રાજ્યમાં સ્પર્ધાત્મક પરીક્ષાના પેપર ફૂટવાની સતત વધી રહેલી ઘટનાઓ વચ્ચે ધોરણ 10 બોર્ડની પરીક્ષાનું પેપર પૂર્ણ થાય તે પહેલા સોશિયલ મીડિયા પર વાયરલ થયું હોવાનો દાવો કરવામાં આવી રહ્યો છે.
ધોરણ 10નું પેપર પૂર્ણ થાય તે પહેલા વાયરલ
અડધો કલાક પહેલા સોશિયલ મીડિયા પર ફરતું થયું
સોલ્વ કરેલું પેપર સોશિયલ મીડિયામાં થયું હતું ફરતુ
ધોરણ 10 બોર્ડની આજે હિન્દી દ્વિતીય ભાષાની પરીક્ષા લેવાઇ છે. ત્યારે આ પેપર પુરુ થવાના અડધો કલાક પહેલા સોશિયલ મીડિયા પર ફરતું થયું છે. હિન્દી દ્વિતિય ભાષાનું સોલ્વ કરેલું પેપર સોશિયલ મીડિયામાં ફરતુ થયું હતું. પરીક્ષા પૂર્ણ થવાના 30 મિનિટ પહેલા સોશિયલ મીડિયામાં પેપર ફરતું થયું છે. VTV આ પેપરની પુષ્ટિ કરતું નથી.
સમગ્ર ઘટનાને શિક્ષણ બોર્ડ ગંભીરતાથી લે છે અને તપાસના આદેશ અપાયા છેઃ ગુજરાત માધ્યમિક શિક્ષણ બોર્ડના ચેરમેન
હિન્દી દ્વિતિય ભાષાનું સોલ્વ કરેલું પેપર વાયરલ થવા અંગે પરીક્ષા સચિવ ભીખાભાઈ ચૌધરીએ કહ્યું કે, દરેક જિલ્લાના DEOને તપાસના આદેશ અપાયા છે. પેપર વાયરલ થયું હોવાના સમાચાર બાદ તપાસ શરૂ કરાઈ છે. જે તપાસમાં સામે આવશે તેની સામે કાર્યવાહી કરાશે. પરીક્ષા બોર્ડના ચેરમેને કહ્યું કોઈ વિદ્યાર્થી વહેલો નીકળ્યો હોય તેવુ બની શકે. 1-2 તત્વો હોય છે તે આવુ કૃત્ય કરતા હોય છે, સમગ્ર ઘટનાને શિક્ષણ બોર્ડ ગંભીરતાથી લે છે અને તપાસના આદેશ અપાયા છે.
ધોરણ 10ના પેપરમાં પણ ગેરરીતિ થાય છેઃ કોંગ્રેસ પ્રવક્તા
ધોરણ 10ના હિન્દીના પેપરના જવાબો ફરતા થવાનો મામલે કોંગ્રેસ પ્રવક્તા મનીષ દોશીએ કહ્યું કે, શિક્ષણ વિભાગ માટે શરમજનક વાત છે. મહેસાણામાં પણ અગાઉ બારોબાર પેપર લીક થયું હતું. કોંગ્રેસ સવાલ પૂછે છે કે તપાસ કેમ નથી થતી. ગુજરાતનો મહેનત કરતા વિદ્યાર્થીઓ સાથે રમત રમાઈ રહી છે. ધોરણ 10ના પેપરમાં પણ ગેરરીતિ થાય છે. ચાલુ પરીક્ષાએ સોલ્વ કરેલું પેપર કેવી રીતે વાયરલ થયું?