રૂપિયા 24 લાખની કારને ગદર્ભો સાથે ખેંચાવીને નોંધાવ્યો વિરોધ
કાર પર કારના માલિકે પોસ્ટરો લગાવીને વિરોધ કર્યો
વડોદરામાં નવીનકોર લક્ઝુરિયસ કાર બગડતા કારમાલિકએ અનોખો વિરોધ નોંધાવી કંપની વિરુદ્ધ આક્રોશ ઠાલવ્યો હતો. 24 લાખની કારને ગદર્ભો સાથે ખેંચાવીને માલિકે વિરોધ નોંધાવ્યો હતો. ઉપરાંત કાર પર કારના માલિકે પોસ્ટરો પણ લગાવ્યા હતા. જેમાં કાર કંપનીના નામનો ઉલ્લેખ કરીને કટાક્ષ સાથે કારના શોરૂમની બહાર જ કાર માલિકે વિરોધ પ્રદર્શન કર્યું હતું.
કારના શોરૂમની બહાર જ કાર માલિકે કર્યુ વિરોધ પ્રદર્શન
વડોદરાના જગદીશ ગનવાણીએ 24 લાખ રુપિયામાં મેં 9 સપ્ટેમ્બર 2022ના રોજ નવી ગાડી ખરીદી હતી. પરંતુ આ ગાડી બે જ દિવસમાં બગડી ગઇ હતી. જેને લઇને માલિકે મેલ અને ટેલિફોનિક રીતે શોરૂમ સંચાલકોનો સંપર્ક કર્યો હતો. પરંતુ પૂરતો જવાબ મળ્યો ન હતો. જ્યારે ફરિયાદ કરવામાં આવી અને રિફંડ મેળવાવનો પ્રયત્ન કરવામાં આવ્યો તો પણ તેમને કડવો અનુભવ થયો હતો. નવી કાર ખરાબ થઇ જતા કારમાલિક છેલ્લા 5 દિવસથી શોરૂમના ધક્કા લગાવી રહ્યા હતા.
વિરોધ બાદ શોરૂમ સંચાલકે કારની રકમ પરત કરવા આપી બાંહેધરી
અંતે કંટાળી જઇ પ્રોડક્ટ અને સર્વિસ ખરાબ હોવાથી માલિકોનો રોષ આસમાને પહોંચ્યો હતો. જે કંટાળી જઇ વિરોધનો અનોખો રસ્તો અપનાવ્યો અને વડોદરા શહેરમાં જગદીશભાઇએ પોતાની કાર સાથે આગળ બે ગધેડા જોડયા હતા. ઉપરાંત ઢોલીને પણ શો-રુમ લઈ ગયા હતા.જોકે વિરોધ બાદ શોરૂમ સંચાલકે કારની રકમ પરત કરવા બાંહેધરી આપી હોવાનું પણ જાણવા મળી રહ્યું છે.