ગાંધીનગરમાં 18 નહીં પણ 17 આંદોલનો હાલમાં શરૂ છે. રાજ્ય સરકારે પાંચ અધિકારીઓની કમિટીની રચતા માજી સૈનિકોનું આંદોલન આજે પૂર્ણ થઇ ગયું છે.
ગુજરાતમાં ચાલી રહેલું માજી સૈનિકોનું આંદોલન પૂર્ણ
14 મુદ્દાઓને લઈને રાજ્ય સરકારે કરી કમિટીની રચના
ગાંધીનગરમાં ઘણાં દિવસોથી ચાલતું હતું આંદોલન
ગુજરાતમાં છેલ્લા કેટલાય દિવસથી ચાલી રહેલ માજી સૈનિકોનું આંદોલન આખરે આજે પૂર્ણ થયું છે. માજી સૈનિકોના 14 મુદ્દાઓને લઈને રાજ્ય સરકારે પાંચ અધિકારીઓની કમિટીની રચના કરી. જેમાં પડતર પ્રશ્નોનું વહેલીતકે નિરાકરણ લાવવા સરકારે ખાતરી આપી છે.
મહત્વનું છે કે, છેલ્લા ઘણાં દિવસથી ગાંધીનગરમાં માજી સૈનિકો દ્વારા પડતર પ્રશ્નોનું નિરાકરણ લાવવા માટે આંદોલન ચાલી રહ્યું હતું. માજી સૈનિક સંગઠનના પ્રમુખ પડતર માંગને લઈને ઉપવાસ ઉપર બેઠા હતા. ત્યારે હવે પડતર મુદ્દાઓ ઉપર રાજ્ય સરકારે એક કમિટી બનાવવાની તૈયારી દર્શાવી. જેમાં સરકારે પડતર પ્રશ્નોનું વહેલીતકે નિરાકરણ લાવવાની ખાતરી આપી છે. સરકારે ખાતરી આપતા આખરે માજી સૈનિકોએ આંદોલન સમેટી લીધું છે.
પ્રશ્નોનું ઝડપથી નિરાકરણ કરવામાં આવશે: રેન્જ IG અભય ચુડાસમા
સેનિકોના આંદોલન મામલે રેન્જ IG અભય ચુડાસમાએ નિવેદન આપતા જણાવ્યું કે, 'પ્રશ્નોનું ઝડપથી નિરાકરણ કરવામાં આવશે. પાંચ અધિકારીઓની કમિટી બનાવવામાં આવી. 14 પડતર પ્રશ્નોને લઈને કમિટી બનાવવામાં આવી. નિવૃત્ત સૈનિકોએ આંદોલન પૂર્ણ જાહેર કર્યું છે.'
જાણો શું હતી માજી સૈનિકોની પડતર માંગણીઓ
શહીદ સૈનિકના પરિવારને રાજ્ય સરકાર દ્વારા 1 કરોડની સહાય
શહીદ સૈનિકના દીકરા અથવા પરિવારના સભ્યને સરકારી નોકરી
શહીદના પરિવારને રાજ્ય સરકાર તરફથી પેન્શન
ગાંધીનગર ખાતે રાજ્ય લેવલનું શહીદ સ્માકર
શહીદ સ્મારકમાં માજી સૈનિકો માટે આરામ ગૃહની વ્યવસ્થા
વર્ગ-1 અને વર્ગ-4 સુધીની નિમણૂક વખતે માજી સૈનિકોને અપાતા અનામતનો ચુસ્ત અમલ
દારૂ માટે ભારતીય સેનાએ આપેલી પરમિટ માન્ય રાખવાની જોગવાઈ
કોન્ટ્રાક્ટ પદ્ધતિ રદ્દ કરીને સરકાર દ્વારા સીધી માજી સૈનિકની નિમણૂકની જોગવાઈ
હથિયાર લાયસન્સ રિન્યુ કરવા અને નવા લાયસન્સ લેવા તાત્કાલિક કાર્યવાહી
માજી સૈનિકના સામાજિક પ્રશ્નોને અગ્રતા આપી તાત્કાલિક નિરાકરણ
સેનાની નોકરીનો સમય ગાળો પુનઃ નોકરીમાં સળંગ ગણી પગાર રક્ષણ
ગુજરાત સરકારી સેવામાં 5 વર્ષ ફિક્સ પગાર પ્રથા નાબૂદી
સરકારી નોકરીમાં રહેઠાણ નજીક નિમણૂક
ઉચ્ચ અભ્યાસમાં માજી સૈનિકના બાળકોને અનામત
માજી સૈનિકના બાળકોના અભ્યાસનો સંપૂર્ણ ખર્ચ રાજ્ય સરકારે ઉઠાવવો
માજી સૈનિકને વ્યવસાય વેરામાંથી મુક્તિ આપવામાં આવે.
