ગાંધીનગર લોકસભા સીટ પર મતગણતરીને લઇ તમામ તૈયારીઓ પૂર્ણ કરી દેવામાં આવી છે. આ વખતે ગાંધીનગર ચૂંટણી અધિકારી દ્વારા લોકસભા સીટ પર એક અલગ કલર કોડ અપાયો છે. આ ઉપરાંત 113 કેમેરાની મદદથી ગાંધીનગર સીટ પર મત ગણતરીનું મોનિટરિંગ કરવામાં આવશે.
પ્રત્યેક વિધાનસભા બેઠક દીઠ 5 VVPAT અને EVMને મેચ કરવામાં આવશે અને મત પેટીને ગણતરી કેન્દ્ર સુધી લઇ જવાના સમયનું પણ વીડિયો રેકોર્ડિંગ કરવામાં આવશે. આ સાથે જ મત ગણતરી પ્રક્રિયા જોવા માટે 100 મીટર દૂર બે એલઇડી લગાવાયા છે. ગાંધીનગર લોકસભા સીટ પર 1975 મતદાન કેન્દ્રના EVMની ગણતરી કરાશે.
જેમાં પ્રથમ બેલેટ પેપર બાદમાં EVM અને પછી VVPATની ગણતરી કરાશે જેને લઇ સાંજે 6થી 7 સુધીમાં સંપૂર્ણ મતગણતરી પૂર્ણ થઇ જશે. ગાંધીનગરમાં મતગણતરી કેન્દ્રની તૈયારીઓ પૂર્ણ કરી દેવામાં આવી છે. ઉલ્લેખનીય છે કે મુખ્ય ચૂંટણી અધિકારી અને ઓબ્ઝર્વર દ્વારા મતગણતરી કેન્દ્રની ગઇકાલે સમીક્ષા કરવામાં આવી હતી.
ગાંધીનગર લોકસભા સીટ પર 7 મતગણતરી રૂમ તૈયાર કરવામાં આવ્યા છે. જેમાં દરેક રૂમમાં વીવીપેટની ગણતરી માટે અલગ-વ્યવસ્થા કરવામાં આવી છે. આ ઉપરાંત મતગણતરી રૂમમાં વેબકાસ્ટિંગની પણ વ્યવસ્થા કરવામાં આવી છે.