વર્લ્ડમાં વકર્યો વાયરસ / WHOનું મોટું એલર્ટ : કોરોના પ્રતિબંધોની ઢીલ મોંઘી પડશે,અત્યારથી જ કરી રાખજો તૈયારી

• વિશ્વમાં કોરોના કેસ વધતા વિશ્વ આરોગ્ય સંગઠન ચિંતિત
• કોરોના પ્રતિબંધોમાં છૂટ આપનાર દેશોને આપી મોટી ચેતવણી
• છૂટ ભારે પડશે, અત્યારે થઈ જાવ એલર્ટ

ચીન,હોંગકોંગ તથા યુરોપના કેટલાક દેશોમાં ધીમે પગલે કોરોનાના કેસ વધી રહ્યાં છે જે આવનારી મોટી આફતનો સંકેત છે.વૈશ્વિક સ્તરે કોરોના કેસમાં વધારો થઈ રહ્યો હોવા છતાં પણ કેટલાક દેશો કોરોના પ્રતિબંધોમાં છૂટછાટ આપી રહ્યાં છે અથવા તો પ્રતિબંધો હળવા કરી રહ્યાં છે.કોરોના પ્રતિબંધોમાં છૂટછાટ આપવાનું કામ વિશ્વ આરોગ્ય સંગઠનને પસંદ પડ્યું નથી. વિશ્વ આરોગ્ય સંગઠને કહ્યું કે રાષ્ટ્રોએ કોરોના વાયરસ સામે જાગૃત રહેવું જોઈએ. ગયા અઠવાડિયે વિશ્વભરમાં કોવિડના કેસોમાં વધારો થવાનું શરૂ થયું હતું, WHOએ જણાવ્યું હતું કે, એશિયા અને ચીનના જિલિન પ્રાંતમાં લોકડાઉન લાદવામાં આવ્યું છે.

આપણે જે કેસો જોઈ રહ્યાં છીએ તે પાશેરમાં પહેલી પૂણી છે 
WHO વડા ટેડ્રોસ ઘેબ્રેયેસસે પત્રકારોને જણાવ્યું હતું કે વિશ્વમાં કોરોના કેસ વધવા પાછળ ઘણા કારણો જવાબદાર છે તેમાં ઝડપથી ફેલાનાર ઓમિક્રોન,બીએ-2 સામેલ છે. તેમણે કહ્યું કે આપણે કોરોનાના જે કેસ જોઈ રહ્યાં છીએ તે પાશેરમાં પહેલી પૂણી છે. રસીકરણના નીચા દરને કારણે કેટલાક દેશોમાં કેસ વધી રહ્યા છે. 

દક્ષિણ કોરિયા અને ચીનમાં કોરોના કેસોમાં મોટો ઉછાળો 

સૌથી મોટો ઉછાળો  પશ્ચિમ પેસિફિક ક્ષેત્રમાં થયો હતો, જેમાં દક્ષિણ કોરિયા અને ચીનનો સમાવેશ થાય છે, જ્યાં કેસોમાં 25% નો વધારો થયો હતો અને મૃત્યુમાં 27% નો વધારો થયો હતો.આફ્રિકામાં પણ નવા કેસોમાં 12 ટકાનો વધારો અને મૃત્યુમાં 14 ટકાનો વધારો જોવા મળ્યો હતો, અને યુરોપમાં કેસોમાં 2 ટકાનો વધારો થયો હતો, પરંતુ મૃત્યુમાં કોઈ વધારો થયો ન હતો. અન્ય પ્રદેશોમાં કેસોમાં ઘટાડો નોંધાયો છે, જેમાં પૂર્વીય ભૂમધ્ય ક્ષેત્રનો પણ સમાવેશ થાય છે, જો કે આ પ્રદેશમાં ચેપમાં અગાઉના વધારા સાથે સંકળાયેલા મૃત્યુમાં 38 ટકાનો વધારો જોવા મળ્યો છે.

આ દેશોમાં પણ કેસોમાં થયો વધારો 
ઘણા નિષ્ણાતોએ ચિંતા વ્યક્ત કરી છે કે ઓસ્ટ્રિયા, જર્મની, સ્વિટ્ઝર્લેન્ડ, નેધરલેન્ડ્સ અને યુનાઇટેડ કિંગડમ યુરોપમાં કોરોનાવાયરસની બીજી લહેરનો સામનો કરી રહ્યા છે કારણ કે માર્ચની શરૂઆતથી જ કેસોમાં વધારો થયો છે.

અમેરિકામાં કોરોનાની નવી લહેર આવશે 
ડબલ્યુએચઓની એવી ચેતવણી છે કે ટૂંક સમયમાં અમેરિકામાં કોરોનાની નવી લહેર આવી શકે છે.જે સંભવત: બીએ .2 ને કારણે થઈ શકે છે.