ગાંધીનગરમાં 17 જેટલાં આંદોલનો યથાવત
ઉલ્લેખનીય છે કે, ગુજરાત વિધાનસભાની ચૂંટણી નજીકમાં આવતાં જ વિવિધ સંગઠનો દ્વારા પોતાની પડતર માંગણીઓને લઇને રાજ્યના પાટનગર ગાંધીનગરમાં આંદોલન શરૂ કરી દેવામાં આવ્યા છે. ત્યારે હાલ ગાંધીનગરમાં એક બે નહીં પણ 18-18 આંદોલનો એક સાથે ચાલી રહ્યાં છે. જેમાંથી એક આંદોલનને આજે સમેટી લેવાયું છે.
રાજકાજ અને વહીવટનું નગર એવું આપણું પાટનગર ગાંધીનગર, ચૂંટણી પહેલાં અસંતુષ્ટ કર્મચારીઓના આંદોલનનું સમરાંગણ બની ગયું છે. ઘનઘોર વનોના રખેવાળો હોય, કે દેશના સીમાડાના પૂર્વ પ્રહરીઓ હોય કે પછી રાજ્યના ચોથાવર્ગના કર્મચારી હોય કે છેવાડાના ગામડાના ઉપેક્ષિત વોલન્ટિયર કોમ્પ્યુટર આંતરપ્રેન્યોર અહીં રોજે રોજ રાજ્યના ખૂણે ખાંચરેથી સરકારી કર્મચારીઓ પોતાની વેદનાનો અવાજ સંભળાવવા આવી રહ્યાં છે. કેટલાક કર્મચારી સંગઠનો અહીંની સત્યાગ્રહ છાવણીમાં લાંબા સમયથી પોતાની માગણીની ધૂણી ધખાવી બેઠા છે, તો કેટલાક સંગઠનોએ ચૂંટણી પહેલા સરકાર પર દબાણ ઊભું કરવાની તક ઝડપી લીધી છે.
ગાંધીનગરમાં પોલીસની કિલ્લેબંધી
ગાંધીનગરમાં વિવિધ સંગઠોનોના આંદોલન યથાવત્ છે. ગાંધીનગરમાં વનપાલ, આંગણવાડીની મહિલાઓ, આરોગ્ય કર્મચારીઓ, VCE કર્મીઓ, વિદ્યાસહાયકો, આશા વર્કરો બહેનો, વર્ગ 3-4ના કર્મચારીઓ, કરાર આધારિત કર્મચારીઓ, મધ્યાહન ભોજન કર્મચારીઓનું આંદોલન પણ યથાવત છે. તો કિસાન સંઘ પણ પડતર માંગણીઓને લઈ આંદોલન કરી રહ્યું છે. આ તમામ આંદોલનના કારણે પાટનગર પોલીસ છાવણીમાં ફેરવાયું છે.લગભગ સાત જિલ્લાની પોલીસને ગાંધીનગર ઉતારી દેવાઇ છે. CRPFની વધારાની ફોર્સ પણ કામે લગાડવામાં આવી છે.
ત્રીજા-ચોથા વર્ગના કર્મચારીઓએ પણ સરકાર સામે મોરચો માંડ્યો
રાજ્યના વર્ગ 3-4ના કર્મચારીઓએ સરકાર સામે મોરચો માંડ્યો છે. વિવિધ માંગણીઓને લઈને કર્મચારીઓ ગાંધીનગરમાં દેખાવો કરી રહ્યા છે. નિયમિત ભરતી અને જૂની પેન્શન યોજના, વય નિવૃત્તિની ઉંમર વધારવા સહિતની માંગોને લઈને કર્મચારીઓ પ્રદર્શન કરી રહ્યાં છે.
વન રક્ષકો અને વનપાલકો પણ કરી રહ્યાં છે આંદોલન
આ ઉપરાંત રાજ્યભરમાંથી વન રક્ષકો ગાંધીનગર પહોંચી ગયા છે. જેઓ ભરતી, બઢતી તેમજ નોકરીનો સમય ફિક્સ કરવા સહિત રજા પગારની માંગણી કરી રહ્યાં છે. તદુપરાંત નવા રક્ષક 2800 ગ્રેડ પેની માંગ કરી રહ્યાં છે, જ્યારે વનપાલ 4200 ગ્રેડ પેની માંગ કરી રહ્યાં છે. ગાંધીનગર અરણ્યભવનની બહાર વનપાલકો અને વન રક્ષકો એકઠા થયા છે. પોતાની મુખ્ય 4 માંગોને લઈ મહિલા - પુરૂષ કર્મચારીઓનું આંદોલન યથાવત.