લોકસભા ચૂંટણી પૂર્ણ થતાની સાથે જ ખાનગી એજન્સીઓના એગ્ઝિટ પોલ સામે આવ્યા છે. દેશની 542 લોકસભા બેઠકો માટે તમામ એજન્સીઓ પોતા-પોતાના અનુમાન લગાવી રહી છે. જે એવું દર્શાવે છે કે ફરી મોદી સરકાર બની રહી છે. દેશભરમાં એનડીએની સરકાર બનતી હોય તેવા સંકેત મળી રહ્યા છે. ત્યારે મોદી લહેર કોંગ્રેસના સૂપડાં સાફ કરી દેશે?
મતગણતરી પહેલા એક્ઝિટ પોલમાં NDA સરકારની ફરી બને તેવા સંકેત મળી રહ્યા છે પરંતુ 23મી તારીખે સ્પષ્ટ થશે કે કોણ બાજી મારશે.
મધ્યપ્રદેશ
અહીં 29 બેઠકોમાં ભાજપને 26થી 28 બેઠકો મળી શકે છે. તો કોંગ્રેસને માત્ર 1થી 3 બેઠકો મળે તેવી શક્યતા છે. આજતકના એક્ઝિટ પોલમાં અહીં અન્યોનું ખાતુ પણ નથી ખુલી રહ્યું. જો ભાજપ પોતાનો આ ગઢ સર કરી લે છે તો કોંગ્રેસ માટે મોટો ઝટકો સાબિત થશે. કારણ કે તાજેતરમાં યોજાયેલી વિધાનસભા ચૂંટણીમાં કોંગ્રેસે અહીં ભાજપ પાસેથી સત્તા છીનવી છે. તો ભાજપ અહીં મતદારોને રીઝવવામાં સફળ રહ્યું તો આગામી વિધાનસભા ચૂંટણીમાં કોંગ્રેસને ઝટકો લાગી શકે છે.
છત્તીસગઢ
11 બેઠકો ધરાવતા છત્તીસગઢમાં ભાજપને 7 થી 8 બેઠકો મળી શકે છે. તો તાજેતરમાં જ રાજ્યમાં યોજાયેલી વિધાનસભાની ચૂંટણીની સીટોને કન્વર્ટ કરીએ તો કોંગ્રેસને 3 થી 4 બેઠકો મળી શકે છે. 2014માં ભાજપને અહીં 10 બેઠકો મળી હતી.
રાજસ્થાન
અહીં ભાજપ માટે સારા સમાચાર આવી રહ્યાં છે. આજતકના એક્ઝિટ પોલ પ્રમાણે રાજસ્થાનમાં ભાજપને 23-25 બેઠકો મળી શકે છે. તો કોંગ્રેસને 2 બેઠકો મળે તેવી શક્યતા છે. એક્ઝિટ પોલમાં ભાજપને જોરદાર સફળતા મળતી નજરે પડે છે. ઉલ્લેખનીય છે કે તાજેતરમાં જ યોજાયેલી અહીંની વિધાનસભા ચૂંટણીમાં કોંગ્રેસે ભાજપ પાસેથી સત્તા આંચકી હતી.
મહારાષ્ટ્ર
મહારાષ્ટ્રમાં NDAને 48માંથી 38 થી 42 બેઠકો મળવાની શક્યતા છે. તો યૂપીએને 6 થી 10 બેઠકો મળી શકે છે. એક્ઝિટ પોલમાં મહારાષ્ટ્રમાં કોંગ્રેસ-એનસીપીને જોરદાર ઝાટકો લાગી શકે છે. ઉલ્લેખનીય છે કે ભાજપ-શિવસેનાનો અહીં દબદબો રહ્યો છે.
ગુજરાત
પીએમ મોદી અને ભાજપ અધ્યક્ષ અમિત શાહના ગૃહરાજ્ય અને ભાજપની પ્રયોગષાળામાં ફરી એકવાર જનતા પોતાના ચાહીતા નેતાઓની પડખે છે. અહીં પણ કોંગ્રેસના સુપડા સાફ થતા નજરે પડી રહ્યાં છે. અહીં 26માંથી ભાજપને તમામે તમામ 26 બેઠકો મળી શકે છે. જ્યારે અમુક સર્વેમાં 23-24 જેટલી સીટોનું અનુમાન છે પરંતુ અહીં કોંગ્રેસ માટે થોડાં પણ સારા સમાચાર જોવા નથી મળી રહ્યાં.
તેલંગાણા
તેલંગાણામાં 17 બેઠકો છે. અહીં ભાજપને માત્ર 1 થી 3 બેઠકો મળી શકે છે તેવી રીતે કોંગ્રેસને પણ 1 થી 3 બેઠકો જ મળવાની શક્યતા છે. તો ટીઆરએસને 10 થી 12 બેઠકો મળી શકે છે.
કર્ણાટક
કર્ણાટકમાં ભાજપ ગઠબંધનને 21 થી 25 બેઠકો મળી શકે છે. જ્યારે કોંગ્રેસ ગઠબંધનને માત્ર 3 થી 6 બેઠકો જ મળવાની શક્યતા છે.
દિલ્હી
અહીં ભાજપને તમામે તમામ 7 બેઠકો મળવાની શક્યતા છે. તો આપ અને કોંગ્રેસને ઉંધા માથે પછડાટ મળી શકે છે.