિટેબલ ટ્રસ્ટ'ના નામે ટોળકી ટ્રક દીઠ 300-300 રૂપિયા વસૂલ કરતી હતી. ગાડીમાં રેડિયમ ટેપ નથી અને ઉપરથી ચેકિંગ છે તેવું કહી ઉઘાડી લૂંટ કરતા હતા

શું છે સમગ્ર મામલો?
સાણંદ-વિરમગામ હાઈવે પર આવેલા ટોલ ટેક્સ પર છેલ્લા ઘણા સમયથી મોડી રાત્રે ટ્રકચાલકો પાસેથી ભારત સરકાર સડક પરિવહન અને રાજમાર્ગ મંત્રાલયના નામે ખોટી રીતે લૂંટ ચલાવવામાં આવી રહી હતી. જે અંગેની જાણ VTV NEWSને થઈ હતી. જેથી 16 માર્ચે મોડી રાત્રે VTVની ટીમ સાણંદ ટોલ ટેક્સ ખાતે પહોંચી હતી અને સમગ્ર કૌભાંડને ઉજાગર કર્યું હતું. સરકારમાં ઉચ્ચ પદસ્થ લોકોના નામે લૂંટતા લોકો VTV NEWSના કેમેરામાં કેદ થયા હતા. 

ટ્રક દીઠ 300 રૂપિયા ઉઘરાવતી હતી ટોળકી
આ ટોળકી પોલીસ વડાના નામે ટ્રક ચાલકો પાસેથી દરરોજ રાત્રે પૈસા ઉઘરાવતી હતી. રેડિયમનો નિયમ બતાવીને ટ્રક ચાલકો પાસેથી ટ્રક દીઠ 300 રૂપિયા ઉઘરાવતી હતી. સાથે જ ભારત સરકાર સડક પરિવહન અને રાજમાર્ગ મંત્રાલય લખેલી દર્શન ચેરિટેબલ ટ્રસ્ટના નામની રસીદ ટ્રકચાલકોને આપવામાં આવતી હતી. ગાડીમાં રેડિયમ ટેપ નથી અને ઉપરથી ચેકિંગ  ચાલે છે તેવું કહીને આ ટોળકી ઉઘાડી લૂંટ ચલાવી રહી હતી. VTV NEWSની તપાસમાં ટ્રકચાલકોને આપવામાં આવતી લૂંટની રસીદ બોગસ હોવાનો ખુલાસો થયો હતો.

અમને IG સાહેબે આપી છે મંજૂરીઃ ટ્રસ્ટનો કર્મચારી
આ રૂપિયા ઉઘરાવી રહેલા શખ્સો (દર્શન ચેરીટેબલ ટ્રસ્ટના કર્મચારી) સાથે જ્યારે VTV ન્યૂઝે વાત કરી ત્યારે તેઓએ જણાવ્યું હતું કે અમે ગાડીઓમાં રેડિયમ લગાવીએ છીએ. અમને IG સાહેબે પૈસા ઉઘરાવાનો પરવાનો આપ્યો છે. જેનો એક પત્ર પણ તેઓએ બતાવ્યો હતો.  

 
ટ્રસ્ટી ભરત દીક્ષિતએ કર્યો હતો VTV સમક્ષ દાવો
જે બાદ દર્શન ચેરિટેબલ ટ્રસ્ટના ટ્રસ્ટી ભરત દીક્ષિતનો સંપર્ક કરનામાં આવ્યો હતો. તેમની સાથે ટેલિફોનિક વાતચીત કરવામાં આવતા તેઓએ દાવો કરતા જણાવ્યું હતું કે, 'અમે રેડિયમ લગાડવાના આ પૈસા લઈએ છીએ. અમારી સંસ્થા 20 વર્ષથી કાર્યરત છે. આ ઉપરાંત તેમણે જણાવ્યું હતું કે મારી પાસે મંજૂરી છે. IG સાહેબથી લઈને DGP સાહેબ અને હોમ મિનિસ્ટર સાહેબથી લઈને બધાની જ મંજૂરી મારી પાસે છે.'